Caso 'Apollo' bayendo next-level --- ORANJESTAD (AAN): Manera ta conoci, tabata na luna di April 2021 cu diripiente Ministerio Publico a divulga cu nan a cuminza traha bek riba e famoso caso di liquidacion di e periodista di television John Anthony ‘Poentje’ Castro.
Poentje Castro di 47 aña di edad, a sali di su cas e anochi di Diaranson 22 di December 2010 pa cana den su cura y a bay na e entrada di su garage unda su auto ta staciona. Aki un persona riba motorcycle a tire mata. No ta conoci si el a tende boroto pafo y e mes a bay check, of si acaso un hende a yame pa sali pafo.
El a keda henter anochi y e madruga di Diahuebs 23 di December benta eybao, y te mainta el a wordo descubri. Alarma a ser bati y mesora a seya Apollostraat.
E tempo ey e sistema di BlackBerry tabata popular, y hasta e smartphone ey a wordo manda Hulanda pa investigacion forensico.
Pa su conocemento relaciona cu e mundo di auto y desaroyo tecnologico di motornan en general, el a haya trabao di un persona cu tabata taxateur pa daño di vehiculonan envolvi den accident.
Nuebe aña largo Poentje Castro a carga e show di TV cu yama “Un Dia Den Bida”, cu tabata un showcase intimo di varios persona local cu di un angulo diferente tabata pone spotlight riba nan bida, nan trabao, y nan logronan.
Desde su asesinato, sigur como 1.001 hipotesis a ser presenta for di tur skina riba loke a socede. Teorianan di e.o. revancha, asunto di amor, debe atrasa, y djis rabia. E tempo ey no tabata existi asina hopi security camera na casnan manera ta e caso awor. Pero si e bisiñanan ta corda cu e brommer a sona duro y a yega na e cas.
COLD-CASE: Na April 2021, un team di Cuerpo Policial di Aruba, riba peticion di Ministerio Publico, a traha riba un revision (review) di e investigacion aki cu ta carga e nomber di “Apollo”.
E revision a hiba na puntonan di referencia concreto pa mas investigacion, a base di cual a keda dicidi pa start e investigacion di nobo.
Desde April 2021, nan a traha cu dedicacion na activamente scucha testigonan cu por aporta na soluciona e caso ‘cold case’ aki. Ademas Cuerpo Policial di Aruba y Ministerio Publico tabata convenci cu tin hende cu tin conocimento di e caso, pero cu te ainda no a papia nada.
September cu detencion: Sinembargo na luna di September 2021 net exactamente 3.911 dia despues cu a tire mata na su cas den Apollostraat, Ministerio Publico a anuncia cu nan a detene un persona.
Esaki a bin cu den e periodo prome, e team di investigadornan a traha cu dedicacion na activamente scucha testigonan cu por aporta na soluciona e caso.
DETENCION A CAY:
Dialuna mainta 6 di September 2021, Ministerio Publico a emiti un boletin pa splica cu detencion a cay den investigacion di asesinato di Poentje Castro. E team investigativo a haci e prome detencion e mainta ey den investigacion di asesinato di Poentje Castro. Cu esaki e team ta considera di a detene un persona cu tabatin envolvimento den e asesinato.
Mientras tanto un detencion a cay, y hopi hende a keda contento cu Aruba a haya un Procurador General nobo, esta mr. Boot ter Steege, cu a mira e importancia pa saca e cold-case aki for di cashi y bolbe dune un revision, y pa prome biaha den historia di e caso aki, un hende a keda deteni pa cu e caso di asesinato.
Ministerio Publico a indica cu e sospechoso lo wordo presenta otro siman Diabierna na forma ‘pro-forma’ dilanti Huez.
“Riba diabierna 17 di december venidero e caso contra e sospechoso A.J.R. lo wordo trata pro-forma den Corte den Prome Instancia. E homber R. ta wordo sospecha di asesinato di e conocido John A. ‘Poentje’ Castro riba 23 di december 2010.
Siman pasa huez-comisario a duna ordo pa alarga detencion di e sospechoso en cuestion.
