Hues a duna orden
ORANJESTAD (AAN): For di comienso di tratamento di caso Flamingo, tabatin un desaroyo fastioso. Un di e sospechosonan, Gilberto Tiel no a presenta. Hues a puntra e dos Fiscalnan di Ministerio Publico kico ta e motibo cu Tiel no tey.
E Fiscalnan a splica Hues cu a manda e citacion na e cas di Gilberto Tiel na Aruba pero awor ta resulta cu Gilberto Tiel ta na Merca. Tiel ta un di e sospechosonan ambtenaar fantasma.
ORDEN PA BUSCA TIEL NA MERCA
Algun dia despues, promer cu a sigui cu tratamento di e caso, Hues a bisa cu atrobe e ta mira cu Gilberto Tiel no a presenta. Hues a bisa cu e ta ordena pa Ministerio Publico, busca Tiel for di Merca. Esey ta nifica cu Ministerio Publico lo pidi autoridad Mericano pa busca y detene Tiel y mand’e Aruba pa e caso.
Hues a bisa cu e ta pospone e caso penal contra Tiel pa dia 21 Januari 2025. Si pa e dia ey Tiel no presenta, e ora ey lo sigui cu tratamento di su caso y Fiscal lo exigi castigo. Su siguiente dia, 22 Januari 2025 lo tin sentencia di tur e otro sospechosonan di caso Flamingo. E chens ta grandi cu Hues lo dicta sentencia di Tiel tambe.
