ORANJESTAD (AAN): E homber masahita M. Diahuebs mainta a scucha Fiscal exigi castigo combina y 3 aña sin por traha como masahista.
Esaki, pasobra Fiscal ta hay’e culpable di a viola un dama di Aruba y a mishi na e parti intimo di un dama Mericano.
Den sala di Corte tabata presente e victima Arubiano cu su famia, mientras cu e sospechoso M. a presenta cu su señora. E acusacionnan cu Fiscal a presenta contra M. ta cu riba 4 November 2019, el a viola un dama Arubiano mientras cu dia 19 October 2020, el a mishi na e parti intimo di un dama Mericano.
Tur dos incidente a sosode durante cu M. tabata haciendo masashi pa cada un. Den e articulo aki DIARIO ta publica tratamento di e caso y exigencia di Fiscal. Den un otro articulo ta publica e defensa di abogado.
DEMANDA DI DAÑO
E victima Arubiano den un relato cu el a presenta den Corte na Hues, a splica cu el a keda afecta y ainda e ta bou tratamento. Su curpa a shot down y nek a bira hopi stijf. El a bisa cu e mester a haya tratamento di un Chiropractor cu a sali 2 mil florin. Despues e mester sigui terapia di masashi cual a sali mas di 2 mil. E ta siguiendo tratamento psicologo y e ta calcula cu esaki ta 12 mil. Hues a remarca cu e victima ta menciona sumanan pero no tin calculacionnan y recibonan.
Segun e victima, e tin recibonan pero no tabata sa cu e mester a presenta esakinan na Corte. Hues a sigui bisa cu e victima ta mustra cu door di e incidente aki, el a keda 2 luna sin traha su trabao di mercadeo. E ta calcula esaki na 10 mil florin ya cu pa luna e ta gana 5 mil florin. El a splica Hues cu e no por a cumpli cu su clientenan. El a perde cliente y trabaonan. Tambe el a calcula 10 mil florin pa conseho huridico.
VIOLA DAMA DURANTE MASASHI
Hues a mustra cu segun e relato di Polis, e victima a declara cu 4 November 2019 el a bay pa cerca M. pa masashi pa dolor di lomba. Esey ta di dos biaha cu a bay. Segun victima, M. a pidi pa kita paña y dun’e sarbete.
Durante masashi, M. a bisa cu mester masashi e bilnan y a kita panty. Na dado momento e victima a sinti cu M. a mishi na su parti intimo. El a reacciona y puntra kico ta pasando. M. lo a cuminsa hari y a bisa victima pa relax.
E victima a bolbe bay drumi riba e cama y e momento ey, M. a hinca su dede den su parti intimo. E victima a bolbe reacciona puntrando M. si e ta bon y kico ta pasando. M. a pidi disculpa.
Segun e victima, M. a hinca rudia su dilanti y pidi pa pordon’e y no bisa ningun hende kico a pasa. E victima a bisa cu e tin comprension pa M. kende a caba di casa y lo por tin problema. El a bisa M. cu e no kier tin nada di haci si e tin problema cu su señora. M. a puntra si e kier pa sigui masashi y victima a bisa cu si.
Su siguiente dia M. a yam’e pero e no a contesta. E ora ey el a conta su amiga. E amiga a bisa victima pa haci denuncia. Despues el a bay conta su mama y e mama a keda den shock. Segun e victima M. a mand’e WhatsApp puntra con ta sinti y victima a bisa cu no bon y mihor tene distancia. M. a bis’e cu e ta compronde. E victima a dicidi di haci denuncia. Hues a bisa cu tin copia di e mensahenan.
MISHI CU OTRO DAMA
E otro victima Mericano tambe a bisa cu M. a mishi na su parti intimo durante masashi. E victima Mericano a keda afecta pa esaki. El a bisa cu M. a cuminsa masashi na su pianan y despues a bay ariba y lo a mishi na su parti intimo pero no a penetra.
SOSPECHOSO DESMENTI
- a bisa Hues cu e no a mishi na e parti intimo di ningun di dos dama y cu e ta masashi na forma professional. Hues a puntra si por tabata un descuido di parti M. Segun M. esey no a sosode. Abogado a bisa cu e tin riba stick con masashi mester sosode. Hues a remarca cu e tambe a yega di haya masashi y sa con esaki ta sosode. El a nenga e peticion di abogado, kende kier a laga pasa e dunamento di masashi den Corte.
Hues a mustra cu M. lo a declara na Polis cu ta keda na cada cliente si nan ta kita nan panty of no. Den caso di e Mericano durante e masashi e lo a puntra pa kita panty y e Mericano a haci’e. Hues a remarca cu M. a pidi sorry. Segun M. door cu lo a haci dolor durante masashi el a pidi sorry. Por a ripara cu e victima no tabata satisfecho cu declaracion di M. Hues a mustra cu M. a declara na Polis cu ningun momento el a hari ora cu e victima a reclama. El a desmenti cu el a pidi e victima pa pordona. El a bisa tambe cu e no ta corda cu el a manda whatsapp.
Ta asina cu M. a keda 10 dia sera y despues laga liber. Ainda e ta haciendo masashi.
EXIGENCIA FISCAL
Fiscal a bisa Hues cu tin prueba cu M. a viola e victima di Aruba y cu M. a mishi cu e victima Mericano su parti intimo. Den e caso di November 2019 el a bay hinca dede den e parti intimo. Den caso October 2020, e Mericano a reclama ora M. a mishi na su parti intimo. Den ambos caso M. a pidi sorry. Fiscal a remarca cu awor cu ta confronta M. cu e hechonan, e ta desmenti categoricamente.
PRUEBA DI SOSTEN
Fiscal ta haya cu den e caso aki tin prueba di sosten. El a mustra na Hues cu tur dos e victimanan a declara casi mesun cos caminda e masashi a bay mucho leu. Nan no conoce otro pero a declara mesun cos y a keda sorprendi ora nan a wordo mishi. Ambos ta bisa cu M. a pidi sorry y e masashi a sigui. Despues nan a pensa cu esaki no ta normal y enberdad e no ta normal. Mustra cu victimanan hopi biaha no ta reacciona di biaha. Esey ta pasobra nan ta den un shock y no por kere loke a pasa.
Ta ora cu e victimanan a conta nan mama, nan mama a reacciona cu mester haci denuncia. Fiscal ta haya cu e declaracion di e victimanan ta sostene otro, mientras nan no conoce otro. Tin hurisprudencia cu ta mustra cu por usa e declaracionnan aki como prueba ora cu riba puntonan esencial nan ta cuadra cu otro. Nan ta describi den detaye kico a sosode y pesey Fiscal ta haya cu nan ta prueba di sosten. Nan ta mustra e forma di traha di M.
HINCA DEDE TA VIOLA
Na opinion di Fiscal hinca dede den parti intimo, a base di ley penal, ta wordo considera violacion. Violacion no ta manera hopi hende ta kere cu lo tabatin maltrato y violencia.
HENDE MESTER POR CONFIA MASAHISTA
Fiscal ta haya cu M. a defrauda e confianza cu un hende mester tin den un masahista. E ta haya cu e dos victimanan tabata den un posicion vulnerable. Fiscal a bisa Hues cu e ta puntra su mes cu cuanto hende mas esaki a sosode y pa berguenza y miedo no a bay haci denuncia.
CASTIGO
Fiscal a mustra cu tur dos victima a keda afecta y lo mester bay siña biba cu ne. El a menciona casonan na Hulanda y a exigi 255 dia di prison di cual 245 dia ta condicional cu 2 aña di prueba. Tambe Fiscal a exigi 200 ora di trabou pa comunidad y 3 aña M. no ta permiti pa traha como masahista. Pa cu e demanda, Fiscal a bisa cu lamentable e victima di Aruba no a bin cu recibonan pa hustifica e demanda. Pesey el a pidi pa declara e demanda no admisibel. Den un caso civil lo por bay haci esaki.
Despues di a scucha defensa di abogado, Hues a sera tratamento di e caso y a bisa cu e ta bay studia e caso. Hues a palabra cu dia 7 October 2021 lo tin sentencia.
