Mientras cu Rudy Carti ta para riba cu e no a viola ni mishi cu pashentnan
ORANJESTAD (AAN): Diamars di mainta 8.30 te den oranan di merdia, Hof di Corte Superior, a dedica na tratamento di e apelacion di Rudy Carti contra su sentencia. Den sala di Corte tabata presente 2 di e victimanan y e señora di Rudy Carti. Rudy e biaha aki a bin acompaña cu abogado mr. H. Lejuez kende tabata acompaña pa Ricardo Croes.
Rudy Carti a desmenti categoricamente cu el a viola y mishi pashentnan cu el a masashi. Procurador General (PG) di su banda a mustra cu tin 8 acusacion contra Carti y cu Hues di Corte den Promer Instancia dia 8 October 2021 a haya Carti culpabel di 2 violacion y 2 mishimento na parti intimo.
Hues a declara Carti liber di algun caso di mishimento y un violacion. PG a bisa cu e ta apela contra e decision di dos di esnan cu Hues a declara liber di dje y ta bay di acuerdo pa declara Carti liber pa e otro dos.
VIOLACION Y MISHIMENTO
Hof a haci Carti un cantidad di pregunta riba e acusacionnan. Rudy Carti den forma extenso tabata splica e protocol di psychioterapista y con e tabata haci e masashinan. Tabatin caso cu el a splica cu ta imposibel cu e lo a hinca dede den parti intimo di paciente. Tambe el a bisa cu e no a mishi na parti intimo di ningun paciente.
Hof a mustra cu psicologo a mustra cu Carti posiblemente accidental lo a mishi na parti intimo di pacientenan pero no cu Carti a haci esaki intencional sexual.
VICTIMANAN A PAPIA
Tanto R. como F. a expresa nan disgusto pa ta mira Carti ta haci manera cu e no a haci nada. Nan ta agradecido cu awor nan a haya chens di papia. Tur dos a bisa cu nan ta sinti hopi malo di loke nan a pasa aden y awor ta recorda tur cos durante tratamento di e caso. F. a expresa cu e ta desea pa nunca mas Carti lo por pone man riba un hende.
PSICOLOGO
Hof a mustra cu segun psicologo, Carti tin dificultad di mira den otro persona con nan ta sinti. E ta haya cu Carti no ta mira cu e ta surpasa e limite y ta tira e culpa riba otro. Tambe e psicologo a mustra cu Carti a traha hopi duro y no tabatin contacto cu su pareha. Door di esey e falta di intimidad a bruha cu su gana di tin relacion y Carti lo tabata haci esaki cu paciente. E psicologo ta haya cu ta importante pa Carti haya guia di Reclassering y posiblemente guia di psicologo.
Carti a bisa Hof cu e no ta di acuerdo cu loke psicologo ta bisa. El a bisa cu e tabata den KIA 6 luna sera y a papia habri cu e psicologo di su situacion. E ta lamenta cu e psicologo ta usa esey pa pint’e asina.
PROCURADOR GENERAL
PG a bisa Hof cu entre 2012 y 2020, Carti a haci violacion y mishimento cu pacientenan cu a bay tuma tratamento serca dje. PG a bisa cu Ministerio Publico no ta di acuerdo cu e castigo y cu a declara Carti liber pa algun caso di mishimento y un caso di violacion.
PG ta haya cu mester destrui e sentencia di Core den Promer Instancia y dicta sentencia nobo. Na opinion di PG, den e caso aki por usa como prueba e mesun forma di actua di Carti pa e otro casonan, sin cu mester busca prueba di sosten. Ta trata aki di e forma di masashi di Carti, caminda e tabata mishi cu e damanan na partinan intimo. PG a bisa cu e declaracion di e victimanan tin hopi cosnan comun cu ta mustra cu ta e mesun forma di practica Carti tabata usa.
PG a cuestiona e declaracion liber di Hues pa e acusacionnan di mishi contra dos dama. Tur dos dama ta acusa Carti di a mishi na nan pecho, siendo cu nan a bay pa tratamento pa dolor di lomba parti abao. PG ta haya cu esey no ta cuadra y pesey ta haya cu mester considera nan como prueba.
DEMANDA DI VICTIMANAN
PG a bisa cu e dama R. a demanda algo mas di 54 mil florin cu ta un parti material y un parti inmaterial. El a pidi Hof pa confirma decision Corte cu ta algo mas di 7400 florin, Carti lo mester paga. Pa e dama F., PG a pidi Hof pa confirma e demanda di 5 mil florin. E dama J. a demanda 5600 florin pero a rechaza esaki pasobra a declara Carti liber. Awor cu PG si ta haya cu Carti ta culpabel, el a pidi Hof pa aproba 5 mil florin pa e dama J.
EXIGI PA SUBI CASTIGO
Pa loke ta e castigo, PG ta haya Carti culpable di 2 violacion y 4 mishimento y ta exigi 4 aña y 6 luna di prison. Tambe PG a exigi pa prohibi Carti pa durante 4 aña e no por eherce su profesion. Tambe PG a pidi pa detencion inmediato di Carti asina cu Hof dicta sentencia.
ABOGADO
Abogado mr. H. Lejuez a bisa Hof cu e ta haya cu no tabatin un investigacion completo. E abogado ta haya cu mester declara Carti liber di tur acusacion pasobra no tin suficiente prueba. E abogado a presenta un mapa grandi di henter e caso na Hof cu tur declaracionnan. Mr. Lejuez a bisa Hof cu den 37 aña como psychioterapista, Carti a trata mas di 100 paciente di AZV y ningun keho contra Carti.
UN AGENTE SO A HACI INTEROGACION
Mr. Lejuez a cuestiona e hecho cu hopi biaha ta 1 agente so tabata haci interogacion siendo cu segun regla mester tin 2 agente pa evita cu ta bay tin tumamento di parti.
CUESTIONA PONE POTRET DEN MEDIA
E abogado a menciona con 24ora ta publica cu Rudy Carti a wordo deteni pa inmoralidad. Esaki ta mustra cu ta un hende mester a pasa informacion. El a cuestiona e forma con a pone potret y nomber completo. E abogado a puntra si Ministerio Publico no por haci algo contra esaki. Aruba ta un pais chikito caminda tur hende conoce otro y publicacionnan asina ta afecta acusado.
A PALABRA PA DECLARA CONTRA CARTI
E abogado ta haya cu e denunciantenan tabatin contacto cu otro promer cu a bay haci denuncia y duna declaracion. Pesey e ta haya cu no por uza nan hunto como prueba manera PG ta pretende.
MASASHI
E abogado cu schema ariba un papel hopi grandi, a splica Hof con e masashinan tabata tuma lugar y unda e musculonan ta situa. El a splica cu tin biaha mester bay hopi serca na e parti intimo pa por alivia e paciente di dolor. E abogado a cuestiona e raport di psicologo cu ta pinta Carti malo siendo cu no ta asina. E abogado a bolbe bisa Hof cu den 37 aña, Carti a haci mas di 100 mil masashi via AZV y nunca tabatin keho contra Carti. Diripiente 8 dama ta haci denuncia cu Carti a mishi cu nan y hasta viola. Mr. Lejuez ta haya cu no tin suficiente prueba pa condena Carti. El a mustra cu Carti ta para riba cu e ta inocente.
Hof a sera tratamento di e caso y a bisa cu 2 October 2023 lo tin sentencia.
