Aunke cu e muher ta para riba cu e ta inocente
ORANJESTAD (AAN): E muher F.M. riba Diahuebs merdia a presenta dilanti Hues pa e caso penal cu Ministerio Publico a cuminsa contra dje. F.M. ta worde acusa cu entre 23 Juni 2016 y 10 Maart 2020 a malversa cantidad di placa for di Departamento di Impuesto (DIMP). Fiscal a bisa cu mas cu 845 mil Florin a keda malversa. Fiscal a exigi pa kita 1.3 Miyon Florin di propiedad di F.M.
Tratamento di e caso aki a cuminsa 1.30 di merdia y a caba despues di 5’or di atardi.
Den e articulo aki DIARIO ta publica e punto di bista di Fiscal y e defensa di abogado mr. D.Croes. Den un otro articulo lo publica tur e interogacion interesante di Hues.
Sospechoso ta desmenti: Hues a haci F.M. un cantidad di pregunta y F.M. a keda para riba cu e ta inocente y cu e no sa con tur e placa ey a disparce. El a bisa Hues cu e como hefe cahero, tur ora ta traha hunto cu e suplente hefe cahero, e dama M. El a splica henter e procedura con e tur e caheronan na DIMP mester trece un relato y placanan di e dia p’e y e ta saca for di computer di cada cahero un relato y ta compara esaki. F.M. ta para riba cu e no a haci nada.
Por a compronde cu e tin 33 aña trahando pa Gobierno y relaciona cu e caso aki, na 2022 el a worde kita for di trabao. Hues a mustra cu investigacion di LandsRecherche ta confirma cu e investigacion cu empleadonan di DIMP a haci ta mustra cu F.M. a malversa placa. Tambe cu na 2019, F.M. y su casa tabata bay masha hopi casino y gasta hopi placa. F.M. a splica Hues cu no ta bay hopi casino y cu e tin hopi suerte di gana den casino. El a gana premionan grandi den casino y cu e placa ey el a bay viaha.
Demanda impuesto: Tabatin algun empleado di Departamento di Impuesto presente y un a haci un demanda di daño di 50 mil Florin. Hues a puntra si nan tin un carta cu Gobierno ta autoriza e empleado pa haci e demanda. E empleado a bisa cu e no tin y cu el a worde informa cu no mester di e autorizacion pa haci e demanda. Hues a bisa e muher cu el a worde mal informa riba esey.
Fiscal ta exigi: Fiscal a bisa cu aki no ta trata di un malversacion con cu ta. Ta 845 mil Florin a worde malversa for di placa di pueblo. Fiscal a sigui bisa cu for investigacion ta papia di 1.3 Miyon Florin. E ta haya cu F.M. mester paga e placa back. Na opinion di Fiscal, DIMP a pone hopi confianza den e persona aki cu tabata e hefe cahero. Den e investigacion a concentra hopi riba proceduranan interno cu ta mustra complica pero ta un forma di control. E hefe cahero mester percura cu e placa ta cuadra cu loke e caheronan a colecta y loke ta para den e relato. Fiscal ta haya cu F.M. tabata keda sin anota cierto placanan di caheronan den e relato cu e mester traha y asina tabata malversa placanan. A haya den e oficina di F.M. documentonan di relatonan di cahero cu no tabata aparece den e relato di e hefe cahero F.M. Esakinan tabata scondi tras di cashi y tambe den cahanan di placa.
Fiscal a mustra cu LandsRecherche a puntra F.M. pa splica e diferencianan menciona pero el a bisa cu e ta haci uso di su derecho di silencio. Na opinion di Fiscal, den Corte tampoco F.M. a duna splicacion. Investigacion ta mustra cu F.M. y su casa na 2019 a gasta masha hopi placa den casino. Fiscal ta haya cu F.M. a duna declaracionnan cu no ta hustifica e gastonan haci na 2019. F.M. a bisa cu nan no ta perde hopi placa den casino y no ta bay tur ora casino manera ta pretende. Fiscal a mustra cu tin hendenan a bisa cu e hecho cu F.M. tabata bay traha hopi tempran, ta dun’e tur posibilidad pa traha e relatonan di e placanan di e caheronan manera e kier pasobra no tin control.
Fiscal ta haya cu F.M. ta culpable di malversacion. Fiscal ta haya cu a base di investigacionnan 1.3 Miyon Florin a keda malversa y e ta exigi pa kita na propiedad di F.M. e 1.3 Miyon Florin. Na opinion di Fiscal, F.M. a abusa di e confianza cu DIMP a pone den dje. Pa cu e castigo, Fiscal a bisa cu e ta tene cuenta cu mas cu 1 aña y 6 luna pasa a cuminsa cu e investigacion. Fiscal a exigi 36 luna di prison, di cual 12 luna ta condicional y cu 3 aña di prueba. Tambe Fiscal a aproba e demanda di DIMP di 50 Mil Florin y a exigi pa pone medida di pago contra F.M.
Defensa abogado: Abogado mr. D.Croes a bisa Hues cu na 2020, F.M. a bira malo y diripiente empleadonan di DIMP mes a cuminsa investiga F.M. Na 2018, CAD a señala cu e cuarto caminda F.M. y e suplente M. ta trahando ta mucho chikito pa ta warda asina hopi placa. Na 2020, ora cu F.M. a bira malo y a keda cas, a bay investiga y e suplente muher M. a haya den e oficina dos caha di placa pero no tin yabi pa habri nan. F.M. a bisa cu ora e bolbe, e lo busca manera pa habri nan y no mishi cu nan.
E homber O.M., cu ta hefe di Finanzas y hefe F.M., a laga sa cu a habri e cahanan door di un compania di habri lock.
Abogado mr. Croes a remarca cu un empleado di DIMP mes a haci investigacion sin cu director di (DIMP) sa. No a busca LandsRecherche, cu ta e instancia autoriza. A habri e cahanan y a haya net documentonan pa culpa F.M. Despues e empleadonan di DIMP a bay haci denuncia na Ministerio Publico cu tur e pruebanan cu nan tin. E abogado a bisa Hues cu mester kere cu F.M. lo mester a horta durante 4 aña mas cu 800 mil Florin y ningun hende no a haya sa. Mester kere cu F.M. lo laga tur prueba tras di un cashi y dos caha di placa pa culpa su mes. El a mustra cu for di investigacion di e homber T. ta mustra cu e cahanan tabata worde usa pa diferente cahero.
E abogado a remarca cu e homber T. despues di investiga tur cos a bay informa director. E director a reclama di con no a bisa nada. El a bisa cu e mes ta haciendo investigacion. Na opinion di mr. Croes, si e placa tabata disparce, pakico e hefe di F.M., e homber O.M. cu ta e hefe di Finanzas, no ta controla y no ta haya nada. Awor diripiente e homber O.M. ta haya e cahanan di placa cu documentonan. Ademas e suplente di F.M., e dama M. cu ta hunto cu F.M. no a mira nada. E abogado a mustra cu e dos cameranan cu tin den e oficina, no a mira nada. Ta na 2020 ora cu e dama M. a bay haci investiga, a haya e cosnan. Awor ta tira tur culpa riba F.M., siendo cu e control tabata laga di desea. E abogado a bisa Hues cu e homber O.M. tambe ta bay hopi casino.
E abogado ta di opinion cu solamente a base di documentonan cu F.M. a firma ta usa como prueba pa culpa F.M. Mr. Croes a bisa Hues cu e ta haya e storia aki hopi straño. El a bisa Hues cu e hecho cu F.M. a haci uso di derecho di silencio, ta su derecho. E ta haya cu no tin prueba cu realmente e placa a disparce. E investigacion no a bay manera e mester a bay. E abogado a conclui cu mester declara F.M. liber pasobra e no a haci nada. Tambe cu e exigencia di Fiscal pa kita propiedadnan na balor di 1.3 Miyon ta cay y tambe e demanda di DIMP.
Hues a sera tratamento di e caso y a bisa cu dia 21 September 2023 lo tin sentencia
.
