ORANJESTAD (AAN): Diabierna mainta Hues di Corte di Husticia a haya e homber L. di edad halto di 66 aña, culpable di a abusa di e nieta di su pareha, e mucha W.
Hues a declara L. liber di e otro acusacion di a haci actonan inmoral cu e prima di W., esta e mucha G.
E actonan di abuso y inmoralidad lo mester a sosode entre 2005 y 2008. Apesar di a declara L. liber di un acusacion, Hues a haya e castigo exigi pa Fiscal na su lugar y a condena L. na 4 aña di prison.
Requisitorio di Fiscal: Tabata dia 1 di Juli 2022 tratamento di e caso a tuma lugar caminda Fiscal a bisa Hues cu e dama W., dia 7 Januari 2019 a haci denuncia. Fiscal a bisa cu e pregunta tabata pakico a warda asina hopi. For di investigacion por saca afor cu diferente biaha W. a keha e comportacion di L. tempo cu e tabata chikito. El a bisa cu awor cu e ta mas bieu e kier haci denuncia. Fiscal a splica cu den ley a crea a posibilidad cu un victima di abuso por haci denuncia despues di tempo largo.
Segun declaracionnan, tempo W.(8), el a keha na su mama y e mama a reclama L. pa esaki. Tin otro testigonan ta bisa cu W. a reclama tempo e tin entre 5 y 8 aña, cu L. a mishi cun’e na su parti intimo. W. a bisa cu e ta corda con e tabata sinta den scochi di L. pa mira riba computer y L. tabata mishi cun’e. Tambe cu ora e tabata drumi den camber, L. lo tabata mishi cun’e.
Fiscal ta haya cu tin suficiente prueba di sosten den e caso di W. El a sigui bisa cu G. cu ta prima di W., a worde scucha na Hulanda na Januari 2021, kende a bisa cu W. a bis’e cu el a worde mishi door di L. G. a bisa cu el a mira W. y L. den camber y bou deken. Tambe G. a conta W., con L. tabata mishi cu G. tambe. Fiscal ta haya cu por usa e declaracionnan aki como prueba di sosten contra L. El a exigi 4 aña di di prison di cual 1 aña ta condicional cu tempo di prueba 2 aña. Fiscal a pone condicion cu durante e 2 aña di prueba, L. mester cay bou guia di Reclasering.
Sentencia a ser duna: Diabierna mainta via video conference, Hues a dicta sentencia. E acusado L. tabata den un oficina na KIA, mientras cu Hues, Fiscal, abogado tabata den sala di Corte.
Culpabel di abuso sexual: Hues a bisa cu e ta haya legalmente proba cu L., entre 2005 y 2008, a abusa di e mucha W., kende e tempo ey tabatin entre 5 y 8 aña. Hues a bisa cu e declaracion di e victima W. confiabel y suficiente detaya.
Ademas tin suficiente prueba di sosten di testigonan kendenan a bisa cu den pasado W. a bisa nan di a worde abusa di L. Hues ta haya cu L. mes a bisa cu e regular e tabata su so cu W. na cas y cu W. sa sinta den su scochi y sa drumi banda L. den camber.
No culpabel di actonan inmoral: Hues a sigui bisa cu e no ta haya legalmente proba cu L. a haci actonan inmoral cu e mucha G., kende e tempo ey no tabatin 16 aña ainda.
Hues a mustra cu ademas di e declaracion di G., no tin pruebanan di sosten manera ley ta exigi. Pesey Hues ta declara L. liber di e acusacion di actonan inmoral haci cu e dama G.
Castigo: Pa cu e castigo, Hues a bisa cu e ta tene na consideracion cu durante un periodo largo L. a abusa di nieta di L. su pareha. Hues ta haya cu aki, L. a abusa di su posecion di adulto pa cu e mucha. Hues a sigui bisa cu e ta haya cu L. tabata abusa di e mucha pa satisface su mes sin tene cuenta e daño cu el a haci na e mucha.
Hues a mustra cu victimanan jong di abuso sexual por keda afecta. Casonan asina ta crea sentido di inseguridad den comunidad.
Hues a bisa cu e ta tene cuenta cu L. ta first offender. Tambe Hues ta tene cuenta cu conseho di Reclassering, caminda lo duna castigo combina pa asina cumpli cu e conseho.
Hues a condena L. na 4 aña di prison di cual 1 aña ta condicional, cu 2 aña di prueba. E parti ci castigo condicional ta bao condicion special cu L. lo bay bao guia di Reclassering y lo mester sigui instruccion y indicacionnan di Reclassering, aunke cu esaki por nifica tratamento di sicologo.
