El a wordo gara na aeropuerto - ORANJESTAD (AAN): E muher Arubiano J.G., a presenta dilanti Hues pa duna cuenta pa e delito cu el a haci.
E ta worde acusa di exporta cocaina. Hues a condena J.G. na 12 luna di prison di cual 6 luna ta condicional cu 3 aña di prueba.
MULA DI DROGA
Hues a mustra cu segun e raport di Polis, dia 10 December 2020 a detene J.G. na aeropuerto pasobra a hay’e cu cocaina. Douane a haya den e tas di J.G., 4 bolita y un bolita mas grandi cu ta hinca na parti abao. A resulta cu J.G. tin bolitanan guli.
El a saca 21 bolita. Den e bolita grandi tabatin 9 bolita. En total a confisca 34 bolita, cu a pisa 325,7 gram di cocaina. E intension tabata pa J.G. hiba e droga Hulanda.
Durante interogacion, el a menciona e homber M.F. cu lo a bis’e cu e lo por haya placa facil. Un tal Tio lo a facilita 35 bolita na J.G. pero e no por a guli tur. Hues a puntra J.G. pakico a haci’e. El a bisa cu e ta biba cerca su mama y padrastro pero no por bisa Hues pakico a haci’e.
FISCAL
Fiscal a bisa cu e ta haya legalmente proba cu J.G. a transporta droga. Fiscal ta haya cu lo por tin mas tras di esaki. Por bien ta cu tin un organisacion tras di esaki. E ta preocupa cu esaki. Fiscal ta spera cu J.G. lo stop cu esaki y sigui un otro caminda. Fiscal a bisa cu e tin e sentimento cu J.G. lo ta den problema. El a mustra cu droga ta causa hopi problema. Fiscal a exigi 12 luna di prison di cual 3 luna ta condicional cu 2 aña di prueba.
ABOGADO
Abogado mr. Scheper a bisa Hues cu J.G.(22) no tabatin trabao door cu el a kibra su rudia cu mester a wordo opera. Su supuesto bon amigo, a ofrece pa transporta droga pa e haya placa. Den su inocencia el a cay den e gara di traficantenan. Por a mira cu J.G. tabata yora ora abogado tabata papia. Ta asina cu J.G. a wordo menaza door cu e droga no a yega Hulanda. El a pidi Hues pa haci e parti condicional mas grandi pa asina J.G. por sali mas tempran.
Hues a sera tratamento di e caso y a dicta sentencia di biaha. Hues ta haya legalmente proba cu J.G. a exporta cocaina. Pa cu e castigo, Hues a bisa cu e ta tene cuenta cu droga ta trece tristeza y problema. El a tene cuenta cu ta promer biaha cu J.G. ta cay sera pa algo asina. Hues a condena J.G. na 12 luna di prison di cual 6 luna ta condicional y 3 aña di prueba.
