ORANJESTAD (AAN): Diaranson mainta Hues di Corte den Promer Instancia a haya e homber O. culpable di a abuso di e mucha muher cu e tabata su padrastro.
E sentencia tabata via video conference caminda O. tabata den un oficina na KIA hunto cu e traductor di Corte y cuidador di preso. Den sala di Corte tabata presente Hues, Fiscal, mama di O., e partner di O., kende su yiu muher ta e victima.
FISCAL
Algun siman pasa tratamento di e caso aki a sosode den sala di Corte caminda e momento ey e acusado O. tabata presente. Fiscal a bisa Hues cu e ta haya legalmente proba cu O. a haci actonan inmoral cu un mucha muher.
ACUSADO A ADMITI
Den e caso aki O. a admiti tur cos y no mester di prueba di sosten ya cu e declaracion di e victima ta wordo confirma pa O. Mama di e mucha a declara cu na Maart 2020, O. a bay bolbe cerca e mama. Na dado momento na Februari 2021 e yiu muher di e mama a bisa cu O. lo a mishi cun’e. E momento ey O. a desmenti categoricamente. Dos dia despues O. na yoramento a bisa e mama loke el a haci. O. a admiti di a haci malo.
TIRA CULPA RIBA E VICTIMA
Fiscal a bisa cu segun declaracion di O., e mucha lo a drenta baño y a bay mishi cu su parti intimo. Despues tabata un dia riba cama, e mucha a bay drumi banda di dje y cuminsa mishi cu su parti intimo. E mucha lo a pidi O. pa mishi cun’e. Fiscal ta haya cu O. ta tira culpa riba e mucha siendo cu O. sa masha bon cu e mester a hala e mucha su atencion.
Segun Fiscal, O. a abusa di e confianza cu e mama y su yiu tabatin den dje. Na opinion di Fiscal, parce cu O. no ta realisa ki daño el a causa na e mucha.
EXIGI CASTIGO
Pa cu e castigo, Fiscal a tene cuenta cu e raport di psicologo y Reclassering. E raportnan ta mustra cu O. mester di ayudo y guia. Fiscal a tene cuenta cu ta promer biaha cu O. a haci esaki.
Tambe Fiscal tambe a tene cuenta cu desde aña pasa a aumenta castigo pa casonan di inmoralidad. El a exigi 3 aña di prison di cual 6 luna ta condicional cu 3 aña di prueba. Hunto cu esaki cu Fiscal a pone e condicion special cu O. mester cay bou guia di Reclassering.
SENTENCIA
Diaranson mainta via video conference, Hues a bisa cu e ta haya legalmente proba cu O. a abusa di e mucha bao di 16 aña. E tabata padrastro di e mucha. Hues a tene cuenta cu seriedad di e caso. El a mustra cu e mucha e tempo ey tabatin 9 aña y tabata forma parti di e famia. Hues ta haya cu O. a tacha integridad di e mucha y cu esaki por afecta e mucha pa resto di su bida. E hecho cu O. tabata usa marihuana no ta un motibo pa tene cuenta cun’e.
Hues a sigui bisa cu e ta tene cuenta cu e raport di psicologo cu no ta considera O. pedofile. E psicologo a mustra cu door di tension, O. tabata usa marihuana cual tabata influencia su deseo sexual.
Hues a condena O. na 30 luna di prison di cual 6 luna ta condicional cu 3 aña di prueba. E tempo di prueba ta bou guia di Reclassering caminda O. mester sigui tur e indicacionnan cu Reclassering ta haya cu ta bon.
