Michael Gibson condena na 15 aña di prison pa a tira mata Chines na Jaburibari

Hof ta confirma castigo di Corte den Promer Instancia

ORANJESTAD (AAN): Diamars merdia 2’or, Hof di Corte Superior, a dicta sentencia den e apelacion di Michael “Teddy” Gibson. Gibson a apela contra su condena di 15 aña di prison pa a tira mata H. Quach riba 1 Mei 2017 den un apartamento na Jaburibari.  Diamars Hof a confirma e sentencia di Corte den Promer Instancia.

   Luna pasa, despues di practicamente 3 aña, a sigui cu tratamento di e caso den apelacion. Na October 2019 Hues di Corte den Promer Instancia ta haya Gibson culpable di a tira mata e Chines H. Quach. Hues a tuma Gibson na malo cu e forma cu a tira mata e Chines ta un forma di asesinato. Esaki a sacudi henter comunidad. Hues a sigui Fiscal su exigencia y a condena Gibson na 15 aña di prison.

   Varios biaha abogado mr. Arendsz-Marchena a purba di haya testigo na Canada pa worde scucha pa autoridad Canades pero esaki no tabata posibel. Autoridad Canades a informa cu no por haya e personanan y tin algun a laga sa di no kier duna declaracion.

   Gibson a bisa Hof cu e tin famia grandi na Canada y e famianan di e victima y esnan envolvi tambe. E ta conciente di e peliger cu su famia ta aden y pesey no a duna declaracion completo.

   El a bisa Hof cu e ta prefera di sinta e castigo, cu bay papia den Corte y su famia ta core peliger pa loke e ta declara. El a bisa cu si e duna declaracion, e lo worde mira como informante. Gibson a bisa cu e unico cos cu e lo bisa ta cu e no a tira y no tabatin arma. El a admiti di tabata den e apartamento pero no den e camber caminda e homber H. Quach a worde tira mata.

   Procurador General a exigi pa Hof confirma e castigo y ayera Hof a confirma e castigo. Michael Gibson ta keda condena na 15 aña di prison.

    Manera DIARIO a publica, Gibson ta worde busca pa autoridad Canades pa un caso di asesinato na Canada. E ta worde sospecha cu na April 2016, el a tira mata Julian Weekes (27). Esey ta nifica cu despues cu e sinta su castigo na Aruba, autoridad Canades lo bin busk’e pa e bay duna cuenta pa e asesinato cu e ta worde sospecha di dje.