ORANJESTAD (AAN) – Despues di casi tres aña, caminda na 2019 a pospone e caso pa haci mas investigacion,
diahuebs Corte den Promer Instancia a trata e caso penal cu Ministerio Publico a Homber J.R., kende ta wordo sospecha di traficacion di ilegalnan for di Venezuela.
Hues ayera mainta a bisa cu na 2019, Corte a pospone e caso riba peticion di abogado pa haci investigacion. E acusacion contra J.R. ta cu entre Juli 2017 pa Maart 2018 el a trafica ilegalnan di Venezuela. Hues a bisa ayera cu ta sigui cu e caso. Ta asina cu J.R., for di comienso di e caso, a haci uso di derecho di silencio. Ayera ora a yega e parti di circumstancianan personal, riba indicacion di abogado mr. Ruiz, J.R. a bisa Hues cu e ta cuida su mama y door di e caso aki, e y su mama ta sufriendo di diabetis. Relaciona cu e caso aki, J.R. a keda 26 dia sera y despues laga liber. J.R. a bisa Hues cu actualmente e no ta trahando. El a bisa cu Cruz Cora ta yudando cu cuminda.
EXIGENCIA DI FISCAL
Fiscal a bisa Hues cu e ta haya legalmente proba cu J.R. a trafica hende. Fiscal a splica cu a base di sospecho di droga, Polis a drenta e compleho di apartamento den Emmastraat, caminda a bin haya 50 Venezolano ilegal den e cas. Pa un matras, cada un tabata paga 200 dollar pa luna pa keda den e cas. Investigacion ta mustra cu J.R. tabata huur e apartamentonan for di un Chines. Segun Fiscal, e hendenan bisa cu J.R. tabata sa cu nan tabata ilegal y e tabata busca nan. Esey, na opinion di Fiscal, a base di ley ta traficacion di hende pa gana placa. Esaki ta un caso hopi serio. Fiscal a bisa cu e hendenan aki ta huy for di Venezuela pa haya un mihor bida. Ta hopi malo cu J.R. ta saca probecho di nan.
LO BIN CU CASO PA KITA PROPIEDAD
Segun calculacion di Fiscal, pa luna J.R. tabata gana 10 mil dollar. Di esaki e tabata paga 7 mil florin pa huur. Esey ta mustra cu J.R. tabata gana 10 mil florin pa luna. Ta un gran cantidad di placa e tabata gana. Fiscal a anuncia cu lo bay cuminsa caso pa kita placa of propiedadnan cu J.R. a gana door di e caso aki.
CASTIGO COMBINA
Pa loke ta e caso aki mes, Fiscal a splica cu tabata e intension pa exigi 10 luna di prison. Sinembargo teniendo cuenta cu e tempo cu a transcuri y cu KIA ta yen, Fiscal ta haya cu un castigo combina lo ta mas mihor. El a bisa cu J.R. tabata 26 dia sera.
Fiscal a exigi 146 dia di prison di cual 120 dia ta condicional. Esey ta nifica cu J.R. no mester bay sera. Tambe Fiscal a exigi 240 ora di trabao pa comunidad y si J.R. no cumpli, e lo mester bay 4 luna sera den prison. Fiscal a bolbe ripiti cu por spera e caso pa kita tur loke el a gana.
ABOGADO
Abogado di J.R. a bisa Hues cu J.R. tabata huur e compleho di apartamentonan for di un Chines pa 7 mil florin. Door cu situacion no tabata bayendo bon, e kier a stop. El a wordo acerca pa un tal Ramirez pa huur e apartamentonan pa 9 mil florin. J.R. no tabata sa kendenan tabata keda den e apartamentonan. E tabata atende cu Ramirez. J.R. ta desmenti di a haci traficacion di hende. Na opinion di e abogado, loke J.R. a haci ta descuida cu kende el a huur e apartamentonan. E abogado a bisa cu contrario cu Fiscal ta bisa, J.R. no tabata sa cu e hendenan tabata ilegal. E tabata huur e apartamentonan cu turistanan Venezolano. Despues el a huur e apartamentonan cu Ramirez. El a mustra cu no ta 50 sino 41 ilegal tabatin den e apartamentonan. 35 di nan a bin Aruba na forma legal cu avion. J.R. no por a pensa cu e hendenan aki lo ta kedando ilegal na Aruba. E abogado a desmenti cu J.R. lo a busca hende cu lancha trece Aruba.
