Abogado mr. Carlo ta señala - ORANJESTAD (AAN) – Diabierna di mainta te den oranan di atardi, Corte di Husticia a trata e caso penal cu Ministerio Publico a cuminsa contra Rudy Carti.
E acusacionnan contra Carti ta cu durante cu e tabata haci masashi, el a penetra cu su dede na e parti intimo di algun di e damanan. Tambe e ta wordo acusa di lo a mishi na e parti intimo di algun dama. Tambe e ta wordo acusa di lo a mishi na pecho di algun di e damanan. Fiscal a exigi 5 aña di prison y 8 aña Carti no por traha como fisioterapista.
Den e articulo aki, DIARIO ta publica e defensa di mr. Carlo y den un otro articulo, e exigencia di Fiscal.
NO TIN SUFICIENTE PRUEBA
Abogado mr. Carlo a bisa Hues cu e ta haya cu e declaracion di e denunciantenan no confiabel y pesey mester declara Carti liber. E no ta haya cu tin suficiente prueba cu Carti ta culpable di a viola, mishi of tacha integridad di hende muher.
E abogado a mustra cu Carti durante añas a trata mas di 30 mil patient di AZV y ta promer biaha cu tin keho contra Carti. E abogado ta haya cu aki ta trata di mal comprondemento di e forma di masashi cu Carti ta duna y a saca esaki for di contexto. E abogado a bisa Hues cu ningun momento Carti tabatin intension di haci algo sexual cu e damanan. E motibo cu Carti no a duna declaracion na KZP ta pasobra e no tabata confia husticia.
TUR PLACA CONFISCA DEBOLBE
E abogado a mustra con e forma di interogacion a bay no corecto. Durante razia a confisca un cantidad di placa. A dura masha hopi promer cu a haya e placa bek. E ta haya cu Ministerio Publcio tabata tene Carti den duda. Pesey mester a cuminsa un caso di keho y finalmente a haya su placa bek.
MANDA DAMANAN PA HACI DENUNCIA
E abogado a sigui bisa cu no a confia e forma con e caso aki a bin dilanti. For di Fiscal por a scucha cu ta for di Inspeccion di Salubridad e caso a bin dilanti. No tin ningun caminda para cu lo tabatin denuncia. E abogado ta kere cu ta un di e damanan a haci denuncia por escrito contra Carti di lo a drog’e cu e azeta.
E ta haya straño cu e di dos dama tambe ta haci un denuncia por escrito. Esaki ta mustra cu nan posiblemente a cera cabez. Tambe 4 di e 8 damanan ta declara cu nan a paralisa ora cu Carti a mishi cu nan. E dos damanan cu a bisa cu den e azeta tin droga, tabata serca un otro fisioterapista y ta bisa cu e otro fisioterapista ta usa otro azeta. Na opinion di mr. Carlo, esaki ta mustra cu nan a wordo manda pa un of mas persona pa haci denuncia. Investigacion a mustra cu e azeta cu Carti ta usa no tin droga aden y cu e ta completamente bon pa haci masashi. Tin sospechoso cu e damanan a wordo manda. Esaki pasobra ora a puntra un di e damanan kico e ta desea pa pasa, el a bisa Polis cu e no sa si lo bin mas denuncia di otro damanan.
COOPERA CU CIERTO MEDIA
E abogado a señala cu ta parce cu despues cu 24ora a publica di e detencion, diripiente un cantidad di denuncia a drenta na KZP.
El a cuestiona e hecho cu diferente biaha 24ora y Tempran a publica den detayes riba e caso aki. Ta parce cu Ministerio Publico a suministra informacion. Cada biaha cu Carti tabata bay na KZP, 24ora y Tempran tabata presente. Con por ta? Ki intension tabatin cu esaki.
CARTI NO A PENETRA NI MISHI
E abogado a bisa cu Carti ta desmenti categoricamente di lo a penetra of mishi na parti intimo of pecho di e damanan. E tabata trata tur e damanan cu respet y haci masashi na forma professional. Ningun momento Carti a haci masashi caminda e patient tabata sunu manera Fiscal ta bisa. Semper nan ta haya un sarbete pa pone na nan curpa. E abogado hasta a mustra den Corte e sarbetenan cu Carti ta usa ora di haci masashi.
NO POR USA DECLARACIONNAN
Mr. Carlo a menciona maneho di Corte pa cu casonan di inmoralidad y ta haya cu mester tin duda den declaracion di e damanan. E intension di Ministerio Publico di usa e declaracionnan como prueba di sosten, no ta corecto. E declaracionnan ta diferencia di otro y ta splica un otro situacion di masashi. E ta haya cu mester declara Carti liber y pone den libertad di biaha.
CASTIGO TA EXAGERA
E abogado a bisa Hues cu e exigencia di Fiscal ta exagera. El a mustra cu diahuebs tabatin un caso penal caminda un masahista sospecha di a mishi y penetra, Fiscal a exigi castigo combina y 3 aña sin por traha.
Pa loke ta e demandanan di e dama riba 50 mil florin, esaki no ta bon argumenta. E abogado ta haya cu mester declara tur e demandanan no admisibel. No tin espacio den caso penal pa atende esaki.
Carti a remarca cu promer tabatin 3 keho pero despues di publicacion di 24ora a bin mas. E ta haya cu mester mira e 8 dama cu ta keha contra e mas di 30 mil hende cu el a trata. E ta haya cu no ta husto cu su lomba ta wordo poni contra muraya pa cosnan cu e no a haci.
Hues a sera tratamento di e caso y a bisa cu e no ta dicidi ainda riba e peticion pa laga Carti liber. Mester studia e caso bon pa despues dicta sentencia. Hues a palabra cu 8 October 2021 lo tin sentencia.
