Dia 22 September 2023 lo tin sentencia
ORANJESTAD (AAN): Diabierna mainta te den oranan di merdia, Corte den Promer Instancia a trata e caso penal contra e homber Ecuatoriano D.C.G. di 24 aña, kende ta wordo acusa cu riba 27 November 2022 a causa un accidente di trafico cu consecuencia fatal y a sigui core bay. Tambe e ta worde acusa di tabata stuur e vehiculo tipo SUV sin rijbewijs.
Durante tratamento di e caso, D.C.G., na yoramento a pidi e pareha di e dama victima, pa pordone. Fiscal a exigi 4 aña di prison di cual 1 aña ta condicional cu 2 aña di prueba. Tambe Fiscal a exigi pa e auto keda confisca.
Pega soño y dal dama mata: E sospechoso D.C.G. a bisa Hues cu el a pega soño riba Lloyd G. Smith Boulevard bayendo pabao, despues di e rotonde Las Americas banda di ex Talk of the Town y ora el a sinti e vehiculo dal, e ora el a spierta y a ripara cu e vehiculo tabata riba e acera banda robez. Esaki a sosode mas o menos 6.15’or di mainta.
Segun D.C.G., e no a ripara cu el a dal e victima, Ana Rosa Montaño Martinez cu tabata cana riba Linear Park. El a djis sigui core bay lagando e victima mortalmente herida atras.
Caba traha y bebe 2 cerbez: Hues a puntra pakico el a pega soño. D.C.G. a bisa Hues cu e no tabata cansa pero a pega soño. Hues a bisa cu e por a compronde cu D.C.G. a traha anochi te 3’or marduga y despues a sali cu su amiga bay na dos club nocturno y despues a bay hiba un amigo su cas na San Nicolas. D.C.G. a bisa Hues cu ora e tabata bini Oranjestad, e tabata sinti cansa y soño.
Segun Hues, D.C.G. a bisa Polis cu ora e tabata biniendo Oranjestad, diferente biaha el a pega soño tras di stuur. Durante interogacion di Hues, D.C.G. a bisa cu el a bebe dos Heineken despues di trabao.
Hues a puntra D.C.G. pakico e no a pidi su amiga pa stuur ora tabata bin Oranjestad. Segun D.C.G., su amiga tabata burachi y a pega soño promer cu D.C.G. Hues a mustra cu tabatin chat entre D.C.G. y su amiga via WhatsApp caminda ta mustra cu ta e amiga lo tabata stuur.
Amiga kier a tuma culpa: Hues a mustra cu tabatin chat entre D.C.G. y su amiga via whatsapp caminda ta mustra cu ta e amiga lo tabata stuur. Segun D.C.G., door di spanto di loke a sosode, e amiga a bisa cu laga haci cu e tabata stuur pasobra e tin rijbewijs y D.C.G. ta ilegal. Pero D.C.G. a nenga.
Fiscal a pasa e video di seguridad di e x Talk of the Town den Corte riba un screen grandi. Por a mira cu net na otro banda di ex Talk of the Town, e victima tabata canando riba acera y e SUV Ford a subi e acera, dal e victima y despues dal contra un bari di sushi. Un rato despues por mira e luznan di brake sende y e auto a sigui core bay. E auto a sigui core cu e banda di luz drechi kibra.
Segun D.C.G. riba Facebook el a mira e accidente y a tum’e algun tempo pa realiza cu ta el a ocasiona e accidente. El a papia cu su mama y su amiga, kendenan a bis’e cu e por ta otro hende. D.C.G. a realisa cu e ta responsabel. E ora ey den oranan di anochi, el a bay Polis.
Hues a puntra D.C.G., si e ta sinti culpa. D.C.G. a bisa cu e ta sinti culpa di no por a yama ambulance y por a scapa e victima. Hues a bisa cu si D.C.G. a haya les di core auto serca un professional e lo a siña cu no por core auto si bo ta sinti cansa.
Abogado ta discuti cu fiscal: Fiscal tabata interoga D.C.G. tocante bebemento. Fiscal a bisa cu un amigo lo a bisa cu D.C.G. lo a bebe mas bebida alcoholico. E momento ey mr. Carlo a lanta para y a reclama Fiscal cu e ta guia su cliente riba otro direccion pasobra ningun hende ta bisa cu D.C.G. a bebe otro bebida. Fiscal a bisa cu tin declaracion di otro cu ta bisa cu D.C.G. a bebe otro bebida. D.C.G. a bisa Hues cu su amiga y e amigo tabata bebi caba ora cu D.C.G. tabata trahando pero no cu el a bebe otro bebida mas cu ta solamente e 2 Heineken.
E acusado D.C.G. a pidi disculpa na yoramento na e partner. El a pidi pordon y a bisa cu tur dia e ta pensa riba loke a sosode. E partner di e victima tambe tabata yora.
Demanda di daño: E ciudadano di inicial F.C. a duna Hues e demanda di daño cu ta consisti di paga pasashi pa e yiu di e victima bin Aruba, gastonan di hiba e victima Santo Domingo y e entiero. Tambe tin gastonan di Funeral Home. Ademas F.C. a demanda daño inmaterial di 10 mil florin. Esaki pasobra el a keda afecta emocional door di e fayecimento di su pareha. En total ta mas o menos 26 mil florin e demanda di daño ta.
Fiscal: Fiscal a bisa cu Ana Rosa Montaño Martinez tin costumber di cana riba Linear Park. E lamentable accidente a causa impacto den comunidad. Mas ainda e hecho cu e auto a core bay. Fiscal ta haya cu D.C.G. ta culpable di morto di Ana Rosa Montaño Martinez. D.C.G. tabata traha na Mumba Beach Bar te 3’or di marduga y despues a sali cu su amiga y un amigo. Te mas o menos 5’or di mainta nan a keda den un club nocturno y despues D.C.G. a hiba su amigo cas te na San Nicolas.
Ora di bin Oranjestad, for di rotonde aeropuerto, D.C.G. tabata core zig-zag. Segun Fiscal, tin chauffeurnan cu a mira e SUV Ford tabata core zig zag. Despues di rotonde Las Americas banda di ex Talk of the Town, D.C.G. a baha caminda na banda robez, subi acera y dal e victima y despues dal contra un bari.
Despues di un rato el a brake y sigui core bay. Un persona cu tabata canando ey banda a yama Polis. Fiscal a bisa cu a base di declaracion di otro personanan, en realidad D.C.G. a bebe mucho mas cu solamente 2 Heineken. El a mustra cu e windshield di e auto y e otro glasnan di e SUV tabata getint.
Fiscal a bisa cu ta un hecho cu ora core cu auto cu glasnan getint den oranan di anochi, e ta bira mas dificil pa mira riba caminda. Fiscal ta haya cu D.C.G. tabata core irresponsabel door di core sin rijbewijs, cu glasnan di auto getint, bao influencia di alcohol, sin aseguro di auto y a pega soño tras di stuur. A dal e victima mata riba Linear Park y core bay.
Fiscal a bisa cu Linear Park ta conoci cu hopi hende ta cana. Fiscal a splica cu door cu D.C.G. no a haci’e intencional, e ta haya cu ta D.C.G. su culpa. Esey ta haci cu e castigo ta bira menos compara si ta intencional. Fiscal a menciona sentencia den un caso di morto door culpa den accidente caminda e castigo ta 4 aña di prison.
Fiscal a exigi 4 aña di prison, di cual 6 luna ta condicinal cu 3 aña di prueba. Tambe Fiscal a exigi pa prohibi D.C.G. core auto pa un periodo di 3 aña. Tambe Fiscal a exigi cu e SUV Ford ta keda confisca. Pa loke ta demanda di daño, Fiscal a bisa cu pa e parti di daño inmaterial e ta aproba 5 mil di e 10 mil. Tambe el a bisa pa aproba e gastonan di entiero.
Abogado: mr. Carlo a bisa Hues cu e no ta haya cu por proba cu D.C.G. intencionalmente a ocasiona e accidente y pa declar’e liber di esey. E abogado a bisa Hues cu D.C.G. a traha double-shift e dia ey y a calcula malo cu e lo por hiba su amigo cas na San Nicolas y bolbe Oranjestad. Bolbiendo Oranjestad e tabata sinti soño.
Despues di rotonde Las Americas banda ex Talk of the Town el a pega soño y despues di a dal contra acera y a spierta. E no tabata sa cu el a dal e victima. El a sigui core bay. Te despues na altura di Shaba el a ripara cu e hood tabata dobla y el a kere cu ta contra un mata el a dal.
Na cas di su amiga el a mira e daño. El a bay cas y a bay drumi pa traha su siguiente dia. Ora el a spierta y mira riba Facebook e accidente, el a spanta. E no por a kere cu el a ocasiona e accidente.
El a pidi su ruman homber pa yama Polis pasobra e tabatin miedo. Asina el a entrega su mes. E abogado a bisa cu D.C.G. a bebe solamente 2 Heineken. Ta e amiga y e amigo a bebe e anochi Tequila promer. D.C.G. a cumpra 2 Tequila pa su amiga y un amiga turista.
E abogado a bisa cu no por bisa manera Fiscal ta pretende cu D.C.G. tabata bou influencia di alcohol. El a bisa cu D.C.G. tabata core 60 km y no tabata core irresponsabel manera Fiscal a bisa.
Na e opinion di abogado, no por bisa cu door di glasnan getint, core sin bril di bista, a causa cu D.C.G. el a dal victima. E abogado a pidi Hues pa cu e castigo, duna castigo igual na e tempo cu D.C.G. ta sera.
Pa cu e demanda di daño, e abogado ta haya cu no por cobra loke aseguro a paga. E ta haya cu no a argumenta e pasashi di yiu pa bin Aruba. Tampoco e gastonan di hiba e defunto Santo Domingo. Tambe el a cuestiona e demanda di daño emocional cu no ta suficiente argumenta cu relato medico. E abogado ta haya cu mester declara e demandanan no admisibel y lo mester cuminsa un caso civil.
Pa loke ta confisca e SUV Ford, ta asina cu e auto ta di e ruman homber. E abogado no ta haya cu ta husto cu ademas di castigo, e ruman homber mester sali perhudica.
Hues a sera tratamento di e caso y a bisa cu dia 22 September 2023, lo tin sentencia.
