ORANJESTAD (AAN): Den Corte di Husticia a trata un interesante caso di cumpra empleado di Belasting. Ministerio Publico a acusa e dama G.T. di a cumpra e empleado di Belastin d C.
Ta asina cu e dama G.T. ta para riba cu e no a cumpra e homber d C., mientras cu d C. ta desmenti categoricamente di lo a haci cosnan pa G.T. cobra placa.
E acusacion di Fiscal ta cu d C. entre 1 Juli 2018 y 1 December 2018 a laga su mes wordo cumpra door di e dama G.T. pa laga G.T. haya mas di 40 mil florin di Belasting y tambe cancela cobranzanan di Belasting pa G.T. G.T. ta wordo acusa di a paga d C.
SOSPECHOSO TA NENGA
Segun d C. no ta asina cu el a haya placa di G.T. El a desmenti e acusacion di a wordo cumpra. Tambe el a desmenti cu lo a bypass computer pa G.T. haya placa bek di belasting. El a bisa cu tur e cosnan cu el a haci tabata cu bendicion di su hefe. Ta asina cu d C. y G.T. ta bisiña. Hues a mustra cu G.T. a bay belasting pa cobra placanan pero na belasting a confront’e cu tin cobranzanan bieu y mester regla eseynan. Segun d C. tin dos di e cobranzanan a caduca y a regla esey den computer cu autorizacion di su hefe.
Hues a bisa cu e ta haya cu for di e investigacion no ta mustra cu d C. a actua contra su trabao. Hues a mustra cu un empleado di Belasting a señala cu d C. a haya placa pa a regla cu G.T. a haya algo mas cu 40 mil di Belasting. Hues a mustra cu G.T. lo a paga d C. 1100 florin. El a mustra cu tin hendenan a bisa cu d C. lo a cobra pa su trabou pa regla e placanan cu G.T. mester a haya. G.T. a bisa cu nan ta pensa asina pero no ta asina. Ta asina cu Belasting a recalcula e pagamento y a manda cobra bek algo mas di 20 mil florin for di cuenta di banco di G.T.
G.T. a bisa Hues cu e caso aki a traha hopi riba dje y mester a bay psicologo pasobra e no por a kere cu d C. a wordo suspende y kita. El a bisa cu el a keda mantene su declaracion na Landsrecherche cu el a duna placa pero e ta duda di lo a duna d C. envelop cu placa. El a bisa Hues cu e no a paga pa haya placa. E tabatin intension di paga pero ta duda cu realmente el a paga. El a bisa cu e no kier tin riba su consenshi cu d C. ta perde su trabao.
TA PROHIBI PA PAGA EMPLEADO
Hues a mustra cu diferente biaha G.T. a declara na Landsrecherche cu el a duna placa. Por bien ta cu ta costumber di duna algo na hende cu a yuda. Sinembargo como Hues y cu buki ley den man, e ta prohibi pa duna ambtenaar placa. Esey ta wordo considera como cumpra.
FISCAL
Fiscal a bisa cu e ta haya cu d C. a regla pa G.T. haya placa for di Belasting. Awor por tende G.T. bisa cu e ta duda di a paga d C. Fiscal a bisa cu e no ta duda cu G.T. a paga. Fiscal a mustra cu no por duna un empleado di Gobierno placa pasobra esey ta contra ley. Esey ta wordo considera como cumpra un ambtenaar. G.T. a cumpra un empleadonan di Belasting pa a haya placa. Esey ta causa daño na Belasting. El a tene cuenta cu e caso aki ta trahando ainda riba G.T. Fiscal a exigi pa G.T. 80 ora di trabao of 40 dia di prison. Tuma d C. na malo cu e ta keda desmenti y no ta mira e seriedad di e caso. Caso asina ta duna mal imagen di empleadonan di Gobierno. Pa d C., Fiscal a exigi 90 dia di prison di cual 88 dia ta condicional cu 2 aña di prueba. Ademas Fiscal a exigi 140 ora di trabou of 70 dia prison. Tambe Fiscal a exigi un multa di 5 mil florin of 100 dia sera.
ABOGADO
Abogado mr. Thielman a bisa cu G.T. a bay Belasting pa regla asuntonan atrasa. Na dado momento el a topa d C. eynan. Despues el a haya un cantidad di documentonan di cobranzanan y el a bay cerca bisiña d C. pa haya splicacion kico tur esakinan ta. G.T. a compronde for di e otro empleado cu e lo mester haya 47 mil florin di placa mientras cu d C. a bisa cu e ta kere cu tur cos lo keda regla y cu G.T. lo no haya placa pasobra ta desconta tur e debenan. E ora ey e otro empleado di Belasting a laga d C. encarga cu e caso. Ta asina cu e hefe tabata na altura di tur esaki y cu aprobacion di e hefe a haci areglonan. No ta haya cu G.T. lo a cumpra d C.
Abogado mr. de Hoogd a bisa Hues cu e pregunta cardinal den e caso aki ta si: 1., d C a pidi G.T. placa 2., si d C. a haya placa for di G.T. Tur dos pregunta e contesta ta no. E ruman muher di G.T. lo a mira mensahenan whatsapp y a bay Belasting y haci denuncia. No tin e mensahenan mas y awor mester bay tras di interpretacion cu lo tin. El a mustra cu d C. trahando 30 aña na Belasting a perde su trabao siendo cu el a cumpli cu su trabao cu aprobacion di su hefe. Ningun momento el a ricibi placa. E abogado ta haya cu mester declara d C. liber.
SENTENCIA
Hues a sera tratamento di e caso y a dicta sentencia di biaha. Hues ta haya cu G.T. a bay regla asuntonan di belasting y a wordo yuda pa un empleado. Na dado momento d C. tambe a wordo envolvi y cu ayudo di coleganan a regla cu G.T. a haya placa. Hues no ta haya cu d C. a viola reglanan di trabou. For investigacion ta mustra cu G.T. a paga d C. pa a yuda haya placa di Belasting. Haya cu e forma aki di actua pa cu empleado di Gobierno ta un violacion. Normal hendenan ta paga esnan na supermercado pa yena saco of yuda hiba saco. Pero pa empleadonan di Gobierno esaki ta wordo considera cumpra. Hues a bisa cu mester por confia empleadonan di Gobierno ta haci nan trabou corecto.
Departamento di Impuesto mester ta integro y no por tin cosnan ta sosode. El a confirma exigencia di Fiscal pa G.T. Hues ta haya cu d C. a wordo hopi afecta door di e caso aki. E no a sigui Fiscal pa pone un multa. Hues ta haya cu mester manda un señal bon cla pa comunidad cu no por duna regalo ni placa na un empleado di Gobierno pa haci su trabou. El a condena d C. na 3 luna di prison condicional cu 2 aña di prueba y 140 ora di trabao kitando 2 dia cu e tabata cera for di esaki.
