Corte di Casacion a dicidi
ORANJESTAD (AAN): Siman pasa, Corte di Casacion na Hulanda a atende un caso hopi interesante cu a sosode na tera frieu. Un homber kende a mata su muhe y cu a wordo declara di no ta bon di cabes door di Corte di Prome Instancia, awor no por reclama herencia di su casa den e circunstancianan special di e caso aki. Esey ta loke Corte di Casacion a dicidi na Hulanda.
E homber y muhe tabata casa. E homber a mata e muhe, y a bin sali na cla cu e muhe no tabatin un testament traha y no tabatin yiu, y pesey segun ley, e homber ta e unico heredero di e muhe.
Un persona cu a wordo condena irevocablemente pa kita bida di e defunto, segun ley “no ta digno” pa hereda segun ley (Articulo 4:3 di Codigo Civil). Den caso asina, e persona no tin derecho pa ta heredero.
Den e caso aki, Corte di Prome Instancia a declara cu tin prueba cu e homber intencionalmente a mata e muher, pero tambe a considera cu e homber no ta castigabel pasobra e ta completamente loco debi na un psicosis. E homber no a ricibi castigo di prison, sino tratamento di TBS cu tratamento obligatorio den un instituto.
E homber despues a haci peticion pa e bira heredero di e muhe. Den e caso civil ey, e ruman di e muhe a pidi Corte pa declara cu e homber no ta digno di hereda esaki, y cu ta inaceptabel pa e ta heredero di e muhe cu el a mata.
Corte Civil a bisa cu ta OK pa e homber bira heredero, pasobra e no a wordo condena cu castigo di prison, pero djis a wordo declara loco. Tambe a duna OK pa e homber bira heredero.
Sinembargo Corte di Casacion a dicta net lo contrario, bisando cu e homber no ta digno pa hereda loke e muhe a laga atras, pasobra Corte a declara e homber como loco. Tambe a haya inaceptabel cu e asesino ta bira heredero. Nan a basa e aspecto legal aki riba ser digno, via Articulo 8 di Convenio Europeo di Derechonan Humano (EVRM). Esaki ta stipula cu mester proteha bida familiar di tur persona.
