E tabata e chofer cu a hiba e asaltantenan --- ORANJESTAD (AAN): E homber S.W. a scucha Fiscal exigi 4 aña di prison di cual 6 luna ta condicional pa ta complice den e asalto arma riba dos homber den un auto.
Tabatin un otro acusacion di atraco cu violencia contra S.W., pero Fiscal a pidi Hues pa declara S.W. liber di esaki pasobra e no ta haya cu tin suficiente prueba.
E acusacionnan cu Fiscal a presenta den sala di Corte contra S.W. ta: (*) Atraco cu violencia riba 4 Februari 2021 riba un homber. (*) Entre 3 Februari y 2 Juni 2021 e tabatin dos smartphone iPhone cu a worde horta for di un homber. (*) Dia 22 Mei 2021 na Brazil hunto cu otronan, a haci un asalto arma riba dos persona, caminda a bay cu placa y hasta e auto.
Segun S.W. e no a horta e smartphonenan. El a bisa Hues cu un amigo di dje M. el a bende un iPhone pero keda debe. E amigo ey a bin cerca dje y bis’e si dun’e 500 Florin extra e lo haya iPhone 12. S.W. a bay di acuerdo. Despues S.W. a bende e iPhone pa 1400 Florin pa e drecha cosnan riba su auto. El a desmenti di tabatin dos iPhone.
ATRACO: Hues a mustra cu e homber v.d L. a splica cu el a pone dos iPhone nobo pa bende. El a haya reaccion y a bay na e lugar pa topa cu esun interesa pa cumpra nan. Un homber di color a bay cerca dje y a pidi pa wak e smartphonenan iPhone.
Despues e persona a saca arma p’e y v.d.L. a dun’e tur dos smartphone. Un smartphone tabata color preto y e otro color cora. Polis a bay investigacion y cuater dia despues a haya S.W. ta papia via e smartphone horta. Segun S.W., el a cumpra e iPhone color cora for di M. y no tabata sospecha cu e iPhone tabata horta. Despues el a bende esaki cu un otro persona.
ASALTO ARMA: Hues a mustra cu e homber T., a haci denuncia di asalto arma. El a bisa cu dia 24 Mei 2021 a worde asalta cu su amigo C. Nan tabata den auto y un auto Nissan March a pega su tras. Ta asina cu S.W. tabata core e auto y a bisa cu el a para tras di e auto. Segun T. 5 pa 6 homber cu cara tapa a sali for di auto y bin riba e auto.
Tres a bay riba T. y e otro tres a bay riba C. Nan tabata grita pa placa y tres di nan tabatin arma di candela. Nan a bisa pa sali for di auto. T. a habri porta y un di nan a dal’e na su nanishi. Nan listra na su paña y bay cu su smartphone y cartera. Despues un di nan a bay cu su auto Tercel y e otronan a bay den e auto Nissan March.
Hues a bisa cu investigacion di Polis ta mustra cu via camera di seguridad a mira cu e auto tabata para banda di e banco matico ora cu T. a bay pa lanta placa. Polis a haya e Nissan March tapa scondi y a haya e auto Toyota Tercel scondi den mondi. Relaciona cu esaki Polis a detene tur esnan envolvi. Un di nan a bisa cu nan tabata 4 y un tal Mando a bin cu e idea pa haci e asalto arma riba T. E tabata sa cu e dia ey T. lo haya placa di pensioen. S.W. tabata stuur y nan a bay den San Nicolas y mira T. ta conta placa banda di banco matico. Nan a sigui T. te ora el a yega na su cas. S.W. a keda den e auto, mientras cu 4 a baha y haci e asalto arma.
S.W. a bisa cu nan a bay busk’e na su cas y pidi’e pa core pasobra e tin rijbewijs. El a bisa cu Mando a bis’e cu ta bay cobra T. placa cu debe y si e haya e placa, e lo duna S.W. 25 Florin. Segun S.W., Mando a bisa cu T. debe 350 Florin.
Hues a lesa declaracion di e otronan y por compronde cu tabatin un plan pa haci asalto arma. Un di nan tabatin un Glock, un otro un machete, un cu bate di baseball y un otro un cuchiu. Tin cu a bisa cu no a forza S.W. pa haci e asalto. Hues a mustra cu S.W. a declara na Polis cu na cas di un di esnan den auto a planea pa haci asalto. Mando a mira cu T. tabata conta placa y asina a sigui su tras. Esun cu tabatin e arma di candela, a dal T. cu esaki den su cara.
Hues a bisa cu Reclasering ta recomenda castigo combina y guia di Reclasering pa cambia S.W. su forma di pensa pa e no bolbe cay den mal amistadnan.
FISCAL: Fiscal a bisa Hues cu no tin suficiente prueba cu S.W. a haci atraco riba e homber cu e smartphonenan iPhone. Na opinion di Fiscal, S.W. tabatin e smartphone despues di algun dia. E homber no a reconoce S.W. como e atracador. Fiscal a pidi Hues pa declara S.W. liber pa atraco. Fiscal ta haya S.W. ta culpable di cumpra iPhone horta.
Pa loke ta e asalto arma na Brazil riba e hombernan T. y C., Fiscal ta haya cu S.W. ta complice. El a bisa Hues cu e otro 4 sospechosonan a declara cu S.W. tabata sa di e asalto arma y no a oblig’e pa participa. Fiscal a mustra cu S.W. a admiti di a haci e asalto arma hunto cu e otro 4 sospechosonan. Nan tabata sigui T. y ora el a yega su cas a haci e asalto arma. E otronan ta bisa cu S.W. a haya parti di e placa cu a haya.
Fiscal a bisa Hues cu tin hende ta keda den trauma ora nan bira victima di asalto arma. El a bisa cu asalto arma ta causa inseguridad den comunidad y ta por afecta nos turismo di cual Aruba ta depende hopi ariba. E asalto arma a sosode den cura di cas di T.
Fiscal a exigi 4 aña di prison di cual 6 luna ta condicional cu 2 añ di prueba y bou guia di Reclasering.
ABOGADO: Abogado mr. Edwards a bisa Hues cu e ta comparti opinion di Fiscal cu S.W. no a haci e atraco riba iPhone. E doño di e smartphonenan iPhone no a reconoce S.W. como esun cu a atrak’e. El a bisa cu e ta referi na opinion di Hues si por papia di incubrimento. Pa loke ta caso di asalto arma na Brazil, segun mr. Edwards, S.W. a bisa cu el a worde presiona pa a haci e asalto arma.
Reclasering a splica pakico S.W. a cay den e gara di e grupo pa haci e asalto arma. E raport di Reclasering ta mustra con S.W. a worde presiona cu el a participa na e asalto arma. E abogado a mustra cu S.W. a bisa na Polis cu el a kere cu nan tabata bay cobra placa y cu door cu e tabatin rijbewijs e tabata core auto. E no tabata di acuerdo e forma con a haci e asalto arma. El a keda sinta den e auto y no a participa den e asalto arma. Segun e abogado, S.W. no a haya nada di e asalto arma.
El a pidi Hues pa tene cuenta cu e raport di Reclasering cu ta mustra cu mester guia S.W. pa e no worde usa mas. E abogado a bisa Hues cu e ta haya e castigo mucho halto. E ta haya cu 1 aña di prison cu un parti condicional lo ta un castigo husto.
Hues a sera tratamento di e caso y a bisa cu dia 23 December 2021, lo tin sentencia.
