Presidente di Hof:
ORANJESTAD (AAN): Diaranzon mainta a tuma lugar un conferencia virtual di Hof na corte di husticia, unda cu prensa por a scucha for di e representantenan di Hof di e diferente islanan, puntonan importante y resaltante cu tin para den e rapport annual di Hof.
Presidente di Hof Mauritsz de Kort a cuminza na bisa cu combersacionnan ta andando cu diferente minister na Corsow pa loke ta un proyecto grandi di renovacion di edificio di corte, cu ta uno necesario.
El a indica cu ta trahando riba reclutamento di mas personal pa corte, mientras cu pa e aña aki ainda Hof kier implementa un codigo di comportacion pa tur ambtenaar di corte.
Esaki ta conta pa hueznan tambe, pero e hueznan ya caba ta trahando a base di un codigo specifico di comportacion.
“E mester ta un codigo di comportacion cu ta cumpli cu e reglanan internacional di integridad”, segun e presidente di Hof.
De Kort a papia tambe riba e cifranan pa loke ta tratamento di e diferente tipo di casonan di corte riba e islanan di Reino.
El a indica cu na 2021 tabata tin un aumento di caso nobo den corte di prome instancia di 19%, esta di alrededor di 26.000 caso pa 31.000 caso.
E aumento tabata specialmente den casonan penal y civil, mientras cu den e asina yama casonan di ‘bestuur’ tabata tin un bahada chikito.
De Kort a papia tambe di e cantidad di empleado di Hof, cu na 2021 tabata 206, cu ta inclui ambtenaarnan di corte y hueznan.
En total na 2021 hof tabata consisti di 47 huez.
