Hungador profesional di poker Arubiano dilanti Hues pa labamento di placa

Abogado mr. D. Kock ta señala fayo den investigacion

ORANJESTAD (AAN): E homber di inicial P.S., acusa di labamento di placa entre Juni 2019 te 13 Januari 2021, a bisa Hues cu e ta un hungador profesional di poker y cu e placa cu a haya den e safe na oficina di su tata, ta placanan cu el a gana den weganan di poker. Fiscal no ta kere esaki y a exigi pa confisca e mas di 100 mil Florin y un castigo condicional.

   Abogado mr. D.Kock a cuestiona e forma con Fiscal a laga hiba investigacion. E ta haya cu investigacion ta mustra claramente cu su cliente ta un hungador profesional di poker. El a bisa Hues cu mester declara P.S. liber y ordena Fiscal pa debolbe tur e placa confisca.

    Investigacion na oficina:  Hues a mustra cu relaciona cu e caso Avestruz, autoridad a bay haci un investigacion na La Hacienda Mall cu ta e oficina di tata di P.S. Den e caha fuerte a haya 25 mil Dollar y algo mas di 60 mil Florin.

   E sospechoso P.S. tabata eynan y a bisa e agentenan cu e placa ta di dje y ta placa cu el a gana den weganan di poker. Door cu P.S. no por a proba esaki, autoridad a sospecha cu ta placa procedente di labamento di placa di actonan criminal. A confisca esaki y a haci interogacionnan cu P.S.

    Hungador profesional di Poker:  Hues a mustra cu Polis a haci investigacion y Belasting a mustra cu nunca P.S. a duna informacion di entrada. Hues a puntra P.S. di ki tempo el a hinca placa den e caha fuerte. P.S. a bisa Hues cu e ta un hungador profesional di poker. El a mustra Hues e dos renchinan grandi di oro cu e tin bisti cu el a gana ora el a gana torneonan Internacional grandi di Poker.

   El a bisa cu na 2019 el a cuminsa hinca placa den e caha fuerte na su tata su oficina pero cu desde 2010 e ta hungando poker y tabata spaar placa na cas y banco. Door cu banco tabata haci fastioso pa cu deposito di sumanan grandi, el a dicidi di hiba sumanan grandi na oficina di su tata, un parti di suma na su cas y un parti na banco.

   El a cuminsa pone menos cu 20 mil Dollar den e safe na La Hacienda y en total tabatin algo mas di 100 mil Florin den e safe incluyendo e cantidad di dollars.  Esey ta un parti di su placa cu el a spaar for di 2010 cu gana cu poker te cu 2019. E momento ey tabatin un tiki mas cu 100 Florin total incluyendo Dollars.

   El a splica Hues cu el a tuma costumber di parti su placa den tres. Segun P.S., si horta na e safe of na cas, e lo tin placa na banco tambe. Na cas a haya un tiki mas cu 100 mil Florin. El a bisa Hues cu e placa cu a confisca no ta di su tata. E no a spera cu e placa a bira un problema grandi.

   Gana Torneonan di Poker:  Hues a sigui bisa cu investigacion cu Polis a haci a mustra cu P.S. a gana na Torneonan di Poker organiza na Casinonan di e.o. Hilton Aruba Resort, y RIU Hotel.  E sospechoso P.S. a puntra pakico Polis no a bay e Casino na Holiday Inn Resort, caminda e tabata hunga poker for di 2010.

   Hues a mustra cu Polis a haci calculacion desde 2019 y Polis a conclui cu P.S. tin placa di mas. P.S. a remarca cu el a bay hunga na Las Vegas, Paris, Miami, Colombia, Hulanda y Curañao den International Tournaments. El a bisa tambe cu e sa presta hungadornan di poker placa pero sin interes.

   Exigencia di fiscal: Fiscal a bisa cu P.S. ta un hungador di poker semi-profesional y a haya sumanan grandi den e safe. Na opinion di Fiscal, P.S. mester demostra di unda el a haya e placanan aki. El a menciona sentencianan di Corte Supremo caminda ta bisa cu sospechoso mester splica con a gana placa, cuanto placa y den ki periodo.

   No ta kere e sospechoso:  Fiscal ta haya cu no tin suficiente indicacion di unda tur e placanan aki a sali. El a bisa cu tin diferente depositonan haci na banco. Fiscal ta haya cu ta solamente P.S. su declaracion tin. El a bisa Hues cu gana structural den casino no por worde accepta como prueba. El a mustra riba un caso cu ta igual cu P.S. cu ta bisa cu e ta gana den casino. No por prueba esaki.

   For di investigacion no ta yega na e suma cu a haya den e safe. Fiscal a bisa cu notabel ta cu den e mesun periodo P.S. a haci deposita grandi na Aruba Bank. Di unda tur e placa aki a sali? El a sigui bisa cu P.S. ta bisa cu el a spaar desde 2010. Fiscal a bisa Hues cu e no ta kere cu P.S. a gana torneo poker den exterior. E no por prueba esaki. No ta kere P.S. y ta haya cu P.S. a laba placa.

   Confisca placa y castigo condicional: Fiscal a bisa cu e ta exigi pa confisca e mas cu 100 mil Florin cu a haya den e safe. Pa cu e castigo el a exigi 1 luna di prison condicional cu un tempo di prueba di 2 aña. Tambe a pidi pa confisca e placa.

   Abogado: Abogado mr. D. Kock a bisa Hues cu e tin documentonan cu ta mustra caminda P.S. a participa na torneonan di poker. E abogado a bisa Hues cu, tin hopi placa no ta un hecho castigabel. Hurisprudencia ta bisa cu no mester sali for di e punto di bista cu pasobra a haya hopi placa, automaticamente cu lo a haci un delito. E abogado ta puntra: “Ki delito P.S. a haci?” Ningun! El a bisa Hues cu desde 2010, P.S. a hunga poker. Den media international ta mustra cu P.S. a gana torneo di poker professional. El a remarca cu e no ta compronde pakico Fiscal ta papia di semi profesional siendo cu P.S. tin no 1 sino 2 renchi di torneo cu el a gana.

   Tur cos ta mustra legal: mr. Kock a bisa Hues cu for di e investigacion cu Polis a haci, ta mustra bon cla cu P.S. ta un hungador profesional di poker cu constantemente ta hunga. El a remarca cu Polis a bay check dos casino na Aruba y pakico no a check Holiday Inn su casino.  Dos otro Casino na Aruba a confirma cu enberdad P.S. a gana weganan di poker. E abogado a duna splicacion amplio di hungamento di poker caminda e hungadornan no ta hunga contra e Casino sino e hungadornan ta hunga contra otro y casino ta haya un porcentahe.

   Fiscal a faya den investigacion: E abogado a sigui bisa cu for di investigacion ta mustra cu den 2 aña so, P.S. a gana 40 mil dollar den dos Casino na Aruba. Esey, sin papia di weganan international y na Holiday Inn.

   E abogado a bisa Hues cu pa hunga, mester deposita sumanan grandi. Esey ta mustra cu e calculacion di Fiscal no ta cuadra. El a bisa cu den un casino so, P.S. a deposita mas cu 62 mil Florin. Awor con por bisa cu e placa ta procedente di fuentenan ilegal, manera Fiscal ta pretende. E abogado a cuestiona e forma limita di investigacion di Fiscal.

   El a bisa Hues, pakico no a investiga desde 2010 cu P.S. ta hungando poker. Abogado mr. Kock ta haya cu e acusacion ta for di sla. El a remarca tambe cu placa gana for di casino no ta kita for di belasting. No mester declara ganashi di casino na Belasting. Pakico ta pretende esaki anto. E abogado ta haya cu Fiscal no por prueba cu tin labamento di placa. El a conclui cu Hues mester declara P.S. liber y orden Fiscal cu tur e placanan confisca mester debolbe.

   Hues a sera tratamento di e caso y a bisa cu 5 Mei pa 8:15 am lo tin sentencia.