ORANJESTAD (AAN): E homber Arubiano W., a para riba den Corte cu e no a viola su señora B. Fiscal si ta haya legalmente proba cu W. a maltrata y viola B. y a exigi 2 aña di prison.
Abogado mr. Cafarzuza a cuestiona na Hues cu KZP no a haci investigacion pa bin cu prueba cu realmente tabatin violacion. Hues, despues di a studia e caso pa algun siman a dicta sentencia caminda e no ta haya legalmente proba cu W. a viola B. pero si di a maltrat’e. Hues a condena W. na castigo di prison hopi menos cu loke Fiscal a exigi.
ACUSACIONNAN
E acusacionnan cu Fiscal a presenta den Corte contra W. ta cu dia 25 October 2020, el a viola y maltrata su señora B. Tambe Fiscal ta acusa W. cu dia 17 November 2019, el a maltrata B. door di gar’e na garganta y dal’e den cara. E victima B. a presenta den Corte cu abogado mr. Fraser y a demanda daño per juicio.
MALTRATO
Relaciona cu e acusacion di 17 November 2019, W. a bisa Hues cu el a mira B. cu un otro hende. El a bisa B. cu awor e tin un otro hende y a cana bay. Hues a bisa cu segun raport di Polis, 9.20 di mainta B. a presenta na warda di Polis pa haci denuncia. El a bisa cu na parada di bus, W. a gar’e na su garganta y dal’e na cara. Polis a constata cu B. tabatin un banda di cara hinca y garganta cora. E tabata yora y a bisa cu e tabatin dolor.
Hues a mustra cu B. a declara na Polis cu nan tabata casa pero nan a separa. Ora el a caba di traha 17 November 2019, el a bay parada di bus. El a mira W. pasa den auto. El a bolbe y B. a ripara cu W. tabata bou influencia. W. a puntra pa e mira su yiu y B. a nenga. W. a bisa B. pa bay cun’e y e momento ey un homber a bin y puntra B. si tin problema. B. a bisa e homber cu tin problema y no bay. W. a baha for di auto y bisa e homber cu si e kier problema. E homber a cana bay. W. a gara B. na garganta y dal’e. Despues B. a core bay Polis. El a bisa Polis cu e tin masha miedo di W. Dokter a constata cu B. tabatin un marca blauw na cara.
VIOLA
Hues a bisa cu segun raport di Polis, 25 October 2020 un mucha a yama bisa cu su padastro ta maltratando su mama. Polis a bay Turibana y mira B. cu su cara hopi hincha, su cash’i wowo robez blauw, boca cu herida y hincha. B. a bisa cu el a wordo maltrata door di su casa kende ta kere cu B. no ta fiel. W. lo a controla B. su cellular y ora el a mira potret for di tempo cu nan no tabata pareha, a dal B. E yiu di B. a bisa cu el a mira W. dal su mama cu e mama su cellular.
B. a declara na Polis cu den camber, W. a maltrat’e y a viol’e masha bruto. Segun B., no ta promer biaha cu esaki ta sosode. E tabata yora y a bisa cu e tin hopi dolor.
EXIGENCIA FISCAL
Fiscal a bisa Hues cu e maltrato na 2019 ta legalmente proba. Polis a mira cu e victima su cara tabata hincha y garganta tabata cora. E caso di violacion na October 2020, Polis a bay e cas y a mira e victima cu cara hopi hincha y tabata yora. E yiu a bay pafor y bisa cu el a mira cu W. a maltrata su mama. Fiscal a bisa Hues cu e victima B., a declara na Polis na yoramento y histerico cu el a wordo maltrata y viola. Hasta KZP a wordo envolvi pa haci investigacion riba violacion. E mucha a bisa cu e tabata scucha su mama ta bisa pa stop y na dado momento el a mira su mama cu cara tur hincha y e mama a bis’e pa yama Polis. Fiscal a bisa cu e no ta kere W. cu no tabatin relacion sexual.
Pa cu e castigo, Fiscal a mustra cu W. tabata hopi violento cu su ex pareha y e muchanan a mira esaki. E muchanan mes tabata teroriza. Fiscal a bisa cu awor por scucha cu W. ta dispuesto di haya ayudo. E ta haya cu esaki ta necesario. Fiscal ta kere den castigo combina pa asina forza W. haci tratamento. El a exigi 3 aña di prison di cual 1 aña ta condicional cu 2 aña di prueba caminda mester sigui instruccionnan di Reclasering.
Pa loke ta e demanda di daño, Fiscal ta haya cu no por inclui pagamento di huur. Si e ta haya cu W. mester paga e tratamento. Esey ta sali algo mas cu 1200 florin.
ABOGADO
Mr. Cafarzuza a bisa Hues cu e ta haya cu investigacion ta mustra cu no tabatin muestra di violacion. KZP lo tabata kier haci mas investigacion pero no a haci nada. No tin prueba concreto cu tabatin violacion. W. ta admiti di a dal B. un wanta den cara y cu e relacion no tabata bon. E abogado a bisa cu W. ta desmenti cu el a dal B. cu mokete na cara.
E abogado ta conclui cu no por prueba violacion. El a bisa cu W. ta dispuesto pa haya ayudo. E mes no ta realisa cu e mester di ayudo pero e ta dispuesto pa haya ayudo. Pa loke ta demanda di daño, no por bay exigi pa paga huur. W. ta dispuesto pa paga gastonan di hospital cu ta mas o menos 800 florin.
SENTENCIA
Hues ta haya legalmente proba cu riba 17 November 2019, W. a maltrata B. door di dal’e varios biaha na cara. Hues ta haya cu dia 25 October 2020, W. a bolbe dal B. varios biaha na cara.
Hues a bisa cu e no ta haya legalmente proba cu W. a dal B. cu un cellular. Tampoco Hues ta haya legalmente proba cu W. a viola B. Na opinion di Hues, no tin suficiente prueba di sosten. Tin solamente declaracion di B. E declaracion di e yiu homber no ta un prueba di sosten di violacion cruel. Hues a bisa cu e hecho cu B. tabata yora ora di denuncia no ta mustra cu e lo ta viola. Dokter na hospital no constata nada cu ta mustra violacion. Polis no a laga tuma muestra na victima pa determina si tabatin relacion sexual. Hues a declara W. liber di violacion. El a bisa cu e ta tene cuenta cu e raport di Reclasering cu ta mustra cu e chens ta halto cu W. lo bolbe haci algo asina. Hues a condena W. na 180 dia di prison di cual 17 dia ta condicional cu un tempo di prueba di 2 aña. Hues a pone como condicion cu W. mester ta bao guia di Reclassering. Pa cu e daño, Hues a aproba e facturanan di hospital y Insam cu ta algo mas di 1000 florin.
