Mientras cu Procurador General ta haya cu tin prueba - ORANJESTAD (AAN): Diamars merdia te den oranan di atardi, Hof di Corte Superior a atende e
ultimo parti di tratamento di e apelacion caso IBIS. Diamars tardi Procurador General (PG) a hiba palabra riba e investigacion financiero contra Melony Croes Paesch y abogado mr. Illes a hiba defensa .
TABATIN FAYO DEN INVESTIGACION
Den combersacion cu abogado mr. Illes el a splica cu den e intercambio di cartanan entre abogado mr. Illes y PG relaciona cu e rapport di accountant, PG a mustra cu enberdad tabatin fayo haci. Di e 209 mil florin a baha esaki cu 100 mil florin. Awor ta papia di 111 mil florin. Esey tabata e raport cu na ultimo ora mr. Illes a presenta den Corte cu e expertonan accountant cu a mustra den Corte fayonan cu a haci den un investigacion financiero di parti Ministerio Publico.
PG TA HAYA CU TIN LABAMENTO DI PLACA
PG a bisa Hof cu a keda proba labamento di placa di mas cu 209 mil florin di Melony su negoshi. For di investigacion financiero a constata cu e circulacion di placanan ta dudoso. Mustra cu Melony mes a declara cu e no sa con e calculacion di placanan ta sosode. E ta manda su recibonan pa su accountant. Segun PG a base di e accountant a haci investigacion y a constata mas di 209 mil florin di mas. E ta gasta mas cu loke tin di entrada. Mustra cu den Promer Instancia, Melony a bisa cu e ta di acuerdo cu e investigacionnan haci.
PG ta haya cu e investigacion di accountant riba negoshi di Croes Paesch no ta relevante pa e caso. El a señala cu tin sumanan ta mustra cu no ta normal pa un negoshi tin gastonan asina halto compara cu entrada abao. Esey ta net den temporada cu Paul Croes tabata minister.
PG ta menciona cu e suma ta algo mas di 111 mil florin. PG tabata menciona reaccion di e investigadornan financiero riba e raport di e accountant di Croes Paesch. Na opinion di PG e rapport no ta corecto. No por verifica e sumanan cu ta menciona. El a menciona cu Croes Paesch lo tabata haya placa for di circulo criminal. Ta purba pinta un situacion financiero sin cu por verifica esaki. Esey ta wordo considera labamento di placa.
PG a conclui cu Croes Paesch tabatin sumanan grandi cu no por splica. Mas cu 209 mil florin di mas cu loke e administracion ta mustra. Esey ta crea sospecho di labamento di placa.
NO TIN PLACANAN CRIMINAL
Abogado mr. Illes a bisa Hof cu PG ta acusa su cliente Croes Paesch cu a laba 209 mil florin. Paesch ta desmenti di a laba placa manera PG ta pretende.
E abogado a mustra Hof cu investigacion cu Belasting a haci den Corte a keda dicidi cu no tin indicacion di labamento di placa. Mr. Illes ta haya cu Croes Paesch a duna splicacion riba entradanan y cu tin entradanan legal cu por verifica. Pesey a laga traha un raport di accountant.
FAYO DI MINISTERIO PUBLICO
Na opinion di mr. Illes, investigacion di accountant ta mustra cu tabatin fayo di Ministerio Publico den calculacionnan. Door di esey Ministerio Publico a admiti di a haci fayo y a baha di 209 mil florin na 111 mil florin. PG ta pretende cu Paesch no a haya ganashi manera e ta mustra. E abogado a bisa cu e negoshi tabata drei riba demanda y tabata bende telanan cu a crea ganashi. E 111 mil florin cu PG ta pretende di ta laba placa ta pasobra segun PG, e negoshi di Paesch no por a produci e suma aki. E abogado a para riba cu e negoshi tabatin entradanan for di fuentenan legal y no por papia di labamento di placa. E ta haya cu PG mester demostra cu e placanan ta di fuentenan criminal, cual e no por a haci. E administracion di Paesch ta mustra bon cla cu e placanan no ta procedente di fuentenan criminal. No tin ningun prueba cu Paul Croes a injecta placa den negoshi di Paesch, manera PG ta pretende. E abogado a enfatisa cu Paesch ta para riba cu e no a laba placa y a pidi Hof pa declar’e liber.
Hof a sera tratamento di caso IBIS y a bisa cu 12 October 2021 pa 1.30 via video conference lo dicta sentencia.
