Hues ta mustra cu Fiscal a faya den su investigacion
ORANJESTAD (AAN): E homber P.S., ayera mainta a sali for di sala di Corte cu un sonrisa di satisfaccion, despues cu el a scucha Hues bisa cu e ta wordo declara liber di e acusacion di labamento di placa entre Juni 2019 te 13 Januari 2021.
CANTIDAD DI PLACA CONFISCA
Ta asina cu dia 13 Januari 2021 relaciona cu investigacion caso Avestruz, autoridad a haci investigacion riba e negoshi di e tata di P.S., kende ta un di e sospechosonan den e caso Avestruz. Na La Hacienda a haci investigacion y den e caha fuerte a bin haya 25 mil dollar y mas di 60 mil florin. Door cu P.S. no por a prueba di unda el a haya tur e placa aki e momento ey, autoridad a sospecha di labamento di placa. P.S. a bisa autoridad cu e placa ta di dje y no ta di e tata.
HUNGADOR PROFESIONAL DI POKER
Durante tratamento di e caso dia 14 April 2022, P.S. a presenta den sala di corte cu dos renchi di oro bisti cu ta e premionan cu el a gana hungando poker profesional. Ademas P.S. a splica na placa chiki con e tabata spaar su placa desde 2012 cu tabata hungando poker di diferente casino aki na Aruba. Ariba preguntanan haci door di Hues, el a splica tambe pakico e tabata su placa parti na tres diferente lugar esta e oficina di su tata, na su cas y na banco.
P.S. a splica cu semper el a usa un sistema di seguridad cu si algo pasa na un lugar, e lo tin placanan warda na e otro lugar y na banco. Su abogado mr. D. Kock a mustra cu documentonan cuanto biaha P.S. a gana weganan di poker na Aruba y den exterior. El a hasta cuestiona e hecho, pakico Fiscal a haci investigacion solamente entre 2019 y 2021 y no a haci desde 2012 na e otro casinonan cu P.S. a gana.
Na opinion di e abogado, e investigacion no ta completo y esey ta haci cu no tin un bista cla cuanto placa realmente P.S. a gana. Door di esey, Fiscal ta acusa P.S. di labamento di placa cual absolutamente no ta asina.
EXIGENCIA DI FISCAL
Luna pasa Fiscal a bisa cu P.S. ta un hungador di poker y a haya sumanan grandi den kluis. E mester demostra di unda el a haya e placanan aki. E ta haya cu no tin suficiente indicacion di unda tur e placanan aki a sali. Tin diferente depositonan na banco. Fiscal a bisa cu e forma di gana structural den casino no por wordo acepta. For di investigacion no ta yega na e suma cu a haya den e caha fuerte. Notabel ta cu den e mesun periodo P.S. a haci deposita grandi na Aruba Bank. Di unda tur e placa aki a sali? P.S. ta bisa cu el a spaar desde 2010. Fiscal a bisa cu e no ta kere cu P.S. a gana torneo di poker den exterior. P.S. no por prueba esaki. Fiscal no ta kere P.S. y ta haya cu P.S. a laba placa. El a exigi pa confisca e placa y tambe 1 luna di prison condicional cu 2 aña di prueba.
SENTENCIA
Diahuebs mainta Hues a bisa cu su decision ta cu e no ta haya proba cu P.S. ta culpable di labamento placa.
FISCAL A FAYA
Hues a bisa cu Fiscal por tabatin sospecho riba e cantidad di placa confisca den caha fuerte. Pero, P.S. a duna splicacion completo di procedencia di e placa. E ta un hungador professional di poker desde 2012.
Hues a mustra cu abogado a facilita diferente documento cu ta mustra con P.S. a gana e placanan.
Na opinion di Hues, ta Fiscal mester a bay haci investigacion.
Hues a remarca cu Fiscal a haci investigacion solamente desde 2019 y 2021 y no na tur ae casinonan cu P.S. a menciona. Hues a sigui bisa, pakico Fiscal no a haci e investigacion completo, e no por compronde.
Hues a mustra cu si a investiga solamente 2019 pa 2021, esey no ta mustra con P.S. por a haya asina hopi placa. Si Fiscal a investiga desde 2012 te cu 2021, lo haya sa pakico tabatin asina hopi placa.
SOSPECHOSO DECLARA LIBER
Na opinion di Hues, si Fiscal a haci e investigacion manera mester ta, no por conclui otro cu e placa no ta procedente di un hecho castigabel.
Hues a declara P.S. liber y a ordena pa tur e placa cu a keda confisca mester duna bek na P.S.
E sentencia aki, ta un sla duro pa Ministerio Publico. Manera ta conoci, Ministerio Publico tin 2 siman pa apela e sentencia. Tempo lo mester si Fiscal lo apela of no.
