El a worde condena na 7 luna di prison - ORANJESTAD (AAN): E hoben masculino A.v.d.L.(19), riba Diabierna mainta a presenta dilanti Hues
pa duna cuenta pa e cosnan malo cu el a haci. Entre otro el a worde haya culpable di tabatin scondi un arma di candela cu balanan.
Segun v.d.L. e arma aki e tabatin scondi pa su amigo Ignacio, kende na Januari 2021 a bira victima di asesinato cruel na Pos Chiquito.
ACUSACIONNAN:
E acusacionnan cu Fiscal a presenta Diabierna den sala di Corte contra v.d.L. ta: posecion di arma di candela cu balanan, na Februari 2021 a horta hunto cu un otro un cellular, 5 Maart 2021 posecion di marihuana.
Arma di Candela: Ta asina cu durante un investigacion di Polis na cas di A.v.d.L., a confisca un arma di candela. Net ora Polis a yega na e cas, v.d.L. a tira e arma for di bentana.
Polis a confisca e arma. A.v.d.L. a declara cu arma ey no tabata di dje sino e tabatin’e warda pa su amigo Ignacio. Na December 2020, Ignacio a duna v.d.L. e arma pa warda y na Januari 2021, Ignario ta worde tira mata den un auto na Pos Chiquito. Hues a bisa cu segun e amiga di A.v.d.L., el a mira A.v.d.L. cu e arma.
Smartphone horta: Segun A.v.d.L. un persona cu tabata debe placa di un iPhone cu el a bende, a trece e cellular p’e. Hues a bisa cu homber H. a bisa cu el a pone na venta un iPhone y a bay na un parkinglot pa un persona interesa.
Un persona a yega cerca dje tuma e cellular y core bay. Ta asina cu e iPhone aki a worde haya na cas di A.v.d.L. E homber H. a demanda 450 Florin di daño y 3.600 Florin di daño inmaterial.
Droga: Hues a mustra cu durante e investigacion na cas di v.d.L., Polis a haya 5.5 gram di marihuana.
Segun A.v.d.L. e ta huma 4 pa 5 sigaria di marihuana pa dia. E droga ta pa su propio uso. Hues a bisa cu Polis tambe a haya 5 mata seco. A.v.d.L. a splica Hues cu e tabata usa blachinan di marihuana pa traha bolo. E ta come space cake.
EXIGENCIA FISCAL:
Fiscal a bisa Hues cu a keda legalmente proba posecion di arma. El a bisa cu e arma tabatin balanan aden. E arma tabata di un amigo Ignacio. Fiscal ta haya cu v.d.L. a tuma un Smartphone cu ta bin for di ladronicia.
Polis a haya e Smartphone aki na cas di v.d.L. Na opinion di Fiscal, e no ta haya v.d.L. complice di e ladronicia di e Smartphone, pero si cu el a tuma e aparato mobil. Esey ta haya cu v.d.L. ta culpable di encubrimento. Fiscal a sigui bisa cu tambe a haya 14.3 gram di marihuana, 5 mata seco y algun simiya.
Fiscal a bisa cu posecion di arma cu bala ta sumamente peligroso. Bo por menaza of mata cu e arma y v.d.L. sa bon bon. Su amigo cu ta doño di e arma a worde tira mata na Januari 2021. Pa cu e castigo, Fiscal a bisa cu e ta tene cuenta cu ta promer biaha cu v.d.L. ta cay sera. Tambe Fiscal a tene cuenta cu seriedad di e caso, en especial posecion di arma.
Fiscal a exigi 10 luna di prison, di cual 3 luna ta condicional y un tempo di prueba di 3 aña. Fiscal a exigi pa e arma di candela, e droganan mester worde destrui. El a pidi pa declara e demanda di H. no admisibel pasobra no ta v.d.L. a horta e Smartphone.
ABOGADO:
Abogado mr. Cafarzuza a bisa cu v.d.L. a admiti di tabatin e arma warda pa un amigo. No por prueba cu el a horta hunto cu otro e cellular. E abogado a bisa cu v.d.L. a haya un Smartphone cu ta procedente di ladronicia. Esey ta encubrimento.
Tambe a haya un cantidad di marihuana. E abogado a pidi Hues pa tene cuenta cu v.d.L. ta arepenti di loke a sosode. E abogado ta comparti cu Fiscal cu no por honra demanda di daño pasobra v.d.L. no a horta e Smartphone.
SENTENCIA:
Hues a sera tratamento di e caso y a dicta sentencia di biaha. Hues ta haya legalmente proba cu v.d.L. tabatin un arma di candela. Hues no ta haya proba cu v.d.L. a horta e cellular pero si encubrimento di e Smartphone. Tambe posecion di marihuana.
Hues a bisa cu e ta comparti punto di bista di Fiscal, cu un arma di candela ta sumamente peligroso caminda por mata hende. E doño di e arma a worde mata cu tiro na cabez. Hues a tene cuenta cu ta promer biaha v.d.L. a cay sera. El a confirma exigencia di Fiscal.
Hues a condena A.v.d.L. na 10 luna di prison, di cual 3 luna ta condicional y un tempo di prueba di 3 aña. Hues a duna orden pa destrui e droga y e arma cu balanan.
