ORANJESTAD (AAN): Diabierna mainta Hues di Corte di Husticia a condena un trio na castigo di 13, 9 y 8 aña di prison mientras cu un otro cu lo a yuda cu un asalto na 2 aña y 6 luna di prison.
Tratamento di e caso aki tabata algun siman pasa caminda Fiscal a baha pisa riba e hombernan D.B., N.P., H.H. y D.R. y a exigi castigo di 15, 13, 12 y 4 aña di prison.
FISCAL
Na tratamento di e caso, Fiscal a bisa Hues cu e ta bay bisa cosnan cu e sospechosonan lo rabia pero esey ta Fiscal su opinion di e caso. Anterior ta abogado a pidi pa pospone e caso pasobra a haya un cellular den cel di D.R. y D.B. riba e caso y con lo bay atende cu N.P. y con lo por cumpra hendenan. D.B. a laga sa cu e lo bay regla cu esnan cu a gaña riba dje. Fiscal ta haya cu D.R. y D.B. kier a purba tuma Fiscal y Corte haci. Fiscal a menciona e asalto riba e homber P. (81), e tiramento di Venezolano den lomba, cumpramento di cosnan horta. El a cuestiona e forma cu e grupo a maltrata P. di 81 aña y ta un milager cu P. a keda bibo. Fiscal a bisa cu e Venezolano a wordo secuestra y ta un milager cu e no a muri. Un bala ta den un weso di lomba y ta un riesgo pa saca esey pasobra e lo por keda handicapped. Fiscal ta haya cu e tiramento di D.B. ta un intento di mata. Tres biaha a tira y tres herida den lomba di victima C.D.O. E ta haya cu N.P. y H.H. ta complice di intento di mata.
Pa cu e castigo, Fiscal a bisa cu e ta tene cuenta cu D.B., N.P. y H.H. tin carchi di castigo. El a mustra cu den apenas 3 siman, nan a haci asalto arma brutal, intento di mata y sende auto na candela. Na 2020 nan a sali for di KIA. Fiscal a exigi pa D.B. 15 aña di prison, pa N.P. 13 aña di prison, pa H.H.12 aña di prison y D.R. 4 aña di prison.
SENTENCIA
Ayera e sentencia tabata via video conference. Ta asina cu den e grupo aki tin algun cu tin problema cu otro. Pesey na KIA a tuma medida di seguridad special.
ASALTO ARMA RIBA HOMBER DI 81 AÑA
E promer acusado tabata N.P. Despues cu Hues a caba cu e sentencia di N.P., a sigui cu D.B., H.H. y D.R. Hues den su evaluacion ta mustra cu e ta haya legalmente proba cu riba 15 Augustus 2020, e trio N.P., D.B. y H.H., a haci e asalto arma y brutal na cas di e homber P. di 81 aña.
Hues a cuestiona e asalto arma brutal aki. Caminda den oranan laat di anochi, e trio aki a drenta den e cas di P.(81). Diferente biaha D.B. a dal e victima P. cu un bara di hero na cabez, mientras cu H.H. a mar’e y despues nan a bay cu joyas y otro cosnan for den e cas. Hues a mustra cu e yiu homber di e victima a bisa cu su tata no kier biba su so mas y ta biba serca dje. Hues a bisa cu e ta tuma nan na malo pa esaki. Hues a mustra cu N.P. tambe ta culpable di e ladronicia dia 29 Augustus 2020 na un cas na Esso Heights.
ASALTA Y TIRA VENEZOLANO
Hues ta haya legalmente proba cu e trio aki ta complice cu riba 4 September 2020, a haci asalto arma y purba mata e homber Venezolano C.D.O. Tambe cu nan a sende un auto na candela y posecion di arma di candela. Hues a mustra cu N.P. hunto cu D.B. a bay riba C.D.O. y a bin cu e idea cu mester mata C.D.O. pasobra el a mira nan cara. C.D.O. a logra sali core y D.B. a tir’e 3 biaha den lomba.
Pa loke ta H.H., Hues a bisa cu H.H. a admiti di a participa den e asalto arma riba e homber P. El a desmenti di a participa den intento di mata di C.D.O. Segun H.H., N.P. y D.B. a bay busk’e despues di a forza C.D.O. drenta den auto. E no tabata sa di nada. E no kier a participa y a bisa nan pa laga C.D.O. bay pero nan no kier. El a scucha cu nan kier a mata C.D.O. y a core bay un caminda den mondi. Segun H.H., na dado momento el a mira chens cu por yuda C.D.O. El a baha for di auto dilanti y a bay habri porta di auto patras.E momento ey C.D.O. a sali core y D.B. a tire.
Hues a bisa cu C.D.O. a bisa cu tres homber a bay riba dje, kita tur su joyas. Nan a core bay den mondi y el a bira nervioso. Na dado momento e homber dilanti, H.H., lo a bay pa sinta patras, el a pusha e porta sali core.
Hues a sigui cu D.B. a bisa cu tabatin 3 persona den e auto pero no kier a menciona e di tres.
Hues a bisa cu e no ta kere e storia di H.H. Hues ta haya H.H. complice di e intento di mata. Hues a mustra cu e motibo cu H.H. a baha for di auto pa bay sinta patras ta pasobra cu C.D.O. a bira hopi nervioso.
Pa loke ta D.R., Hues a mustra cu D.B. y N.P. a bay serca D.R. pa un ganga y el a duna cellular di C.D.O. pa nan haci un hit di droga. Hues ta haya cu D.R. tabata sa cu nan lo bay asalta C.D.O. Hues ta haya cu D.B. ta e iniciador cu a dal e homber P. cu bara di hero y a tira C.D.O.
CASTIGO
Hues a condena D.B. na 13 aña di prison, N.P. na 9 aña di prison, H.H. na 8 aña di prison y D.R. na 2 aña y 6 luna di prison. Hues a bisa tambe cu e trio lo mester bay paga demanda di daño. E no a menciona suma pero a bisa cu tur cos ta specifica den e sentencia.
