Defensa di abogado a convence Hues cu e victima a defende su mes
ORANJESTAD (AAN): E hoben homber L.L.(19) a wordo declara liber di intento di mata y intento di maltrato severo riba e homber B. Hues ta haya cu mirando e hecho cu L.L. anterior a wordo atraca caba pa B. cu violencia y cu e biaha aki den su miedo a tira, por papia aki di cu e victima a defende su mes. Hues a condena L.L. solamente pa e posesion di arma di candela.
ACUSACION
Tratamento di e caso a tuma lugar algun siman pasa caminda L.L. a wordo acusa cu riba 20 September 2021, el a purba mata e homber B. door di tira riba dje y tabatin un arma di candela cun’e.
FISCAL A EXIGI 4 AÑA DI PRISON
Fiscal a bisa Hues cu e duo B. y M. a bay ataca L.L. pa kita su cadena. L.L. a saca un arma y tira, caminda B. a resulta herida na man. Fiscal ta haya cu esaki ta rabia cu L.L. tin riba B. y pesey L.L. a tira. Segun Fiscal, tira cu un arma riba distancia chikito y sin sa con pa tira, ta core riesgo cu por mata hende.
El a mustra cu un luna promer por a mira riba un video di seguridad, con un grupo, den cual B. tabata forma parti, a core tras di L.L. cu bate y machete. L.L. a dicidi di busca un arma pa defende su mes, siendo cu e por a informa Polis pa evita mas problema. Ta un hecho cu L.L. a wordo ataca pero despues cu a kita e cadena, L.L. a saca arma y tira.
Na opinion di Fiscal, aki no por papia di defensa propio. E ta haya proba cu L.L. tabatin un arma di candela.
Pa cu e castigo, Fiscal a tene cuenta cu e edad hoben, cu L.L. a wordo atraca, ta promer biaha cu e ta cay sera y e rapport di Reclassering a convence Fiscal pa duna castigo mas abao pasobra e ta mira cu L.L. tin un futuro. El a exigi 4 aña di prison.
SENTENCIA
Hues a bisa cu 20 September 2021, L.L. tabatin arma di candela. El a wordo atraca door di 2 homber, kendenan a bay cu L.L. su cadena di oro. Despues di esey, L.L. a saca arma y los un tiro y un di atracadornan, B., a sufri un tiro den man. Hues ta haya cu aki no por papia di defensa propio.
DECLARA LIBER PA INTENTO DI MATA
Hues ta haya cu no tin suficiente prueba di intento mata y intento di maltrato severo. No tin suficiente prueba pa bisa cu L.L. a mik y tira. El a mustra cu L.L. no tabatin intension di herida y mata.
Hues a declara L.L. liber di intento di mata y intento di maltrato severo. Hues ta haya L.L. culpable di posesion di arma di candela.
VICTIMA A DEFENDE SU MES
Hues a reacciona riba e defensa presenta pa abogado mr. Kip. Hues a bisa cu apesar cu defensa no a expresa defensa propio, Hues ta haya e forma con abogado a describi cu L.L. a purba evita y nan a sigui su tras y a atrak’e un forma di defende su mes. L.L. a spanta durante e atraco y a tira. Hues a conclui cu L.L. a defende su mes contra e dos atracadornan.
El a mustra cu Fiscal a bisa cu no tabatin un situacion di defensa propio pasobra ya e incidente a sosode y e atracadornan a cana bay y despues L.L. a tira.
Hues a bisa cu Fiscal a haya cu L.L. no mester a defende su mes door di tira. Hues ta haya cu L.L. tabata hopi spanta door cu e tabata wordo ataca door di dos homber y un di nan tabata sera pa mata hende. E persona a ranca cadena di dje. Den e estado di spanto aki, L.L. a saca arma y tira.
Na opinion di Hues, e accion aki ta un reaccion di biaha door di loke e atracadornan a haci. El a bisa cu e pensamento cu anterior L.L. ya caba a bira victima di ranca cadena y B. a purba maltrat’e caba, a pone L.L. a actua asina. E tabata cana arma pa evita di wordo ataca atrobe.
Na opinion di Hues, esey ta haci cu L.L. a defende su mes y Hues ta declar’e liber.
CONDENA PA ARMA DI CANDELA
Hues ta haya L.L. culpable di posesion di arma di candela. El a bisa cu posesion di arma di candela ta sumamente peligroso. Esaki ta causa inseguridad den comunidad.
Pa cu e castigo, Hues a tene cuenta cu L.L. ta un “first offender”. Hues a condena L.L. na 21 luna di prison di cual 6 luna ta condicional cu 3 aña di prueba. Aki por mira con Hues no ta comparti punto di bista di Fiscal y a reduci e exigencia di 48 luna di prison na 21 luna di prison.
