Hopi di nan gara cu celular den man tras di stuur
ORANJESTAD (AAN): Riba Diahuebs 5 di December 2024, Corte di Husticia na Playa a atende casi 700 persona cu a ricibi boet pero no a paga esey, y pa tal motibo tin di aparece dilanti Hues pa responde pa nan acto. Y manera semper, den Corte e ora Fiscal lo bay exigi un boet mas halto compara cu esun cu a wordo duna anterior.
Un total di 692 persona tabata riba lista pa aparece dilanti Hues, pa diferente tipo di violacion di reglanan di trafico na Aruba.
Loke por a nota ta cu hopi di esnan cu a presenta dilanti Hues, ta debi cu nan a core demasiado duro, otronan cu no a pone señal ora di cambia di ruta of baha caminda, hopi coriendo sin seatbelt bisti, y core sin rijbewijs. E ultimo ta un boet di 550 Florin, pero den Corte e ora Fiscal lo exigi castigo di 650 Florin como boet.
Sorpresa ta cu keto bay tin hopi chauffeur cu ta sigui tene un celular den nan man ora di maneha auto. Bo no mester ta ni papiando cu hende, pero djis e tenemento di celular den man, ta un violacion di Articulo 7A di Ley di Trafico na Aruba. Esey ta suficiente pa bo haya un boet di 500 Florin.
Riba Diahuebs mainta, un total di 117 chauffeur a presenta dilanti Hues como cu nan a wordo gara cu smartphone den man. E boet normal ta 500 Florin. Pero den Corte, Fiscal di Ministerio Publico lo exigi un boet e ora di 600 Florin.
Ta dificil pa bo defende bo mes pa esaki, pasobra hasta si bo smartphone ta paga... e hecho cu bo tin’e den bo man mientras bo ta stuur ta pone cu bo ta culpabel.
No ta conoci e resultado di cada un caso, pero si acaso ta tur 117 chauffeur a wordo haya culpabel y tin di paga e boet mas pisa awor di 600 Florin... haciendo un rekensom mesora bo ta compronde cu hunto e 117 chauffeurnan aki lo tin di paga 70.200 Florin acumulativo na boet.
Siendo bo por haya un hands-free set pa menos di 35 Florin cumpra pa bo no tin smartphone den bo man.
