ORANJESTAD (AAN): E homber C.M.(24) y J.P. (20) a presenta dilanti Hues pa e caso penal cu Fiscal di Ministerio Publico a cuminsa contra nan.
Nan ta wordo acusa cu riba 7 November 2021 a menaza dos agente di Polis cu morto. Tur cos ta desmenti esey y a bisa Hues cu e agentenan a boeinan y despues a maltrata nan. Hues no a kere e dos acusadonan y a bisa cu e ta bay tras di e relato di Polis, kendenan a jura di ta traha corecto.
DRENTA WARDA SCONDI PA PAPIA CU PRESO
Durante tratamento di e caso a sali na cla cu C.M. y J.P. a wordo deteni patras riba tereno di warda di Polis di Shaba, despues cu nan hunto cu un dama a drenta pa papia cu e homber J. cu ta encarcela den un cel. Nan lo a pasa via waya cu tin buraco. Segun C.M. e dama tabata sinti’e malo door cu su amigo J., kende ta amigo di C.M. y J.P., ta sera. E dama tabata kier a papia cu J. y nan a dicidi di bay cun’e.
Ta asina cu tanto C.M. como J.P. tabata burachi y aparentemente bou influencia di droga. Polis a bay check y a haya nan scondi y a detene nan. Durante e proceso di detencion, C.M. y J.P. lo a menaza e agentenan di Polis cu morto.
SOSPECHOSONAN TA NENGA
Tanto C.M. como J.P. a wordo representa pa abogado mr. Emerencia. Hues a puntra nan si ta berdad cu nan a menaza dos agente di Polis cu morto. C.M. a bisa Hues cu el a puntra e agentenan si nan kier bringa. Hues a mustra cu segun e relato di Polis, C.M. a bisa cu si nan ta sin uniform y cu nan famia nan lo wak kico lo pasa. C.M. a bisa Hues cu e momento ey nan tabata bati’e. El a bisa nan stop di dal’e y pa un so bin dal’e.
Hues a bisa cu ta logico cu Polis a actua asina ora cu hende ta subi riba tereno di warda di Polis. Segun C.M. e tabata burachi y Polis a boei e y hib’e den auto y despues a dal’e. El a bisa cu ora el a yega warda di Polis, nan gar’e na pia y zwaai e pafor. Hues a puntra C.M. si el a haci denuncia. El a bisa Hues cu si e haci denuncia nan lo no kere.
AGENTENAN KIER A ABUSA
J.P. a bisa nan stop di dal’e y pa bringa man cu man. Hues a bisa cu segun e relato di Polis, J.P. lo a bisa cu e tin un arma y ora e mira nan riba caya, lo tira nan. J.P. a desmenti di a bisa esey. Segun J.P., e agentenan ora tabata hib’e cel lo a purba hinca algo den su atras. E ta considera nan pro pedofile. J.P. emociona a bisa Hues cu e lo bay haci denuncia. Hues a remarca pakico e agentenan lo haci esaki. Segun J.P., e y C.M. tabata burachi y tabata haci fastioso. El a bisa cu nan a boei e y lanta su man na halto y dal’e. Despues nan a purba hinca un clob of radio den su atras.
Hues a bisa cu segun relato di Polis, C.M. y J.P. tabata burachi y tabata haci fastioso. E no ta mira pakico e agentenan di Polis ta bay gaña den e relato.
Hues mustra cu C.M. a yega di wordo condena pa violencia y J.P. pa maltrato.
EXIGENCIA DI FISCAL
Fiscal a bisa cu C.M. y J.P. a bay cu un dama kibra drenta den warda di Polis Shaba. Nan kier a bay papia cu un persona cu tabata sera. A haya nan scondi den un washok. Ora Polis tabata listra nan, nan a menaza Polis. Fiscal a bisa cu tanto C.M. como J.P. a desmenti di a menaza Polis pero Fiscal no tin motibo pa duda den loke ta para den relato di Polis. Na opinion di Fiscal, C.M. y J.P. nan actitud emociona den Corte ta mustra cu no tin duda cu nan lo a menaza e agentenan di Polis.
Fiscal a bisa cu e por a scucha C.M. y J.P. bisa cu nan a siña nan les y a cambia nan bida. Por mira cu J.P. ainda tin rabia contra Polis y ta yama nan pro pedofile. El a exigi 40 ora di trabao pa comunidad kitando e tempo 3 dia cu nan tabata sera.
ABOGADO
Mr. Emerencia a bisa Hues cu e caso aki ta excepcional pa cu e comportacion di autoridad. El a remarca cu e dama no a wordo persigui. E duo kier a yuda e dama cu tabata yora pa papia cu su amigo J. Ta un delito serio cu nan a bay warda di Polis pa laga e dama papia cu e amigo. Segun e abogado, no ta asina cu nan lo a kibra un waya. Nan no ta wordo persigui pa a subi riba tereno di Shaba sino menaza dos agente di Polis. Abogado a bisa cu e ta kere e hobennan. E por compronde cu Polis a reacciona di mas. Un rato promer Polis a mira nan ta bebe y aparentemente bou influencia di droga. E detencion a bay bon pero ora nan a yega warda di Polis, nan a wordo maltrata.
E abogado a bisa Hues cu tin suficiente casonan aki na Aruba caminda Polis a reacciona di mas. J.P. a sinti cu ademas di geboei y maltrato nan kier a penetr’e di patras. C.M. a wordo maltrata apesar cu e tabata geboei.
Na opinion di e abogado, cada ken ta reacciona otro ora nan ta rabia. C.M. y J.P. a reacciona di e forma aki. Nan a yega di cay sera caba y nunca nan no a menaza Polis.
E abogado ta kere cu ta algo excepcional a pasa, cu nan a rabia. J.P. a nenga di a bisa cu e tin un arma mientras cu C.M. a bisa Polis pa ora nan ta sin uniform cu nan famia wak kico lo pasa. Wak pa nan ta 24/7 cu uniform. E abogado ta haya cu nan a siña nan les y awor nan tin trabao y ta bayendo riba bon caminda. E ta haya e punto di Fiscal na su lugar esta castigo di trabou pa comunidad.
SENTENCIA
Hues a sera tratamento di e caso y a dicta sentencia di biaha. Hues a bisa cu ambos ta desmenti di a menaza y cu nan tabata burachi. Hues ta di opinion cu loke ta para den relato ta di Polis, en principio mester kere. Hues a bisa cu for tratamento di e caso e no tin motibo di duda den loke Polis a pone.
El a mustra cu e acusadonan a bisa cu nan tabata burachi y tabata fastioso. Nan a subi tereno di warda di Polis. Por bien ta cu Polis a actua cu man duro. Pero cu Polis lo bay gaña den e relato, no tin suficiente prueba pa esaki.
Hues ta haya cu C.M. y J.P. a expresa menaza den direccion di e agentenan. Hues a tene cuenta cu ambos a yega di wordo condena pa violencia. Hues a bisa cu ambos a bisa cu a siña nan les y ta trahando. E ta haya esaki un desaroyo positivo. Hues a condena nan na 50 ora di trabao di cual 20 ora ta condicional cu 2 aña di prueba. Kitando 3 dia cu nan tabata sera, e ta bira 6 ora for di 30 ora cu ta bira 24 ora di trabou. Hues a bisa cu Reclassering lo regla e ora di trabou di ambos.
