Hof a dicidi di pospone e parti di caso pa mas investigacion * aki tres siman lo sigui cu e caso
ORANJESTAD (AAN): Abogado mr. Illes ayera merdia a entrega un rapport di investigacion financiero di expertonan accountant den Corte Superior. Esaki a causa un tension cerca Hof y Procurador General.
Hof ta haya cu e rapport cu splicacionnan financiero a wordo entrega laat. A pospone e caso un rato pa Hof bay evalua di ta acepta e raport mientras cu PG tambe a bay evalua e rapport. Mr. Illes a splica cu ta henter un investigacion expertonan accountant a haci pa demostra entradanan di Paul y Melony y cu e investigacion financiero haci di parti di Ministerio Publico no ta cuadra.
El a bisa Hof cu e expertonan tabata presente den sala di Corte tambe. Hof a bisa cu e ta pospone e caso un rato pa evalua esey. A dura basta rato promer cu Hof a presenta y president di Hof a bisa cu aunke cu e rapport a wordo entrega laat y cu PG a reclama cu tin informacionnan cu e no ta na altura di dje.
POSPONE PARTI DI CASO
Hof a bisa cu e kier duna PG chens pa investiga esaki. Lo haci e parti di Paul so y wanta e parti di Melony pa laga PG investiga y tambe di parti di defensa lo por haci su parti. Hof a dicidi di ta pospone esaki pa dia 21 September 2021 cu Hof lo ta na Aruba.
Hof a bisa cu e kier reaccion di PG riba e rapport y reaccion di abogado riba esaki. PG a pidi Hof pa dun’e mas tempo pa por traha e raport y cu lo bay tuma mas tempo pasobra di parti di defensa su expertonan e kier mas splicacion con a yega na sumanan cu ta menciona y pa controla esakinan.
Abogado mr. Illes a mustra cu ta acusa Paul y Melony di labamento di placa. E ta haya cu a base di accountant, tin fayo den e investigacion financiero cu tin consecuencia den e caso di Paul y Melony.
Un experto accountant cu tabata den sala a splica un que otro tocante con den e investigacion financiero a haci fayo den calcula di sumanan. El a bisa cu tin codenan di banco cu ta demostra ora lanta placa. Mr. Illes a bisa Hof cu Ministerio Publico ta mustra un caso cu a lanta 10 mil florin pero en realidad e ta 6 mil florin. Esey ta un caso so, sin papia di henter e periodo 2014 pa 2017. El a bisa cu e ta haya esaki hopi fastioso pa PG y ta kere cu esaki ta debi na e hecho cu lo a bin cu expertonan di Hulanda kendenan lo no conoce e codenan di banco na Aruba.
Ta asina cu Hof a pospone e caso pa dia 21 di September 2021 y a instrui PG pa otro siman e manda su reaccion riba e rapport y e siguiente siman mr. Illes mester reacciona riba esey. E ora ey aki tres siman lo sigui cu e caso.
