Abogado ta reacciona den Corte - ORANJESTAD (AAN): Diahuebs mainta, Corte den Promer Instancia a trata e caso penal cu Ministerio Publico
a cuminsa contra e homber masahista M. Tratamento di e caso a dura basta y DIARIO den e articulo aki ta publica e defensa di abogado mr. Canwood, mientras cu den un otro articulo ta publica tratamento di e caso.
CASTIGO EXIGI
Ta asina cu Fiscal a exigi 255 dia di prison di cual 245 dia ta condicional cu 2 aña di prueba. Tambe Fiscal a exigi 200 ora di trabou pa comunidad y 3 aña M. no ta permiti pa traha como masahista.
NO TIN PRUEBA DI SOSTEN
Despues di a scucha e exigencia di Fiscal, abogado mr. Canwood a bisa Hues cu M. ta desmenti categoricamente di a viola y mishi cu hende. E abogado ta haya cu no tin suficiente prueba di sosten. Na opinion di e abogado, e declaracion di testigonan no ta suficiente. E ta haya cu tur e declaracionnan di testigo ta bin for di e mesun fuente o sea e victima.
VICTIMA A KEDA TUMA MASASHI
E ta haya cu ta normal cu durante masashi, esun cu ta haci masashi lo hala panty un banda. E abogado ta mustra cu segun declaracion di testigonan, despues di e violacion, e victima a lanta y bay mes ora. Pero loke e victima di Aruba ta bisa cu despues cu M. a pidi sorry, a lag’e sigui masashi. E abogado a bisa cu manera M. a splica, e ta pidi sorry ora e sa cu e masashi lo ta dolor. E abogado ta haya cu no tabatin penetracion y mester declara M. liber.
El a mustra cu e victima tabatin diferente oportunidad pa bay pero el a dicidi di laga M. caba cu e masashi. El a mustra tambe cu normal e masashi ta 30 minuut pero e victima di Aruba a pidi masashi pa 90 minuut. E otro victima Mericano, tambe a laga M. sigui y no a bay mesora.
Mirando esaki, e abogado ta haya cu mester declara M. liber pa esaki. Na opinion di e abogado, ta voluntariamente e damanan a kita paña y haya masashi. No por papia aki cu lo ta un forma di actua di M., manera Fiscal ta pretende.
Na opinion di e abogado, masashi di bil y pia y lies por ta intimo pero esey ta e forma di masashi. El a menciona sentencia di Hulanda cu ta mustra cu no por papia di actonan inmoral. E ta haya e exigencia di Fiscal, especialmente e prohibicion di traha, lo ta perhudica M. den mantene su famia. Pa loke ta demanda di e victima di Aruba, e abogado a remarca cu no tin ningun recibo pa hustifica loke e ta demanda.
El a pidi pa declara e demanda no admisibel. Hues a sera tratamento di e caso y a bisa cu e ta bay studia e caso y dia 7 October 2021, lo tin sentencia.
