ORANJESTAD (AAN): E homber di inicial D.C. di 26 aña, a presenta dilanti Hues pa e caso penal cu Ministerio Publico a cuminsa contra dje.
E ta worde acusa cu riba 8 Juli 2021 como Tour Guide a actua negligente door di laga un turista landa caminda ta prohibi. Esey a causa cu e turista a hoga.
Den sala di Corte tabata presente e pareha di e turista Tores, kende a hoga. Tambe tabata presente e tata di D.C. Por a mira cu durante tratamento di e caso, tanto e tata di D.C. como e pareha viuda tabata yora. Hues a puntra e pareha si e kier haci demanda di daño. E pareha a bisa cu e no ta desea di haci denuncia sino presencia e caso.
Hues a bisa cu tin video di loke a sosode y a studia esaki.
No ta rekeri preparacion pa bira Tour Guide: Hues a puntra D.C. na unda e ta guia turista y pa cuanto tempo e ta haciendo esaki. D.C. a bisa cu na Parke Arikok e ta guia turista. E ta haciendo esaki mas o menos 2 aña y cu via reservacion esaki ta worde haci.
For di e preguntanan cu Hues tabata haci por compronde cu no mester tin un preparacion pa ta un guia. Hues a remarca si scucha loke D.C. ta bisa, aki 2 siman e mes por bira un guia pasobra no mester tin preparacion. Ni for di hotel y tampoco for esnan encarga di Parke Arikok a exigi un preparacion.
D.C. a bisa cu el a bay 2 aña Instituto Pedagogico IPA y a siña hopi di nos cultura, cual e ta usa ora e ta guia turista. El a bisa cu e sa body board y tin experiencia cu laman bruto. Tambe e tin conocimento pa rescata hende. El a splica cu e tour ta, cana di Daimari, Natural Pool y bay Moro na Boca Keto. (Moro ta e isla chikito cu tin na e beach di Boca Keto).
Segun D.C. na Natural Pool el a bisa e homber Tores a bula for di baranca y por landa den e olanan grandi cu ta kibra riba baranca. Segun D.C., Tores a bisa cu e sa landa bon y ta coredor di marathon.
Landa siendo tin borchi di prohibicion: Despues di Natural Pool, nan a bay Moro y tin e posibilidad pa bula for di baranca y landa bay tera. D.C. a bisa Hues cu semper e ta haci’e ora bolbe for di Natural Pool.
Asina D.C. ta mira si na Natural Pool, e persona ta landa bon. Hues a puntra cu e laman na e costa Norte di Aruba ta conoci pa ta hopi bruto. Segun D.C., e laman tabata basta bruto. El a tuma algun minuut pa check e laman y a mira cu e laman tabata calmo. El a bisa cu e tambe a bula for di baranca hunto cu e turista Tores.
Hues a bisa cu tin borchi cu ta indica pa no landa pa motibo di e barancanan. El a remarca pakico D.C. ta haci’e tog. Segun D.C. tempo e tabata chikito el a lanta ta mira hende ta bula for di baranca. El a bisa cu tin rangers ta bula eynan y tin tour operators cu ta ofrece esey. Te dia di awe tin hende ta bula for di baranca. El a bisa Hues cu si e mira cu e laman ta calmo, e ta considera cu e lugar ta sigur pa bula for di baranca.
Hues a remarca cu apesar cu laman ta calmo, diripiente tin bin olanan grandi. Segun D.C., e ta haya cu e dia ey e olanan no tabata asina grandi. El a bisa cu e ta splica tur hende cu no mester landa bay di biaha na man robez sino landa via un canal pa bay canto. Mester calcula ora ta bula. Hues a bisa cu “timing” ta importante pasobra tin olanan. Hues a remarca cu ta straño cu D.C. ta tuma riesgo pa laga hende bula for di baranca. Eynan tin un monumento dedica na un tour guide cu a fayece na baranca.
Hues a bisa cu for di e video por a mira cu ora ola grandi tabata drenta y bay back. Esaki ta hiba hende mas leu den laman. Segun D.C. e tin experencia di bula pero nunca esey a yega di pasa cun’e. E dia ey tabata e promer biaha. Hues a mustra cu na dado momento Tores a haya su mes den problema. Segun D.C. el a bay yuda Tores y na dado momento D.C. tabata bou awa y Tores riba su pecho. Na dado momento Tores a bira panico. Segun D.C. el a purba duna instruccion na Tores pero no a duna resultado. El a purba rescata Tores pero sin resultado. Ta asina cu apesar di e lamentable incidente, ainda D.C. ta tour guide pero no ta bay mas bula na Moro.
Turista hoga ta “traha riba dje”: Hues a puntra D.C. kico e incidente aki a haci cun’e. Cu wowo na awa el a bisa cu un di su hobbynan e no ta haci mas. El a bisa Hues cu tur dia ora e lanta e ta mira Tores y ora e bay drumi tambe. Hues a puntr’e si el a tuma contacto cu familiar di Tores.
El a bisa cu e no a tuma contacto cu e familiar. Via un primo el a purba. El a bisa cu e no a sinti pa papia cu e famia. E ta pensa cu e ta worde mira como diabel pa e famia. Dia di e caso, pafor di sala di Corte el a papia cu e pareha di e victima Tores.
Culpa cu turista a hoga: Fiscal a bisa Hues cu e no ta acusa D.C. cu intencionalmente a mata Tores. Loke a pasa ta worde considera un negligencia cu a causa morto di Tores. Esaki ta culpa di D.C. Como guia, por spera mucho mas di D.C. cu conoce e area y sa cu tin borchi cu ta prohibi pa landa. Fiscal a bisa cu e turista Tores hunto cu su amiga a contrata D.C. pa un caminata.
Nan a bula na Natural Pool y ora di bay back, D.C. y Tores a bula for di baranca. Tores a hoga.
Fiscal a bisa cu turista ta confia den un persona di guia cu mester splica e lugarnan cu nan ta bishita. E guia mester splica turista kico por y kico no por y unda tin limitacion. D.C. ta responsabel pa e hendenan cu e ta guia. Caminda nan a bula na Moro ta prohibi. Tin un borchi cu ta mustra esaki. Ta cerca di e borchi aki nan a bula. D.C. a bisa cu e ta splica kico tin na Moro y tin posibilidad pa bula si laman ta calmo. Fiscal ta haya cu ta dificil pa D.C. dicidi cu Tores por bula for di baranca.
El a remarca cu e turista no conoce e lugar y no sa kico por spera. D.C. si sa di esaki y tog a dicidi di bula den awa cu Tores. Fiscal ta haya cu D.C. a actua irresponsabel pa bisa Tores pa bula for di baranca. Na opinion di Fiscal, e hecho cu D.C. a splica Tores con pa bula y con pa landa back, no ta haci otro. Ta door di D.C. a causa morto di Tores.
Exigi castigo condicional: Fiscal a bisa cu no ta promer biaha cu hende a hoga na e barancanan na Moro. Pesey e ta haya cu D.C. ta culpable pa morto di Tores. Fiscal a mustra cu Aruba ta concentra riba turismo. Turista ta confia riba e guia. Guia mester percura pa e turista pasa bon y yega sano y salvo. Fiscal a bisa cu e ta spera cu e lamentable caso aki lo ta un señal pa tur guia di nan responsabilidad pa cu turistanan.
Fiscal a bisa Hues cu el a papia cu coleganan riba e caso pa asina pensa kico lo ta un castigo husto. El a exigi castigo condicional pasobra e ta haya cu esaki mester ta un aviso. Fiscal a exigi 6 luna di prison condicional cu 2 aña di prueba.
Abogado: Su abogado mr. Illes a bisa cu ta algo tristo a pasa. D.C. tin cu biba cu esaki pa resto di su bida. E ta haya cu D.C. no a actua malo. E abogado a bisa cu den bida cos por bay robez. E ta haya cu no por bisa cu intencionalmente D.C. tabata kier morto di Tores. D.C. a haci tur esfuerzo pa rescata Tores. Tin video cu ta mustra claramente cu D.C. a purba yuda Tores yega canto.
Tores tabata por landa bon. D.C. a mira con Tores a landa na Natural Pool. E abogado ta haya cu mester declara D.C. liber pasobra ta Tores mes a dicidi cu ta bula for di baranca. El a mustra como ehempel, cu un persona cu ta bula cu parachute for di avion, ta tuma e riesgo. Si algo bay malo, e piloto di avion no ta responsabel.
Segun e abogado, e hecho cu tin un borchi cu ta prohibi pa bula, a base di ley e no ta castigabel. Na Natural Pool tambe hende ta bula landa. Na e borchi na Moro no ta pone cu bula y landa ta contra ley. El a mustra cu tin hende ta haci propaganda den exterior con hende ta bula for di baranca. Tambe el a bisa cu tin otro tour operator y rangers cu ta laga turista haci esaki. Tin hende ta haci body board, windsurf na costa norte. D.C. a bula den awa hunto cu Tores.
E amiga di Tores cu no por landa bon, D.C. a desconseha pa bula. E abogado a remarca cu te ainda e cabuya ta colga na Moro pa subi siendo cu e ta prohibi. El a bisa cu dia di e incidente no por a premira cu e coriente ta mas fuerte cu normal. A calcula ora e laman tabata basta calmo pa bula. Tabatin mas turista cu a bula riba e dia ey. E abogado a conclui cu D.C. no tabata irresponsabel y a pidi Hues pa declar’e liber.
Hues a sera tratamento di e caso y 31 Maart 2022 pa 8.15 am por spera sentencia.
