Siguiendo conseho di psicologo y psychiater
ORANJESTAD (AAN): Diabierna mainta via video conference Hues di Corte di Husticia a dicta sentencia den e caso penal cu Ministerio Publico a cuminsa contra Zuriel Celaire. Siman pasa Hues a tuma e decision cu e ta habri bek e caso di Izak Principaal pasobra e ta haya cu psychiater no a duna suficiente informacion. Ta asina cu tanto Izak como Zuriel nan caso a wordo trata hunto y tabata planea pa ayera Hues dicta sentencia. Fiscal a exigi maximo 6 aña di tratamento obligatorio den un institucion pa Zuriel y pa Izak el a exigi 11 aña di prison y despues tratamento obligatorio.
Diabierna mainta Hues a haya Zuriel culpable di e mayoria di e acusacionnan. Hues a bisa cu e ta sigui conseho di psicologo y psychiater caminda Zuriel lo mester haya tratamento obligatorio y cu ta aplica e ley hubenil.
Exigencia di Fiscal: Dia 24 Juni 2022, tratamento di e caso a tuma lugar caminda Fiscal a mustra riba e acusacionnan:
- •• E asalto arma dia 22 Mei 2021 riba e homber T. y e homber C. na su cas. Un grupo di 5 homber a asalta nan. Nan a bati’e y a bay cu e auto. Izak tabata arma cu machete y Zuriel cu bate di baseball. Tambe nan tabata den posecion di un arma di candela.
- •• Riba e anochi di 29 pa 30 Mei 2021, Izak y Zuriel a haci un drive by shooting na American Bar. E personanan W. a sufri herida di tiro den man y G. na pia. E personanan R. y H. tambe a resulta herida. Nan tabata para dilanti e bar y a scucha tiro y nan resulta herida. Tin testigo a mira Izak y Zuriel den auto Nissan. Imagen di video di seguridad ta mustra e auto pasa. Ta Zuriel ta esun cu a tira. Fiscal ta haya cu aki ta 4 biaha intento di asesinato. El a bisa cu tira cu arma riba distancia cortico riba un grupo di hende ta core risico cu hendenan por muri. El a mustra cu Zuriel y Izak a bay busca e arma despues di a pasa dilanti American Bar y a bay tira.
- •• E matamento di e dama Shayuri (19) riba 4 Juni 2021. Fiscal a bisa cu Shayuri a worde tira mata door di Izak. E ta haya Izak responsible di morto di Shayuri. For di investigacion por conclui cu e victima tabata para y tiro a alcanza den cabez. El a bisa cu tin diferente declaracion di e sospechosonan cu ta mustra cu accidental a tira. Fiscal a bisa cu e no ta kere esaki.
Fiscal ta haya Izak y Zuriel culpable di tur e acusacionnan. Ambos tabatin 17 aña ora di e incidentenan. Fiscal a bisa cu Hues, teniendo cuenta cu circumstancia, por aplica ley di adulto y no castigo hubenil.
Fiscal a bisa cu Izak y Zuriel tin casonan hopi serio di asalto cu violencia, e drive by shooting caminda a herida 4 persona y e tira mata di Shayuri. El a mustra cu psychiater ta avisa pa aplica castigo adulto pa Izak. Fiscal ta haya cu en principio e castigo hubenil no ta haci husticia pa tanto Izak como Zuriel. Pero den Zuriel e ta mira algo otro. Segun Fiscal, Zuriel ta mustra cu e kier cambia. El a bisa cu e meta di castigo ta pa proteha comunidad y evita cu e acusado ta ripiti loke el a haci. Tambe ta ofrece guia pa yuda e acusado.
Fiscal ta haya cu tratamento obligatorio lo por ta ideal. El a exigi pa Zuriel tratamento obligatorio cu por dura 6 aña sera den un institucion.
Sentencia: Hues a bisa cu e ta haya legalmente proba cu riba 22 Mei 2021 Zuriel a haci e asalto arma riba 2 persona na Brazil.
Riba 30 Mei 2021 Zuriel hunto cu Izak a tira 4 persona banda di American Bar. Esaki Hues ta considera complice di intento di asesinato. Zuriel ta esun cu a tira y Izak tabata na stuur. Tambe haya Zuriel culpable di posecion di arma di candela y bala.
Riba 10 Januari 2020, Zuriel a bringa cu e homber d.M. y maltrat’e. Riba 14 Januari 2020, Zuriel a menaza e homber H. cu cuchiu cu lo mat’e.
Hues tambe ta haya proba cu riba e anochi di 4 Juni pa 5 Juni 202, Zuriel tabatin hunto cu Izak un arma di candela, caminda Shayuri a fayece. Hues a reacciona riba defensa cu Zuriel no ta responsabel pa cu otronan a horta e auto di victima di asalto. Hues a remarca cu si Zuriel ta forma parti di e grupo, loke a sosode e ta culpable p’e tambe.
Casonan ta hopi serio: Pa cu e castigo, Hues a bisa cu e ta tene cuenta cu e casonan ta hopi serio. Casonan di asalto arma ta shock comunidad. Arma di candela por trece situacion peligroso cun’e. Hues a mustra cu Zuriel a tira 4 persona y danki Dios ningun a fayece.
Sigui conseho di psicologo y psychiater: Hues a bisa cu e ta tene cuenta cu raport di psicologo y psychiater kendenan ta haya cu Zuriel por wordo influencia liher y pesey no ta completo responsabel pa su actonan. Ambos a conseha pa pone Zuriel den un institucion pa e haya tratamento. Tanto psicologo como psychiater a conclui pa aplica castigo hubenil y bou guia pa evita cu Zuriel ta bolbe wordo influencia.
Hues a bisa cu e ta tuma conclusion y conseho di psicologo y psychiater. E ta haya cu e tratamento obligatorio ta na bienestar di Zuriel mes.
Castigo: Hues a condena Zuriel na 2 aña di tratamento obligatorio na un institucion na Hulanda. Despues di e 2 aña lo evalua si mester prolonga e tratamento of no. Hues a splica cu e tratamento mester ta na Hulanda pasobra ni Aruba y Curacao tin un lugar pa haci esaki.
Hues a aproba practicamente tur e demanda di daño di e victima di asalto T., cu ta mas o menos 4 mil florin. Hues a bisa cu pa esaki, henter e grupo cu a haci e asalto ta responsabel pa paga. El a pone medida di pago, caminda Ministerio Publico lo percura pa haci e cobranza.
Hues a bisa tanto Fiscal como e abogado di Zuriel, pa bisa Gobierno pa ehecuta e sentencia mas pronto posibel. Esaki pa evita loke a sosode no mucho tempo pasa caminda un preso cu tambe mester a haya tratamento obligatorio na Hulanda, a keda encarcela den KIA.
