ORANJESTAD (AAN): E homber Arubiano W., a para riba den Corte cu e no a viola su señora. Fiscal si ta haya legalmente proba cu W. a maltrata y viola su señora y a exigi 2 aña di prison.
Abogado mr. Cafarzuza a cuestiona na Hues cu KZP no a haci investigacion pa bin cu prueba cu realmente tabatin violacion.
ACUSACIONNAN
E acusacionnan cu Fiscal a presenta den Corte contra W. ta cu dia 25 October 2020, el a viola y maltrata su señora. Tambe Fiscal ta acusa W. cu dia 17 November 2019, W. a maltrata su señora door di gar’e na garganta y dal’e den cara. E victima B. a presenta den Corte cu abogado mr. Fraser.
MALTRATA DAMA
Relaciona cu e acusacion di 17 November 2019, W. a bisa Hues cu el a mira B. cu un otro hende. El a bisa B. cu awor e tin un otro hende y a cana bay. Hues a bisa cu segun raport di Polis, 9.20 di mainta B. a presenta na warda di Polis pa haci denuncia. El a bisa cu na parada di bus, W. a gar’e na su garganta y dal’e na cara. Polis a constata cu B. tabatin un banda di cara hinca y garganta cora. E tabata yora y a bisa cu e tabatin dolor.
Hues a mustra cu B. a declara na Polis cu nan tabata casa pero separa. Ora el a caba di traha 17 November 2019, el a bay parada di bus. El a mira W. pasa den auto. El a bolbe y B. a ripara cu W. tabata bou influencia. W. a puntra pa e mira su yiu y B. a nenga. W. a bisa B. pa bay cun’e y e momento ey un homber a bin y puntra B. si tin problema. B. a bisa e homber cu tin problema y no bay. W. a baha y bisa e homber cu si e kier problema. E homber a cana bay. W. a gara B. na garganta y dal’e. Despues B. a core bay Polis. El a bisa Polis cu e tin masha miedo di W. Dokter a constata cu B. tabatin un marca blauw na cara.
Hues a bisa cu W. a declara na Polis cu el a mira B. ta cana cu un homber. El a bay puntra e homber cu si nan tin algo cu otro. Promer cu e homber a bisa algo, B. a para meymey di nan dos. E momento ey W. a gar’e na su garganta. Segun W. e no a gara B. na garganta sino a push’e na pecho. El a bisa Hues cu e no a bisa Polis cu el a gara B. na su garganta. El a bisa Hues cu el a bisa Polis cu loke ta para no ta cuadra y Polis a bis’e cu e tin cu firma. E ora ey el a firma.
VIOLA DAMA
E caso di 25 October 2020, ta sospecha W. di a maltrata B. y obliga B. pa tin relacion sexual cun’e. Hues a puntra W. kico a pasa. Tabatin celebracion di hacimento di aña di un yiu di B. Ora cu tur hende a bay, a surgi un discusion entre W. y B. W. a bisa Hues cu e relacion no tabata bon y el a bisa B. cu e tin 9 dia pa nan separa. B. lo a laga sa cu ningun hende por sak’e for di e cas. Den patio pafor nan a cuminsa pleita. Despues den camber, segun W. el a bay pa drumi, e klechi a slip y el a dal su cabez duro contra muraya. El a dal B. un wanta den cara. Un rato despues Polis a yega. El a bisa Hues cu no tabatin relacion sexual. Segun W., ora e ta rabia e no por tin relacion. El a desmenti di a viola y menaza B.
Hues a bisa cu segun raport Polis, 25 October 2020 un mucha a yama bisa cu su padastro ta maltratando su mama. Nan bay Turibana y mira B. cu su cara hopi hincha, su casi wowo robez blauw, boca cu herida y hincha. B. a bisa cu el a wordo maltrata door di su casa kende ta kere cu B. no ta fiel. W. lo a controla B. su cellular y ora el a mira potret for di tempo cu nan no tabata pareha, a dal B. E yiu di B. a bisa cu el a mira W. dal su mama cu e mama su cellular.
- a declara na Polis cu den camber, W. a maltrat’e y a viol’e masha bruto. Segun B., no ta promer biaha cu esaki ta sosode. E tabata yora y a bisa cu e tin hopi dolor.
Ta asina cu entretanto nan a divorcia. W. tin un yiu cu B. pero B. tin mas yiu. Hues a mustra cu na Januari 2021 W. a wordo laga liber bou di e condicion cu no tuma contacto cu B. Door cu el a haci’e na Maart 2021, el a bolbe wordo sera na KIA. Reclasering a mustra cu e chens cu W. ta bolbe haci’e ta halto. Reclasering a mustra cu W. no ta reconoce cu e tin problema. Reclasering ta conseha Hues pa W. haya guia psicologico y curso pa control di agresion.
DEMANDA DI DAÑO
Abogado mr. Fraser a haci demanda di daño contra W. El a bisa cu B. ta ilegal na Aruba y no tin AZV. E demanda di daño ta e gastonan di ambulance, Promer Auxilio na hospital y cu B. mester a bay biba otro caminda.
FISCAL
Fiscal a bisa Hues cu e maltrato na 2019 ta legalmente proba. Polis a mira cu e victima su cara tabata hincha y garganta tabata cora. E caso di violacion na October 2020, Polis a bay e cas y a mira e victima cu cara hopi hincha y tabata yora. E yiu a bay pafor y bisa cu el a mira cu W. a maltrata su mama. Fiscal a bisa Hues cu e victima B., a declara na Polis na yoramento y histerico cu el a wordo maltrata y viola. Hasta KZP a wordo envolvi pa haci investigacion riba violacion. E mucha a bisa cu e tabata scucha su mama ta bisa pa stop y na dado momento el a mira su mama cu cara tur hincha y e mama a bis’e pa yama Polis. Fiscal a bisa cu e no ta kere W. cu no tabatin relacion sexual.
Pa cu e castigo, Fiscal a mustra cu W. tabata hopi violento cu su ex pareha y e muchanan a mira esaki. E muchanan mes tabata teroriza. Fiscal a bisa cu awor por scucha cu W. ta dispuesto di haya ayudo. E ta haya cu esaki ta necesario. Fiscal ta kere den castigo combina pa asina forza W. haci tratamento. El a exigi 3 aña di prison di cual 1 aña ta condicional cu 2 aña di prueba caminda mester sigui instruccionnan di Reclasering.
Pa loke ta e demanda di daño, Fiscal ta haya cu no por inclui pagamento di huur. Si e ta haya cu W. mester paga e tratamento. Esey ta sali algo mas cu 1200 florin.
ABOGADO
Mr. Cafarzuza a bisa Hues cu e ta haya cu investigacion ta mustra cu no tabatin muestra di violacion. KZP lo tabata kier haci mas investigacion pero no a haci nada. No tin prueba concreto cu tabatin violacion. W. ta admiti di a dal B. un wanta den cara y cu e relacion no tabata bon. E abogado a bisa cu W. ta desmenti cu el a dal B. cu mokete na cara. E abogado a remarca cu no ta manera ta pretende cu W. lo a dal diferente biaha cu mokete. Si tabata asina, B. lo a sufri lesionnan hopi mas serio. E abogado a sigui bisa cu e no ta haya proba menaza y tampoco violacion. Na opinion di e abogado, no tin suficiente prueba di sosten. E abogado a mustra Hues cu no ta solamente W. a yama B. ora el a wordo laga liber pero B. tambe a purba yama W. El a mustra cu W. a yama B. pasobra e kier a mira su yiu. Abogado ta conclui cu no por prueba violacion. El a bisa cu W. ta dispuesto pa haya ayudo. E mes no ta realisa cu e mester di ayudo pero e ta dispuesto pa haya ayudo. Pa loke ta demanda di daño, no por bay exigi pa paga huur. W. ta dispuesto pa paga gastonan di hospital cu ta mas o menos 800 florin.
Hues a sera tratamento di e caso y a bisa cu e lo bay studia e caso y dia 2 Juli 2021 e lo dicta sentencia.
