ORANJESTAD (AAN): Diamars mainta Hues a dicta sentencia den e caso penal cu Ministerio Publico a cuminsa contra e damanan Colombiano C.B. (Mami),
su prima M.P. y e homber H.F. Tur ta wordo acusa di traficacion di damanan di Colombia pa Aruba. Hues a haya nan tur culpable y a confirma e exigencia di Fiscal solamente pa e homber H.F.
EXIGENCIA FISCAL: Na November 2021, tratamento di e caso a tuma lugar, caminda Hues a bay hopi extenso riba e investigacion cu basicamente a kibra henter un operacion cu tabata andando pa trece damanan Colombiano ilegal Aruba y laga nan traha den e bar di Mami. Fiscal ta haya legalmente proba cu C.B.(Mami) a regla pa 12 dama di Colombia drenta Aruba y keda traha ilegal. Tambe cu e prima di Mami, M.P. a yuda den esaki. Fiscal ta haya e homber H.F. a yuda Mami den su plan pa laga ilegalnan drenta, door di duna nan placa pa asina demostra na Inmigracion cu nan tin placa pa estadia.
Fiscal a exigi 2 aña di prison pa Mami, 15 luna di prison pa M.P. y 3 luna di prison pa H.F. Tambe el a exigi pa H.F. 120 ora di trabao comunitario y si e no cumpli cu esaki, e lo mester bay 60 dia sera den KIA.
SENTENCIA: Diamars via video conference Hues a dicta sentencia, caminda Hues, Fiscal y abogadonan tabata den sala di Corte, mientras cu Mami y M.P. tabata den un oficina na KIA. E homber H.F. ta liber y a presenta den Corte pa scucha su sentencia.
Hues a cuminsa cu H.F. y a bisa cu e ta haya legalmente proba cu H.F. a duna e damanan placa cu excepcion di e dama M.B. pasobra Inmigracion no a pidi M.B. pa mustra cu e tin placa. Na opinion di Hues, den otro 7 caso y hunto cu otronan, H.F. a yuda muhernan extranhero drenta Aruba, siendo cu e tabata sa cu esey no por. Hues a bisa cu H.F. tabata duna e damanan placa scondi den aeropuerto pa nan por mustra na Inmigracion. Despues nan mester duna e placa bek. Nan intension tabata pa nan keda Aruba y no vacacion manera nan ta laga mustra.
Hues a sigui bisa cu e ta haya legalmente proba cu e dama M.P. ta complice di traficacion di hende pero cu excepcion di 5 dama. Na opinion di Hues, den otro 5 caso, M.P. a yuda damanan extranhero drenta Aruba, siendo cu M.P. tabata sa cu nan no por a drenta Aruba. Hues a mustra cu M.P. tabatin contacto telefonico cu e damanan pa splica nan kico pa haci. A regla pasashi y estadia den hotel, sabiendo cu nan lo no keda den hotel y lo keda Aruba. Hues ta haya M.P. complice di traficacion di hende. El a bisa cu e funcion di M.P. tabata significante pa e traficacion di hende. Hues no ta haya proba cu M.P. a haci esaki pa haya ganashi di e damanan cu lo a keda na su cas. Tampoco Hues ta haya proba cu M.P. tabata envolvi den e traficacion di dos dama den boto pa Aruba.
Pa loke ta C.B. (Mami), Hues a bisa cu e ta haya legalmente proba cu Mami a yuda tur 9 dama extranhero drenta Aruba, siendo cu e tabata sa cu nan no por ta na Aruba. Hues a mustra cu Mami tabata duna H.F. placa pa duna e damanan na aeropuerto pa mustra na Inmigracion. Promer cu e damanan yega Aruba, Mami tabata duna informacion via telefoon kico nan tabatin cu haci. Hues a sigui bisa cu Mami tabata haci reservacion na hotel y cumpra ticket pa e damanan bin Aruba, sabiendo cu nan no lo keda den hotel y cu nan lo bay keda den cas di Mami caminda nan mester paga. Hues ta di opinion cu Mami a yuda e damanan pa asina e haya ganashi door di huur lugar cu nan, siendo cu e sa cu nan no tin permiso pa ta na Aruba.
Hues ta haya cu tanto Mami, M.P. como H.F. a tuma un costumber pa laga hende ilegal drenta Aruba. Hues tambe a mustra cu Mami tabata e cabezante.
CASTIGO: Pa cu castigo, Hues a bisa cu e ta tene cuenta cu ta casonan serio. Ta trata di traficacion di hende. Esaki no solamente ta viola e maneho di Gobierno pa cu combatimento di estadia ilegal y entrada di extranhero ilegal na Aruba. Tambe e ta contribui na un circuito ilegal na Aruba pa cual e comunidad ta keda frustra y corumpi. Hues a tene cuenta cu sentencia di Hof den casonan similar.
Hues a confirma exigencia di Fiscal pa H.F. El a condena H.F. na 3 luna di prison kitando e tempo cu e tabata sera. Tambe Hues a condena H.F. na 120 ora di trabao pa comunidad y si e no cumpli cu esaki e lo mester bay 60 dia sera.
Hues a condena M.P. na 10 luna di prison, kitando e tempo cu e ta sera den KIA.
Hues a condena C.B. (Mami) na 18 luna di prison, kitando e tempo cu e ta sera den KIA.
