E ta haya cu a atacha bon nomber y integridad di dama - \ORANJESTAD (AAN): Hues di Corte den Promer Instancia a ordena Nelson (Speed) Cabral de Andrade pa rectifica e acusacionnan inhusto haci riba Opheila B.
Algun siman pasa e dama Opheila B., representa pa mr. de Hoogd, a cuminsa un caso sumario contra Speed, cu a wordo representa pa mr. Illes. E demanda ta cu Speed durante su programa na radio di April 2012 a expresa cu ta Opheila a horta password y documento di Leoncita Arends y duna Otmar Oduber pa a usa den temporada di eleccion na 2017.
E abogado mr. de Hoogd a mustra cu door di e expresionnan haci door di Speed, 4 biaha Landsrecherche a bay na cas di Opheila pa haya informacionnan tocante e password pa cu e caso Avestruz siendo cu nada di esaki ta berdad.
SENTENCIA
Hues a dicta sentencia un siman promer cu e fecha stipula. Hues den su evaluacion di e caso ta rechaza e promer demanda di Opheila cu ta exigi pa prohibi Speed pa relaciona cu e investigacionnan penal den caso Avestruz, publica cualkier texto cu Opheila su nomber aden.
Hues ta haya cu Speed, tambe den su funcion como periodista, mester tin e libertad pa por haci critica, opina y informa tocante e investigacionnan penal Avestruz y tambe Opheila. Esaki semper y cuando cu tin base legal.
LIBERTAD DI EXPRESION
Hues su opinion riba e demanda di rectificacion ta, cu tin libertad di expresion. Hues a mustra cu ora ta trata di prensa, esaki mester ta cuidadoso cu no ta tacha e integridad di un persona.
ACTUA INHUSTO
Hues ta haya cu den e caso aki, Speed a actua inhusto pa cu Opheila door di publica cosnan cu Speed a tende, sin bay busca reaccion di Opheila, promer cu el a haci esaki.
Hues ta haya cu Speed a tacha seriamente e integridad y bon nomber di Opheila. Hues tambe ta haya cu Speed a actua inhusto pa cu Opheila door cu Opheila a desmenti categoricamente e acusacionnan haci door di Speed.
RECTIFICA
Hues a ordena Speed pa rectifica: “Den sentencia duna door di Hues den casonan sumario na Corde den Promer Instancia di Aruba, mi a wordo condena pa duna e siguiente rectificacion via radio:
Den mi programa di radio Enfoque di dia 19 di April 2021, mi a bisa tocante señora Opheila den cuadro di e investigacion penal Avestruz entre otro:
- Cu Opheila durante un bishita na cas di Leoncita a podera passwords di su computer personal ;
- Cu Opheila durante eleccion na 2017 a reparti pamfletanan/corantnan den cual e ta Leoncita di practicanan dudoso relaciona cu terenonan erfpact cu ta pertenece na Pais Aruba;
- Cu Opheila ta un trahado cu ta funciona malo;
Mientras cu mi no por prueba loke mi a bisa cu hechonan. Cu e mensahe aki mi ta actua conforme e sentencia:”
Ademas Hues a fiha un daño per huicio di 1000 florin pa cada dia cu Speed keda sin publica e sentencia aki, te na un maximo di 100 mil florin.
