ORANJESTAD (AAN): Fiscal a baha pisa Diabierna mainta riba un grupo di 4 homber, kendenan ta worde sospecha di a importa casi 30 kilo di droga.
Di e grupo aki, dos ta ruman, un ta famia y e otro ta un Venezolano cu ta amigo di e famia cu ta pisca.
E hombernan Arubiano J-M.R.M., R.F.M., J.M. y e Venezolano biba na Aruba R.E. ta worde acusa di a importa cocaina y marihuana via boto riba 27 October 2021. Fiscal ta acusa J-M.R.M. di ta complice, door cu e tabata vigila y papia via cellular cu su omo R.F.M.
Importa droga: Hues a bisa cu Polis a haya informacion cu e grupo ta bay cu boto pa busca droga transfiriendo esey for di un otro boto cu nan ta topa riba lama procedente di Venezuela. Polis tabata scucha cellularnan y tabata observa movimento di e grupo aki.
Riba 27 October 2021, Polis tabata observa e boto cu a sali pa “pisca” cu e rumannan R.F.M. (Panama) cu su ruman J.M. Despues e boto a bolbe na pier di Rodgers Beach y a mira J-M.R.M. busca un tas for di e boto, hinca esaki den un auto y core bay cu esaki na cas di J.M.
Casi 30 kilo di droga haya den tas: Polis a bay investiga na e cas y a haya casi 16 kilo di marihuana y casi 14 kilo di cocaina.
R.F.M. a bisa Hues cu durante pisca el a mira un tas ta drief, su ruman J.M. a bis’e no coy esey. E tog a coy esaki y a duna J-M.R.M. pa hib’e cas. El a bisa cu e dia ey a bin cu pisca tera.
Acusado a reclama interogacion di polis: Segun R.F.M. tur dia nan ta bay pisca. El a bisa cu e ta traha construccion y hopi di e yamadanan ta relaciona cu construccion y nada di droga.
El a bisa cu Polis ta para riba cu e mester declara manera nan kier pero no ta asina.
Cuestiona Guardacosta: Hues a mustra cu tabatin yamada caminda R.F.M. ta bisa cu ta para cos y a manda potret di Guardacosta di Caribe Hulandes.
R.F.M. a remarca cu constantemente Guardacosta ta molestia nan cu control pero cu Guardacosta ta trece cosnan ilegal for di Venezuela. Hues a mustra cu segun Polis, R.F.M. tabata duna posicion riba laman na otro.
R.F.M. a bisa Hues cu tur dia ora e bay pisca, e ta duna posicion unda e ta bay pisca. Esey ta pa si algo por pasa, hendenan por sa na unda nan a bay pisca.
Cuestiona interogacion di Polis: R.F.M. den un forma hopi rabia y moviendo su mannan a reclama cu Polis kier pa e bisa cu ta asunto di droga pero no ta asina. Segun R.F.M. ora laman ta hopi bruto, e ta cancela piscamento. Segun R.F.M., 7 aña Guarda Costa ta molesti’e ta controla cada vez cu e sali of yega tera. E ta haya cu Polis ta mal interpreta e yamadanan di construccion cu e tabata haya cu cosnan di droga.
Hues a mustra cu segun raport di Polis, nan a scucha R.F.M. cancela salida riba 25 y 26 di October 2021 y 27 October e boto ta sali y ora e boto drenta a mira R.F.M. ta duna su famia un tas pa hiba cas di J.M.
Hues a mustra cu segun Polis, R.F.M. tabata papia cu R.E. via cellular. Segun R.F.M. e tabata papia cu Chines pa haya resto di cosnan pa cuminda pa su porconan. El a sigui bisa cu na Chines el a topa R.E. y R.E. a bay papia cun’e. Hues a mustra cu segun combersacionnan, R.E. a bisa R.F.M. cu e no tin auto y pa topa banda di un lugar na Dakota. R.F.M. basta emociona a bisa Hues cu Polis kier pa e bisa cu ta asunto di droga pero no ta asina.
Polis ta mustra cu R.F.M. a yama su ruman J.M. riba tanki. El a bisa cu ta J.M. tin tankinan di gasoline cu ta usa pa bay pisca. Polis ta mustra cu R.F.M. ta papia cu hende cu no ta bay sali pa pisca. Tambe cu ta saca potret di Guardacosta. Segun R.F.M. el a manda esakinan pa medionan di comunicacion pa mustra con Guardacosta ta blo molestia.
Potret di dos boto ta topa riba laman: Hues a bisa cu segun Polis, Guardacosta a constata cu riba 27 October 2021 dos boto a topa otro riba laman.
A notifica helicopter y a logra saca 2 potret di e botonan cu tabata para banda di otro pero ora a mira helicopter a nabega for di otro.
Hues a puntra J-M.R.M. si e ta envolvi. El a desmenti. El a bisa cu tur dia e ta bay laman pa tira pisca. E dia ey el a bisa su omo R.F.M. cu Guardacosta ta vigila. El a bisa Hues cu e sa haci esey mas biaha pasobra su omo no tin permiso pa harpoon y e si. El a bisa Hues cu R.F.M. a pidi’e pa hiba e tas cas y el a hib’e y despues a bolbe pa e bay tira pisca.
Dos acusado condena caba pa droga: Hues a mustra cu na 2013, R.F.M. a worde condena pa droga na 3 aña y 6 luna di prison. El a mustra tambe cu R.E. den pasado tambe a worde condena pa traficacion di droga na 2 aña y 8 luna di prison.
Fiscal: Fiscal a bisa Hues cu e ta haya legalmente proba cu a importa droga. R.F.M. conoci (Panama) a duna diferente declaracion cu no ta consistente na Polis. Un biaha e ta bisa cu el a haya e tas riba tera, despues cu el a haya un tas riba laman cual tabata contene droga. Investigacion ta mustra cu R.F.M. hunto cu J.M. tabata riba laman entre Aruba y Venezuela.
Nan a bay pier di Rodgers Beach y eynan a pasa J-M.R.M. un tas. Tin potret di helicopter di Guardacosta cu e boto di R.F.M. a ‘rendezvous’, pues a topa y tabata banda di un boto di Venezuela riba lama grandi.
Fiscal a bisa cu Polis a confisca casi 16 kilo di marihuana y casi 14 kilo di cocaina na cas di J.M. Esaki tabata den e tas. Fiscal a bisa cu tin indicacion cu dos biaha nan a sali pa topa un otro boto pero esey no a sigui.
Dia 27 October 2021 esey a sosode. El a mustra cu J-M.R.M. promer ta desmenti cu e tabata na Rodgers Beach pero despues e ta admiti y cu e tabatin combersacion cu R.F.M. Fiscal ta haya cu J-M.R.M. tabata vigila laman pa su omo R.F.M. di Guardacosta.
El a core bay coy e tas y core bay na su auto y core bay cu velocidad. Na opinion di Fiscal, esey ta mustra cu J-M.R.M. tabata sa cu tin droga. Esey ta haci cu e ta complice. Pa loke ta R.E., Fiscal ta consider’e cu tabata dirigi e traficacion.
Castigo: Fiscal a bisa cu droga ta pone salud di hende na peliger. Ta hopi droga a keda confisca. E ta haya cu tin diferente funcion den e caso aki. Pa R.E. kende na opinion di Fiscal, tabata esun cu tabata duna orden pa busca droga riba laman, el a exigi 6 aña di prison.
Pa e rumannan R.F.M. y J.M., kendenan ta esnan cu a bay busca e droga, el a exigi 5 aña di prison pa cada un. Pa J-M.R.M. cu tabata vigila, el a exigi 3 aña di prison.
Awor Hues ta bay studia e caso y dentro di algun siman lo tin sentencia.
