Fiscal a exigi entre 3 luna y 2 aña di prison --- ORANJESTAD (AAN): Den Corte di Husticia a trata e caso penal cu Ministerio Publico a cuminsa contra dos muher y un homber.
Nan ta forma parti di un operacion cu e muher C.B. tabata na cabez y ta percura pa muhernan di Colombia ta yega Aruba y ta drenta e isla. Despues nan tabata bay traha p’e na su bar. E tabata facilita e muhernan di Colombia pasashi, estadia na hotel y placa ora nan yega pa asina Inmigracion laga nan pasa. Despues nan ta keda ilegal trahando den e bar di C.B.
E acusacion cu Fiscal a presenta contra e acusadanan Colombiano biba na Aruba C.B. y M.P., ta cu entre Mei 2019 y Juni 2020, nan a percura pa 12 dama di Colombia drenta Aruba. E homber H.F. ta wordo acusa di traficacion di hende entre 10 Juli 2018 pa 2 November 2019, caminda el a yuda 8 dama drenta Aruba.
Regla pa muhernan drenta Aruba: Hues a puntra e acusada C.B. (Mami) si el a yuda e muhernan drenta Aruba door di reserva hotel y duna nan placa pa asina na Aeropuerto nan por wordo admiti.
Aki C.B. a bisa cu el a yuda algun dama pa bin Aruba. El a bisa cu no ta tur. Tin dos muher di Venezuela cu a bin Aruba cu boto e no a yuda.
Muhernan ilegal traha den Bar: Hues a mustra cu C.B. ta doño di un club nocturno. Dia 20 Januari 2019 Guarda Nos Costa (GNC) a tene control na bar. Tres muher a declara cu nan tabata tene relacion sexual pa pago y ta huur camber for C.B.
Hues a mustra cu na 2019 info a drenta informacion cu tin prostitucion ilegal na e club nocturno di C.B. Tambe a haya informacion cu na Driemasterstraat un auto tabata baha muhernan pa haci prostitucion.
Duna muhernan placa pa drenta Aruba: Un muher B.C. di Colombia a declara na Polis, Mami tabata percura pa hendenan di Colombia drenta Aruba. E tabata duna nan entre 1.000 y 1500 Dollar pa asina nan por drenta y despues traha pa Mami pa paga bek e placa di pasashi.
E acusada Mami tabata regla hotel y tabatin un persona na Aeropuerto cu ta duna personanan placa. Door di esey nan ta pasa via Inmigracion. Mami tabatin un cas na Madiki caminda e muhernan ta keda, y tambe un apartamento na Driemasterstraat. Mami tabata busca nan y hiba nan na e bar.
E acusada B.C. a bisa cu e mester a paga bek 2 mil Dollar di pasashi. Den smartphone di B.C., Polis a haya chatnan cu Mami. Mami a pidi potret den bikini y regla tur cos pa muher bin Aruba October 2019 pa traha den Bar como prostituta. A puntra B.C. si e ta 100 porciento sigur cu e kier haci e trabou. B.C. a bisa cu si. El a bisa B.C. potret con e ta bisti pa ora e yega e ta wordo reconoci pa e haya e placa pa demostra na Inmigracion.
Empleado na Aeropuerto envolvi: E persona cu tabata duna e placa na e muhernan ta e homber H.F. E tabata traha na General Aviation y Mami tabata dun’e 100 Dollar pa e facilita e muhernan placa.
Den Aeropuerto, promer cu e muhernan yega na Inmigracion, H.F. tabata facilita nan e placa na un forma scondi. H.F. a admiti di a duna B.C. 2 mil Dollar riba peticion di Mami. Pa cada vez cu haci’e, e ta haya 100 Dollar.
Instrui muhernan con pa actua: Mami a instrui e muhernan aki detayadamente con nan mester yega y papia na Inmigracion di Aeropuerto. E acusada M.P. a splica B.C. con e mester check-in na Aeropuerto di Colombia pa viaha bin Aruba. Mami a instrui B.C. cu ora e yega Aruba e mester delete tur e mensahenan riba smartphone.
Hues a puntra Mami pakico el a instrui B.C. pa haci esey. El a bisa cu tin biaha nan ta kita smartphone na Aeropuerto y lo mira e combersacionnan. Dia 4 di Mei 2021 Mami a wordo deteni y a haci investigacion na su cas na Tanki Leendert.
El a admiti di a duna H.F. e suma di 2 mil Dollar riba peticion di Mami. Pa cada vez cu haci’e, e ta haya 100 dollar.
Huur cas cu e muhernan: Mami a splica cu el a huur un cas den Driemasterstraat y tabata huur e cas cu dos muher. E prijs tabata inclui cu nan ta haya cuminda. E muhernan tabata traha den e bar di Mami y tabata haya comision ora nan ta bebe cu clientenan.
Ariba e bar tin 2 camber caminda e muhernan tabata practica prostitucion. Mami tabata cobra 25 Florin pa cada vez nan usa un camber. Fiscal a mustra cu e cas tabata wordo usa for di Februari 2019. Mami a bisa cu esey no ta berdad. El a bisa cu el a huur e cas special pa B.C. na October 2019.
Hues a mustra cu for smartphone di M.P. a haya chat cu Mami. M.P. su yiu muher a bin Aruba y M.P. a yud’e pa e drenta Aruba pa vacacion. Segun M.P. el a regala su yiu pasashi pa bin Aruba pasobra esey ta su yiu su soño.
M.P. a pidi H.F. placa y door cu M.P. a para garantia, e yiu no mester a demostra placa. Segun M.P. el a viaha bay Colombia busca su yiu pa bin cun’e Aruba, y esey tabata Juli 2018 te cu Augustus 2018. Mami lo a facilita M.P. 3 mil Dollar via H.F. pa pasa Inmigracion.
Hues a mustra cu tin chat entre Mami y dos muher di Colombia. H.F. a facilita na Aug. 2019 un cu 1.000 y e otro 1.200 Dollar cu el a haya for di Mami. Nan a bin pa keda traha den e bar. E mesun proceso a wordo usa esta nan estadia na un hotel y nan ta haya Dollars pa demostra na Inmigracion. M.P. a splica nan con nan mester check in na agencia y print e reservacion di ticket y estadia di hotel pa mustra na Inmigracion.
Exigencia di Fiscal: Fiscal ta haya legalmente proba cu C.B. (Mami) a regla pa 12 dama di Colombia drenta Aruba y keda traha ilegal. Tambe cu e prima di Mami, M.P. a yuda den esaki. Fiscal ta haya e homber H.F. a yuda Mami den su plan pa laga ilegalnan drenta, door di duna nan placa pa asina demostra na Inmigracion cu nan tin placa pa estadia.
Fiscal a exigi 2 aña di prison pa Mami, 15 luna di prison pa M.P. y 3 luna di prison pa H.F. Tambe el a exigi pa H.F. 120 ora di trabao comunitario y si e no cumpli cu esaki, e lo mester bay 60 dia sera den KIA. Esaki ta nifica cu H.F. no mester bay bek KIA ya cu el a sinta caba 3 luna.
Hues a bisa cu e ta bay studia e caso y dia 7 di December 2021 lo tin sentencia.
