ORANJESTAD (AAN): E homber J.K. acusa di bendemento di droga, a scucha Fiscal exigi 6 aña di prison.
E acusacion cu Fiscal a presenta den Corte contra e homber J.K. ta cu e tabata bende marihuana y cocaina. Marihuana tabata entre November 2018 te November 2021. Cocaina tabata di 2016 te November 2021.
BENDEMENTO DI DROGA
Hues a puntra J.K. si e acusacion ta berdad. Segun J.K. e ta un adicto y tabata yuda hende cu cocaina. Hues a mustra cu tin yamadanan scucha di parti di Polis caminda hendenan tabata papia di pisca, coy 10, material. Tambe Hues a mustra cu J.K. tabata papia di weed. A base di esakinan, Polis a sospecha cu J.K. tabata bende droga.
HAYA DROGA DEN CAS
E unidad special di droga a bay haci un investigacion na e cas unda J.K. tabata keda San Barbola. E agentenan na e cas a haya holor fuerte di marihuana. Den e auto a haya droga scondi. Den e cas a haya piedra, 34,1 gram cocaina, 10 gram di marihuana, placa. A haya dos balanza, sefta, blade. J.K. a keda deteni e dia ey. Den un tas a haya 54,45 florin. Den cellular di J.K. a haya whatsapp di hendenan cu ta papia di sneeuw of blanco. Esey den e mundo di droga ta nifica cocaina. Tambe via tap, Polis a scucha hende papia di berde y cos di nanishi. Polis tin conocemento di e forma aki di papia cu ta relaciona cu droga.
YIU TA YUDA TATA BENDE DROGA
Hues a mustra cu un familiar di J.K. a declara cu el a mira J.K. prepara y bende droga. Segun e familiar, tur hende den vecindario sa cu J.K. ta bende droga. Su yiu muher mes tambe a declara cu su tata ta bende y e sa yuda su tata bende. E yiu muher tabata presente den sala di Corte y ora Hues tabata lesa su declaracion, por a mira cu e tabata sacudi su cabez mustrando cu no ta asina. Hues a mustra cu e yiu muher a declara na Polis cu su tata ta bendiendo pa 4 aña. E sa atende cellular di su tata pa yuda cu e bendemento. Segun e yiu muher, marihuana ta wordo bendi mas. El a bisa cu e sa papia cu cliente y topa nan riba caya. E ta yuda pisa y prepara marihuana pa bende.
SOSPECHOSO TA NENGA
Hues a mustra cu tin 8 persona cu a declara cu a cumpra droga for di J.K. Tin ta bisa cu desde medio 2018, nan tabata cumpra for di J.K. Tin un a bisa cu el a cumpra 60 biaha y otro ta bisa di a cumpra 250 biaha. J.K. ta desmenti esey. Hues a remarca cu segun J.K. tur hende ta gaña riba dje.
FISCAL
Fiscal a bisa Hues cu J.K. mes ta bisa cu e no tabata bende droga pero tin pruebanan cu ta mustra cu e tabata bende. Den su cellular, whatsapp ta mustra cu e tabata bende droga. Tin 5 cumprador cu a declara contra J.K. A haya cocaina y marihuana na e cas unda J.K. biba.
Fiscal a mustra cu J.K. su mesun yiu a declara cu J.K. ta bende. Na opinion di Fiscal, a keda legalmente proba cu entre November 2016 y 5 November 2021, J.K. tabata bende cocaina. Pa loke ta marihuana tambe a keda proba. Su mesun yiu y 5 cumprador a declara cu J.K. ta bende marihuana durante 2018 y 2021.
EXIGI CASTIGO
Pa cu e castigo, Fiscal a bisa cu droga ta trece hopi problema den famianan y crea criminalidad den comunidad. E ta haya cu J.K. a yuda den esaki, door di tabata bende droga. Teniendo cuenta cu e periodo largo cu J.K. tabata bende, Fiscal a exigi 6 aña di prison. Hues, despues di a scucha abogado, a bisa cu e ta bay studia e caso pa despues dicta sentencia.
