ORANJESTAD (AAN): Corte den Promer Instancia a dicta sentencia den e caso di tiramento na San Nicolas cu a sosode 21 Februari 2021,
caminda un persona a resulta herida na su pia. E tres acusadonan G.V.F., su ruman homber G.F. y e homber C.A.R. via video conference a scucha nan sentencia.
Door cu e homber G.V.F. tin problema cu su ruman homber G.F. y C.A.R., mester a haci e sentencianan separa. Den un oficina na KIA tabata G.V.F., mientras cu den un otro oficina tabata G.F. y C.A.R.
E traductor di Corte cu tabata na KIA pa traduci e sentencia, mester a cana di un oficina pa e otro.
EXIGENCIA DI FISCAL
Algun siman pasa tratamento di e caso a tuma lugar den Corte caminda e acusadonan tabata presente. Fiscal a bisa cu e ta haya legalmente proba cu G.V.F. a tira. B. riba 21 Februari 2021. Ta asina cu G.V.F. ta wordo yama (Baas). Fiscal a mustra cu e dama K. a bisa cu Baas a saca arma riba dje y primi dos biaha y despues a tira B. Otro testigo a bisa cu G.F. tambe tabatin un arma. Polis a haya e 3 armanan pero un revolver no ta funciona. Tambe a haya e 17 balanan. Tambe Polis a haya 0.5 gram di cocaina cu ta di C.A.R.
INTENTO DI MATA
Fiscal ta considera cu G.V.F. a purba mata B. door di tira riba B. Na opinion di Fiscal, tira cu un arma riba un persona, ta un riesgo di mata. B. a sufri herida severo. Fiscal ta haya cu G.F. y C.A.R. tabatin arma den nan poder. Nan tabata sa di e armanan cu tabata den saco di plastic. Haya cu C.A.R. no tabata sa di e di 3 arma.
Fiscal ta haya G.V.F. y G.F. responsabel pa 3 arma. E ta lamenta cu B. no a presenta pa splica su demandanan hopi halto. Ta un hecho cu B. a sufri daño y ta haya cu mihor B. haci un caso civil.
El a pidi Hues pa declara e demanda di daño material no admisibel. Pa loke ta daño inmaterial Fiscal ta calcula esaki na 8 mil florin y e resto mester declara no admisibel. Tambe Fiscal a pidi pa medida di pago y pa e armanan, bala y droga wordo destrui.
Fiscal a exigi pa C.A.R. 30 luna di prison, di cual 15 luna ta condicional cu un tempo di prueba di 3 aña. Pa G.F. el a exigi 40 luna di prison di cual 20 luna ta condicional cu 3 aña di prueba. Pa G.V.F. el a exigi 8 aña di prison.
SENTENCIA
Hues a cuminsa cu G.F.V. caminda el a bisa cu no a keda proba e menaza cu arma y ta declar’e liber pa e acusacion aki. Hues ta haya G.F.V. culpable di riba 21 Februari 2021, a tira riba B. Tambe Hues ta haya G.F.V. culpable cu entre Februari y Maart 2021 e tabatin 3 arma di candela y 17 bala.
Hues a remarca cu e hecho cu G.F.V. a saca arma y tira, sin tin conocemento di tira, ta haci cu e por a mata B. Hues ta haya esaki intento di mata y complice di posecion di arma di candela y balanan. Hues a bisa cu pa cu e castigo e ta tene cuenta cu seriedad di e caso. El a bisa cu door di tira a crea sentimento di inseguridad y miedo den comunidad. Hues a condena G.V.F. na 7 aña di prison, kitando e tempo cu e tabata sera den KIA.
E armanan y balanan lo wordo destrui. Pa loke ta demanda di daño total 50 mil florin, Fiscal a pidi pa aproba 8 mil florin. Hues ta haya cu e demanda no a wordo argumento. El a declara esaki no admisibel. Pa loke ta e parti inmaterial, Hues a calcula na 2500 florin y e resto ta declara no admisibel.
Despues a sigui cu G.F. y C.A.R. Hues a bisa cu a keda legalmente proba posecion di armanan di candela y 17 bala. Hues a declara G.F. liber di complice di intento mata. C.A.R. tambe tabatin un cantidad di cocaina cun’e.
Hues a tene cuenta cu G.F. den pasado a wordo condena caba pa arma. El a condena G.F. na 24 luna di prison di cual 8 luna ta condicional y 2 aña di prueba. Hues a condena C.A.R. na 18 luna di prison di cual 6 luna ta condicional cu 2 aña di prueba.
