Hues a confirma exigencia di Fiscal --- ORANJESTAD (AAN): Diaranson mainta, via video conference, Hues di Corte den Promer Instancia a confirma e exigencia di Fiscal pa e homber P.,
kende ta wordo haya culpable di a maltrata y viola cu pareha. Hues a condena P. na 42 luna di prison di cual 10 luna ta condicional cu un tempo di prueba di 3 aña. Tambe Hues pone prohibicion pa P. drenta den contacto cu O.
- no a keda nada contento cu e sentencia y por a scucha e expresa cu e ta bay apela e sentencia.
FISCAL A BAHA PISA
Dos siman pasa, tratamento di e caso a tuma lugar caminda Fiscal a bisa Hues cu e ta haya legalmente proba cu P. a viola e dama O. cu violencia riba 14 April 2021. Na opinion di Fiscal, P. mes ta admiti di a dal O. na cabez y pia. Tambe P. a bisa cu nan tabatin relacion sexual.
Fiscal a remarca cu por mira e mesun comportacion di P. na 2019, ta ripiti dia 14 April 2021. El a mustra cu na 2019, P. a kibra e bentana di cas di mayor di O. y a maltrata O. dilanti su mama. Dia 23 Januari 2019, tabatin otro caso di maltrato di O. Tur e maltratonan aki ta relaciona cu e hecho cu P. ta pensa cu O. tin relacion cu un otro homber. Fiscal a mustra cu e mama di P. a remarca cu P. ta kere cu O. ta su propiedad. Fiscal ta haya cu P. ta kere cu e tin dominio riba O. Pa loke ta demanda di daño, Fiscal ta haya cu e ta hopi fastioso pa determina un suma pa un dama cu a keda afecta. E ta haya cu e suma di 5 mil florin, pa un dama cu a wordo viola ta acceptable.
Pa cu e castigo, Fiscal a tene cuenta cu e carchi di castigo di P. cu ta mustra cu P. ta un recidivista pa maltrato. Fiscal ta haya cu ta parce cu e curso di regula agresion no a yuda. Fiscal ta haya cu mester duna P. un señal bon cla cu e no mester acerca e dama O. mas. E ta kere cu via abogado lo mester regla pa cuestion di e yiunan. Fiscal a exigi 3 aña y 6 luna di prison di cual 10 luna ta condicional cu un tempo di prueba di 2 aña. Fiscal tambe a exigi pa prohibi P. di tin contacto cu e dama O.
SENTENCIA
Ayera mainta Hues via video conference, a dicta sentencia. E acusado P. tabata den un oficina na KIA, mientras abogadonan mr. Hart y mr. Tromp tabata den sala di Corte hunto cu Fiscal y Hues.
Hues a bisa cu e ta haya legalmente proba tur e acusacionnan contra P. Hues a mustra cu P. a maltrata e dama O. diferente biaha. E caso mas serio tabata esun di 14 April 2021 caminda P. a maltrata e dama O. y despues a viol’e. Hues a bisa cu P. a admiti di a dal O. algun wanta na cabez y mokete na pia, despues di a coy O. su cellular. P. tambe a admiti di a tene relacion sexual cu O. Hues a sigui bisa cu e dama O. a gaña P. cu e ta bolbe cun’e. Asina e dama O. por a bay den su auto te na cas di su ruman muher y sera porta pa P. E ruman muher di O. a sali pafor pa P. cu un palo di golf. Hues a mustra cu e raport di dokter ta mustra cu O. a sufri slanan y tabata hopi afecta.
Pa cu e castigo, Hues a tene cuenta cu P. a viola su ex pareha O. Esey por tin consecuencia psychico pa O. Hues a tene cuenta cu castigo cu Hof ta duna. El a confirma e exigencia di Fiscal 42 luna (3 aña y 6 luna) di prison di cual 10 luna ta condicional cu un tempo di prueba di 3 aña. Tambe Hues a prohibi P. pa drenta den contacto cu O. y cu P. ta cay bou guia di Reclasering. Hues a aproba e daño material na 2500 florin envez di 5 mil florin. Hues a bisa cu e resto ta wordo declara no admisibel y e dama O. por cuminsa un caso civil. Hues tambe a pone medida di pago contra P.
ACUSADO TA APELA
Por a mira cu P. no tabata contento cu e sentencia. Despues cu Hues a bis’e cu e tin 2 siman pa pensa si e ta apela, el a expresa den un tono rabia cu e ta apela. Tempo lo mustra si e caso aki ta bay Corte Superior of no.
