ORANJESTAD (AAN): E dos sospechosonan Zuriel Celaire (18) y Izak Principaal (18), no solamente mester responde pa e lamentable caso di tira mata Shayuri Petronia den Flamboyanstraat, sino tambe pa diferente otro caso penal.
E caso mas lamentable tabata e forma con a tira mata e dama hoben Shayuri Petronia.
Promer cu e caso ey tabatin un caso di tiramento den San Nicolas banda di American Bar, caminda Zuriel a usa e arma di Izak y los tiro riba un grupo di hende para banda di American Bar. Esey a causa cu 4 persona a resulta herida caminda 2 a bay ImSan pa haya tratamento. Manera DIARIO a publica, e caso den su totalidad a keda pospone pasobra Fiscal kier pa tin un raport di psychiater.
TIRAMENTO: Un di e acusacionnan contra Zuriel y Izak ta cu riba 30 Mei 2022, Zuriel a los tironan riba un grupo di hende den Caya Captain Rodgers caminda 4 persona a resulta herida, mientras cu Izak tabata core e auto.
Hues a puntra Zuriel kico a sosode. Zuriel a bisa Hues cu tempo cu e tabata sera 6 luna den KIA, el a haya hopi problema den e seccion di hubentud. Na Februari 2021, Zuriel a sali liber y a haya problema cu dos persona cu antes tabata amigo di dje pero a bira enemigo di dje den KIA.
Segun Zuriel, un anochi el a caba baha su amiga na cas y tabata bayendo cas y a mira un Nissan March cu lusnan paga ta sigui su tras. El a bay cas di un amigo Carlito y bayendo pa cas di Izak, nan ser’e y un di nan a los varios tiro na banda di pasahero. El a bisa cu ta J.K. a tira.
El a bay na cas di Izak y a mustr’e con nan a tira riba dje. El a bisa Izak y Carlito pa nan bay busca e hendenan ey, pero nan a bis’e pa no haci’e. Ora el a yega cas, el a bisa su mayornan kendenan kier a haci denuncia. Ta asina cu Zuriel no a bay haci denuncia.
El a bay den buelta cu Izak y patras di American Bar el a mira esnan cu a tira riba dje, na auto para. Nan a pasa bay y bolbe. E ora ey Zuriel a coy e pistol Glock y los tiro. El a primi e gai 4 biaha y un cantidad di bala a sali. Zuriel a bisa Hues cu cada biaha cu el a primi gay hopi bala a sali for di e arma. Zuriel, anterior a declara cu ta ser bisa cu Izak a horta e pistol Glock for di un latino y cu Izak tin e arma.
Izak a bisa Hues e no sa con Zuriel tabatin e arma den auto. El a bisa cu el a mira Zuriel su cara trek ora a pasa banda di American Bar y a mira e auto. Segun Izak, e conoce e hombernan. Hues a puntr’e pakico a bolbe pasa eynan. Segun Izak, nan kier a bay cumpra marihuana y na dado momento Zuriel a los tironan.
4 PERSONA HERIDA: Hues a bisa cu 30 Mei 2021, e homber J.W. y dama S.G. a bay warda di Polis San Nicolas y haci denuncia di a worde tira. J.W. tabatin un herida di tiro na man y S.G. na pia. Nan a bisa cu otro dos a bay ImSan pa tratamento.
Na ImSan a resulta cu e homber J.R. a haya tiro na pia y lomba y e dama L.H.d.l.C. a haya tiro na pia. Nan tabata na Insam pa haya tratamento. Na e lugar banda di American Bar, Polis a haya 9 huls di bala.
E cuater personanan a declara cu nan tabata para y un auto a pasa y un persona a los tironan. Despues di e tiramento, Polis a haya yamada anonimo cu ta bisa cu ta Zuriel ta esun cu a tira y cu Izak tabata core e auto.
VIDEO DI TIRAMENTO: Fiscal a pasa e video di security camera cu a graba e tiramento. Fiscal a mustra con Zuriel a tira riba distancia cortico riba un grupo di hende para rond di un auto. Ningun hende no a tira back. Por a mira chispanan di candela cu ta mustra cu a tira.
Relaciona cu esaki, Polis a bay haci investigacion na cas di Izak. No a haya e pistol Glock pero si e caha den cual e arma tabata. Ta asina cu Zuriel a kita e tapanan di wiel y plachi di number di e auto pa asina esaki no ta worde reconoci. Izak a tapa e sticker di e compania di huur auto.
POSPONE CASO: Ta asina cu Hues a pospone tratamento di e caso, pa pidi psychiater traha un raport. A keda palabra cu dia 3 di Juni 2022 lo sigui cu tratamento di e caso caminda e dia ey Fiscal lo bay exigi castigo pa tur e delitonan cu e duo aki a haci.
