Dunador di bijles condena pa a mishi cu mucha muher di 12 aña
ORANJESTAD (AAN): Diahuebs mainta e homber R.v.d.B. di 62 aña) a presenta dilanti Hues pa duna cuenta pa e loke el a haci.
R. ta wordo acusa cu riba 9 April 2024 el a mishi cu un mucha muher cu ta haya bijles cerca dje. R. a presenta den un rolstoel. Ta asina cu el a haci operacion di su heup y tin dificultad pa cana. Ta asina cu Fiscal a haya R. culpabel y a exigi castigo combina, teniendo cuenta cu R. su estado di salud. Hues ta haya legalmente proba cu R. a mishi cu e mucha y a confirma e exigencia di Fiscal.
Mucha ta wordo mishi: Despues cu Fiscal a presenta e acusacion, Hues a puntra R. kico e tin di bisa di e acusacion. R. a bisa cu e no a haci nada. Hues a lesa e procesverbaal di Polis cu ta mustra cu dia 9 April 2024, asistencia di Polis a wordo pidi na Yaburibari na unda ta duna bijles pa un caso.
Polis a topa cu un dama cu tabata zwaai su mannan. E dama a bisa e agentenan cu su yiu muher di 12 aña a wordo mishi door di e homber R. cu ta duna bijles. E mama a bisa cu el a haya un mensahe di su yiu cu R. a mishi cu ne na su parti intimo.
Mucha tabata tembla y yora: Polis a bay cerca e mucha cu tabata den auto di e mama. E agentenan por a mira cu e mucha tabata tembla y yorando y nervioso. E mucha a splica e agentenan cu nan tabata 3 mucha sinta na un mesa hayando bijles.
El a pidi R. si e por pone headphone pa tende music y R. a lag’e. Na dado momento e mucha a sinti un hende ta mishi na su pia parti ariba y e man a bay mishi na su parti intimo.
Acusado ta nenga: E agentenan a bay papia cu R., kende a bisa Polis cu el a bay wak kico e mucha tabata haciendo. El a bay leun na e muraya y bay cerca pa mira kico e mucha tabata haciendo y na dado momento su man a mishi cu e mucha su pia parti ariba.
Segun R., e no a bisa asina. El a splica cu el a leun na muraya bay un tiki dilanti pa wak kico e mucha tabata haciendo. R. a desmenti cu el a bisa Polis cu el a mishi cu e mucha su pia ariba. Hues a remarca cu 3 agente di Polis a firma e procesverbaal.
E mama di e mucha a declara na Polis cu su yiu muher y yiu homber ta haya bijles cerca R. E dia ey su yiu muher a mand’e mensahe cu R. a mishi cu ne. E mama a bay di biaha na e cas y e mucha a bis’e cu R. a mishi na su parti intimo. E ora ey e mama a bay paden y grita R. pakico el a mishi cu su yiu. R. a desmenti esey. Segun e mama, su yiu muher a bis’e cu no ta promer biaha cu R. ta mishi na su pia parti ariba. E mama a bisa cu e tabata confia R. pero wak kico el a haci cu su yiu.
Homber ta bisa mucha “pa no bisa nada”: E mucha a bisa Polis cu e ta bay bijles di dialuna pa diabierna. El a bisa cu tur ora R. ta pone man riba su pia. E no a pensa nada malo. Pero 9 April 2024, R. a mishi cu su pia y despues na su parti intimo. E mucha no a gusta y despues R. a bay cerca y a skirbi riba su celular pa e mucha: “please no bisa ningun hende, mi a fi abo e headphone, tog?” Ora e mucha a bay pafor, el a manda mensahe pa su mama kico a pasa.
E acusado R. a declara na Polis cu e mucha tabata sinta y yanga su pianan. E pianan tabata dal contra R. su pia. Na dado momento el a pidi R. pa usa headphone y a lag’e. Despues e mucha tabata blo keda yanga su pia y dal contra R. E ora ey R. a schuif e stoel di e mucha pa e stop dal na su pia. E ora ey e mucha a bis’e cu el a mishi cu ne. R. a bisa e mucha cu e no a mishi cu ne. E ora ey R. a skirbi riba su cellular pa e mucha wak, “please no bisa ningun hende, mi a fia bo e headphone, tog? Segun R. su intension tabata pa papia cu e mama di e mucha ora e mam bay busc’e. Segun R., el a haci esaki pasobra tin hopi mas mucha ta bay bijles y pa no crea mal impresion.
E acusado R. a bin cu un storia cu ‘e mucha ta gusta gaña’ y tabata busca manera pa no bay bijles mas. El a bisa e mama esey pero e mama a bisa cu e no ta kere cu su yiu ta bay gaña. E mama a bisa Polis cu ta berdad cu su yiu varios biaha ta bis’e cu e no kier bay bijles mas. Segun e mama, su yiu a bis’e cu ta mas o menos 3 luna cu R. ta mishi cu su pia.
Fiscal: Fiscal a bisa cu den caso di actonan asina, ta declaracion di e sospechoso contra e declaracion di e victima. Fiscal a mustra cu segun sentencia di Corte Supremo, un tiki prueba di sosten ta suficiente pa produci prueba. Fiscal ta haya cu e declaracion di e mucha ta confiabel y e sospechoso ta confirma e parti cu loke e mucha a declara esta cu el a skirbi riba su cellular pa e mucha y a fia e mucha un headphone. Fiscal ta haya cu tin suficiente prueba di sosten. Tambe el a mustra cu Polis a bay y a mira e mucha ta yora, tembla y ta fastioso. Tambe Fiscal a mustra cu e sospechoso R. a bisa cu e mucha a pidi pa fia headphone y cu R. a bisa cu normal no ta permiti pero pa e biaha aki e ta lag’e y despues lo bay repasa tarea cu ne. R. mes a skirbi e mensahe den su cellular pa e mucha lesa: “please no bisa ningun hende cu mi a mishi cu bo, mi a fia bo headphone tog? Fiscal ta haya cu tin suficiente prueba cu R. a mishi cu e mucha. Pa cu e castigo Fiscal a bisa cu e ta haya cu R. a tacha e integridad di e mucha. Tambe cu e no tin respet pa curpa di e mucha. Ta un hecho cu victimanan di actonan asina ta keda afecta. Fiscal a tene cuenta cu R. su situacion di salud. E ta haya cu R. a abusa di e confiansa cu e mama y e mucha mes tabatin den dje. Fiscal a exigi 90 dia di prison di cual 88 dia ta condicional y 3 aña di prueba. Ta asina cu R. no ta encarcela y e ta sigui duna bijles.
Abogado: mr. Mohamed a bisa Hues cu e incidente aki a sosode den algun seconde. E pregunta ta si tin prueba di sosten. E abogado a bisa cu den promer instante Polis ta kere e victima y a detene R. Door di su situacion di salud, el a keda 2 dia sera y despues a haya aresto na cas. E abogado a mustra e situacion na e localidad unda R. tabata sinta y unda e mucha tabata sinta. Na opinion di abogado, ta imposibel pa R. yega na e mucha.
E lo mester a hala tur e mesa y R. lo mester a move den su rolstoel pa yega na e mucha. E unico testigo tabata e ruman homber di e mucha y el a bisa cu e no a mira nada y no a ripara nada. E abogado ta haya riparabel cu e mucha ta bisa e mama cu no ta promer biaha cu esaki a sosode. E abogado a remarca cu si ta asina, e otro muchanan lo mester a ripara algo ora cu R. lo mester a hala e mesa. Na opinion di abogado, e motibo cu R. a mustra e mucha e mensahe riba su cellular ta pa e mucha no bay conta otro muchanan cu ta bay tuma bijles. E abogado a conclui cu no por prueba cu R. a mishi cu e mucha y pesey mester declara R. liber.
Fiscal a reacciona cu R. mes a declara cu e tabata sinta cerca di e mucha y e mucha tabata yanga su pianan cu tabata dal R. su pia. Esey ta mustra cu R. tabata sinta hopi cerca di e mucha.
Abogado a bisa Hues pa wak su cliente den rolstoel. Por mira unda su pianan ta y con e lo mester ta sinta. Ta hopi dificil pa e yega na e mucha su pia y mas ainda na su parti intimo.
Sentencia: Hues a sera tratamento di e caso y a dicta sentencia di biaha. Hues a bisa cu e ta haya legalmente proba cu R. a mishi cu e mucha. Hues a bisa cu no tin motibo di duda den declaracion di e mucha. E ta haya cu tin prueba di sosten entre otro cu e agentenan di Polis a bisa cu R. a bisa cu ora el a leun pa mira kico e mucha tabata haci, su man a mishi na e mucha su pia. Tambe e agentenan a mira e mucha ta yora, templa y nervioso.
Hues a sigui bisa cu R. mes a skirbi e mensahe pa e mucha lesa: “Please no bisa otronan cu a mishi cu ne. Mi a fia bo e headphone tog?’ R. mes a declara cu e mucha tabata sinta hopi cerca di dje cu e mucha su pianan tabata dal contra R. Hues ta haya loke R. a haci, un hecho serio. El a tene cuenta cu R. su situacion di salud. Hues a confirma exigencia di Fiscal. El a condena R. na 90 dia di prison di cual 88 dia ta condicional y 3 aña di prueba.
