Homber cu a abusa di su iha di 4 pa 5 aña 70 biaha condena na 9 aña di prison

Cera na Bonaire el a scucha su sentencia

ORANJESTAD (AAN): E homber G. sera na Bonaire pa su seguridad, via video conference a scucha Hues diabierna mainta confirma e exigencia di Fiscal di 9 aña di prison. Ta asina cu G. di 23 aña ta padrino di e mucha S. y a abusa di e criatura no menos cu 70 biaha.

   Abusa 70 biaha di mucha:  Algun siman pasa tratamento di e caso a tuma lugar caminda Fiscal a bisa cu e caso aki ta haci un impacto hopi grandi den comunidad y famia di e victima.

   E caso a cuminsa na Juni 2021 ora cu e mucha S. a bisa Polis cu el a worde abusa. E victima a conta den detayes cuanto biaha el a worde abusa. E acusado G. mes a admiti di a abusa di S. 70 biaha. Fiscal ta haya cu tur loke e mucha a describi con el a worde abusa, ta proba, aunke cu G. ta bisa cu e no a penetra S. di patras.

   Fiscal ta haya cu G. a viola y forza S. di tin relacion. El a mustra cu tabatin un diferencia di edad di 18 aña. E mucha 4-5 aña y e sospechoso 23 aña y ta obvio e abusador G. tin dominio. Fiscal ta di opinion cu G. como padrino a abusa di su iha. E ta haya cu G. a abusa di e confianza cu e mayornan di e victima a pone den G.

   Pa loke ta e periodo den cual e violacion a tuma lugar, Fiscal ta haya esaki a sosode durante 4 aña. E ta menos cu loke ta acusa G. di dje pero ta un periodo hopi largo. Fiscal a bisa cu ni cuanto castigo cu exigi no ta kita e dolor cu e victima ta pasando aden y e famia. Fiscal a mustra cu entre 2015 y 2019, G. a viola e mucha S. cu tabatin entre 5 y 9 aña.

   El a abusa di e confianza cu e mucha y famia tabatin den dje. Ta conoci cu violacion ta afecta e victima pa hopi tempo. Tin raport ta mustra caba cuanto tratamento e victima mester haya. Fiscal a exigi 9 aña di prison. Pa loke ta demanda di daño, Fiscal ta kere cu por aproba 5 mil Florin y e resto lo declara no admisibel pero e mayornan por cuminsa un caso civil. Fiscal ta haya cu no a presenta prueba pa hustifica e daño.

   Sentencia:  Hues a bisa cu e ta haya legalmente proba cu entre 1 Januari 2015 y 31 December 2019 varios biaha G. a tene relacion sexual cu e mucha S. cu tabatin entre 4-5 aña.

   Hues a bisa cu G. ta e mucha S. su padrino y tabata mira pa S. ora e mama tabata bay traha. Hues a bisa cu e ta rechaza e declaracion di G. esta cu e mucha S. mes tabata kier. Hues ta haya cu G. a forza e mucha tene relacion. Hues ta haya cu tin prueba di sosten. El a mustra cu e mucha S. tabata sconde bou cama pa no bay cerca G. Na 2019, S. no tabata kier bay cerca G. mas.

   Castigo:  Pa cu e castigo Hues a bisa cu e ta tene cuenta cu seriedad di e caso. E ta haya cu G. a abusa di un mucha cu tabata confia den G. Durante 5 aña a abusa di e mucha. Raport psycologo ta haya G. ta responsabel pa su actonan. Raport psycologico ta mustra cu e victima mester haya hopi tratamento pasobra el a keda afecta.

   Hues a bisa cu a subi castigonan pa casonan di abuso y inmoralidad. El a tene cuenta cu e mucha mes a bay bisa Polis cu el a worde abusa. Hues a confirma exigencia di Fiscal y a condena G. na 9 aña di prison. Pa loke ta e daño material, Hues a aproba 10 mil Florin y e resto a worde declara no admisibel cu chens cu e mayornan por cuminsa un caso civil.

   Riba potret por mira e Prison di Bonaire.