Corte Superior a impone pa kita placa di criminalnan di droga
ORANJESTAD (AAN): Riba Dialuna, Corte Superior di Husticia a dicta den dos caso di confiscamento (‘ontneming’) contra cuatro persona, kendenan un tempo pasa a worde condena relaciona cu participacion na dos organizacion criminal di traficacion di droga.
E condenanan tabata trata e asina yama Caso Domino, den cual e sospechosonan L.E.M. y H.R.M.O a worde sentencia pa 7 aña di prison, y e Caso Shakur, den cual C.P.B. y R.G. a worde sentencia pa 5 y 6 aña di prison.
Riba peticion di Ministerio Publico, Corte Superior a impone e obligacion riba e personanan sentencia pa paga na Pais Aruba e ventaha obteni ilegalmente di en total 1.900.000 Florin. E beslag cu tin poni riba cuentanan bancario na Hulanda y Curaçao y varios real estate lo worde likida.
E motibo cu awor numa a bin sentencia den e dos casonan di confiscamento ta debi entre otro, na e hecho cu e casacion den Caso Shakur na Hoge Raad y e scuchamento di testigonan den exterior relaciona cu e ontneming den apelacion den Caso Domino, a tuma hopi tempo.
Cu e cuatro decisionnan aki di confiscamento (‘ontneming’) ta bira claramente un biaha mas cu al final criminalidad no ta cumbini hende financieramente tampoco. Si e suma no worde paga por completo, e personanan lo mester bolbe KIA.
