Den caso sumario
ORANJESTAD (AAN): Diahuebs mainta den Corte di Husticia a trata e caso sumario cu Claudius Philips cu su abogado mr. Mohamed a cuminsa contra Daury Rodriguez cu su abogado mr. Arendsz-Marchena.
mr. Mohamed ta haya cu inhustamente Rodriguez ta acusa Philips di pedofil. E abogado ta haya cu Philips a worde condena pa pornografia di mucha.
Abogado mr. Arendsz Marchena ta haya cu no por stroba Rodriguez di su libertad di expresion. Na opinion di e abogado, Hues a condena Philips pa pornografia di mucha pero a bisa tambe cu Philips ta co-responsabel pa abusa di mucha.
Abogado y e acusacion inhusto: Abogado mr. Mohamed a bisa Hues cu e caso aki ta bay riba e forma con Rodriguez ta acusa Philips di pedofil. E abogado a menciona un sentencia di Corte, caminda un persona a hay’e ta rectifica pa a yama un otro persona pa pedofil. Hues a bisa cu e conoce e sentencia ey.
mr. Mohamed a bisa Hues cu e ta haya cu ta inhusto cu net despues di fayecimento di defunto Gario, Rodriguez ta acusa Philips di pedofil. Esaki a haya masha hopi atencion y Rodriguez ta crea e impresion cu Philips ta un pedofil, cual absolutamente no ta asina.
E abogado a bisa Hues cu Philips, na 2011 a worde condena pa pornografia di mucha. Philips a tene conferencia di prensa y a splica cu el a haci un fayo. E abogado a sigui bisa cu e palabra pedofil ta un abusador di mucha menor di edad. Rodriguez ta basa su mes riba e sentencia cu Philips a abusa di mucha cual no ta e caso. El a bisa Hues cu a manda carta pa Rodriguez stop y rectifica sino lo cuminsa un caso sumario.
E abogado a bisa cu Rodriguez a laga sa cu e ta cla pa Corte y cu Philips tin hopi caso di pedofil y cu e tin un morto riba su nomber. El a hasta bisa cu e ta considera Philips e pedofil mas grandi na Aruba. mr. Mohamed ta haya cu Rodriguez no tin ningun prueba.
E abogado a bisa Hues cu e publicacionnan di Rodriguez riba social media di Facebook a afecta Philips y su agrupacion Oreo. A para tocamento pa evita problema. E miembronan di Oreo ta worde pinta como simpatisante di pedofil.
mr.Mohamed ta haya cu Rodriguez mester rectifica pasobra el a haci acusacion inhusto contra Philips.
El a bisa Hues cu Rodriguez a haya video di un dama cu lo ta bisa cu el a worde abusa door di Philips pero riba video no ta mira nada cla. mr. Mohamed ta haya cu esey no ta hustifica pa yama Philips pedofil. El a bisa cu segun e dama cu ta acusa Philips, door di publicacion di Rodriguez el a dicidi di publica esaki.
- Mohamed a remarca pakico e dama aki no a haci denuncia for di tempo cu esaki a sosode cu ta mas cu 10 aña pasa. El a bisa cu e tempo ey Philips tabata den exterior ta studiando musica. Na opinion di mr. Mohamed, e denunciante anonimo tampoco no tin validez. El a pidi Hues pa ordena Rodriguez rectifica loke el a publica na Juni 2022.
- Mohamed a remarca cu mira pornografia di mucha no kiermen cu bo ta un abusador sexual di mucha. El a mustra cu Rodriguez mes 20 aña pasa a worde condena pa algo cu el a haci. E ta haya cu tur hende tin e derecho di rehabilita di loke nan a haci den pasado.
Defensa ta haya cu no mester rectifica: Abogado mr. Arendsz Marchena a bisa Hues cu e pregunta cardinal den e caso ta, si mester para e libertad di expresion di un persona. E abogado ta haya cu e interes di Rodriguez ta pisa mas cu e interes Philips.
El a mustra cu na 2011, Philips a worde condena pa pornografia di mucha y a haya 4 luna di prison condicional y trabao pa comunidad. Na opinion di mr. Arendsz Marchena, den ley penal e pornografia di mucha ta cay den e categoria inmoralidad mescos cu abuso di mucha. El a bisa Hues cu ta Philips mes a download e pornografia di mucha, pues e mes a busca nan y no manera e ta pretende cu accidental el a haya nan riba su laptop.
E nomber pedofil no ta nomber di abuso sexual sino un malesa mental cu mester haya tratamento. E intension di Rodriguez ta pa mustra cu Philips ta un pedofil. E ta haya cu e video di e dama cu ta denuncia Philips, no ta topico di discusion den caso pasobra e mesun dia Rodriguez a kita esaki for di facebook. Segun abogado tin dos denuncia contra Philips.
Hues a pidi pa menciona nomber pero abogado a bisa cu el a papia cu mr. Mohamed y cu e caso ta mucho bieu.
Hues a remarca cu for di unda ta saca cu Philips ta co-responsabel di abuso di mucha. E abogado a menciona e sentencia di 2011, caminda ta menciona esey. E abogado ta haya cu e sentencia di Philips ta haci cu Rodriguez por considera Philips como pedofil. E ta haya cu Hues mester rechaza demanda di Philips.
Pasa video di denuncia di dama: Hues a pidi pa pasa e video cu Rodriguez a post. A pasa esaki den Corte caminda e dama na yoramento ta bisa cu e tabata bay cu su mama na un hotel y cu Philips a abusa di dje den Philips su auto. E ruman homber a haya sa y a forza e dama pa bisa nan mama. E mama no por a soporta esaki y a mata su mes. E dama ta bou tratamento di psicologo.
Hues a bisa cu e dama ta papia di abuso pero el a describi con esaki a sosode? Segun mr. Arendsz Marchena cu si.
Aki mr. Mohamed a bisa Hues cu e dama ta bisa cu Philips a mishi cu ne pero no kier bay den mas detaye. Hues a puntra Philips si e conoce e dama y Philips a desmenti categoricamente di lo tabata cu un mucha den su auto na e hotel. Hues a puntra nomber di e dama y Rodriguez a bisa e nomber.
Hues a sera tratamento di e caso y a bisa cu dia 10 Augustus 2022 lo tin sentencia.
