Abogadonan a pidi pa scucha testigonan
ORANJESTAD (AAN): Diamars atardi a cuminsa cu e caso apelacion sentencianan caso Avestruz. E acusadonan cu a apela nan sentencia ta: Maria Leoncita Arends, Edgar Werleman, Oslin Benny Sevinger, Pieter Susebeek, Carlo Mansur, Ninosca Nuñez, Curt Harms. E caso tabata un pro forma caminda e abogadonan por a haci peticion pa investigacion cu nan lo ta desea.
NINGUN ACUSADO A PRESENTA
Diamars atardi, ningun di e sospechosonan a presenta. Ta solamente e abogadonan a presenta y algun di e abogadonan a haci peticion pa investigacion.
SEVINGER
Mr. Illes y mr. Kock di Sevinger a pidi Hof pa scucha 4 testigo Every, Hans Sjiem Fat, Isabel Dammers, Richard Bargues, Albert Fawler y Lionel Harms. Mr. Illes a bisa Hof cu Bargues y Fawler ta amigo di Susebeek kendenan sa mas di e cumpramentto di e gym pa Sevinger. E abogado a bisa cu ningun momento e tabata un regalo pa Sevinger. E abogado a bisa cu Lionel Harms a acerca Susebeek pa cumpra e tereno. Esey por splica cu no por acusa Susebeek di labamento di placa. El a sigui bisa cu mr. Sjiem Fat y Dammers tabata encarga den negociacionnan den proyecto cu Sevinger ta envolvi. Every lo por bisa un ke otro tocante tickets cu Benny Sevinger a usa pa viaha. Segun mr. Illes, Every, kende ta e president di Stichting Curazon Berde, lo por bisa mas di placanan cu Sevinger a hinca den stichting.
HARMS
Mr. Carlo kier pa scucha Benny Sevinger como testigo. Abogado mr. Carlo a bisa cu kier haci Sevinger mas pregunta riba proyecto di Gobierno caminda Harms a yuda. Tambe e kier pa scucha Lionel Harms pa e splica pakico e donacionnan cu a haci na Sevinger.
NUÑEZ Y WERLEMAN
Mr. Oomen a pidi pa scucha notaris Johnson. El a bisa cu Fiscal a opone caba den Promer Instancia. E abogado a bisa cu e kier demostra cu Nuñez y Werleman no a gaña Gobierno. El a bisa cu Johnson tabata envolvi den e proyectonan cu a bende. A haci traspaso di terenonan. E abogado a bisa Hof cu notario Johnson ta conoci pa hopi aña ta haci traspaso di terenonan. E lo por duna splicacion amplio. E abogado a bisa cu e no ta kere cu Johnson mester bay haci uso di secreto di profesion.
CASO AVESTRUZ NA MEI 2024
Hof a bay pensa un rato y a bolbe. A keda dicidi cu otro siman Diaranzon 20 September pa 2’or di merdia via video conference lo scucha reaccion di Fiscal y reaccion di abogado riba e peticionnan. Despues Hof lo tuma decision riba e peticionnan.
Hof a propone 13,14, 15, 16, 17 Mei 2024 pa tratamento di e caso.
