A manda busca Psychiater di Hulanda pa yuda evalua casonan di asesinato
ORANJESTAD (AAN): E siman aki lo ta na Aruba un psychiater di Hulanda, kende a bin specialmente pa yuda e sistema hudicial di e isla. E ta bin pa traha raport di dos sospechoso, ambos den dos caso lamentable di asesinato cu arma di candela.
E motibo cu e psychiater aki ta na Aruba ta pasobra tin dos keho di Hues di Corte riba e raport di psychiater cu ta laga di desea riba dos sospechoso. DIARIO por a compronde cu e psychiater Hulandes sa bin mas biaha Curacao y Aruba y ta specialisa den casonan di asesinato.
Keho riba psychiater: Den un periodo di 1 siman, dos Hues a expresa nan disgusto riba e raport di psychiater.
Un di e Huesnan ta haya cu e raport no ta duna suficiente informacion di e sospechoso, pa asina Hues por tuma un decision corecto. E otro Hues a cuestiona e hecho cu ainda no tin un psychiater disponible pa evalua e sospechoso.
Rapport no ta completo: E promer keho tabata 8 Juli 2022 caminda Hues a tuma un decision mas tempran den e lamentable caso di tira mata e dama Shayuri (19) riba 4 Juni 2021, caminda e sospechoso principal ta Izak Principaal.
Hues a mustra cu evaluando e caso, el a constata cu e raport di psicologo ta mustra cu Izak no ta responsabel pa su actonan. Hues ta haya bon motiva di psicologo cu mester aplica ley di adulto y pone Izak na disposicion di Gobierno (TBS).
Sinembargo, Hues ta mustra cu psychiater su evaluacion ta laga na desea. Psychiater ta haya Izak culpable pasobra ta e mes a bay haci’e. Hues no ta haya esaki suficiente splica. Tampoco Hues ta haya suficiente splica e conclusion di psychiater.
Ningun psychiater pa evalua: E di dos keho tabata 14 Juli 2022, den e lamentable caso caminda Jason Mathilda a tira su tata E. Mathilda mata riba 13 December 2021.
E caso aki a worde posponi un biaha caba, pasobra no tabatin un raport di psychiater. Hues 14 Juli 2022 a bisa cu ainda no tin un psychiater.
Psychiater di Hulanda pa evalua sospechosonan: Hues a bisa cu e por a compronde cu otro siman, o sea e siman aki, lo bin un psychiater di Hulanda cu lo bay evalua e casonan. E tin hopi experiencia riba e tereno aki. E psychiater sa viaha mas biaha pa Antiyas Hulandes y Aruba.
Cu esaki ta trece un solucion pa e dos casonan aki, caminda Corte di Husticia di Aruba no ta contento cu e raport cu psychiater a traha.
