Abogado mr. Illes ta señala - ORANJESTAD (AAN): Mr. Illes ayera atardi den sala di Corte, a cuestiona e forma con Ministerio Publico a limita comunicacion di Paul Croes durante 80 dia cu su famia y tur hende.
E abogado a bisa Hof di Corte Superior cu esaki a afecta Paul Croes masha hopi. El a wordo isola den seccion di hendenan cu problema mental (IBA) cu a mata hende.
E abogado a bisa Hof cu Paul Croes mester a keda 22 ora sera den su cel. Pa algun ora so e tabata permiti pa tuma aire. E tabata su so den un cel, sin buki, sin nada pa e destrai su mente. Esaki a afecta Paul Croes asina hopi cu awor e ta hayando tratamento psicologico. Por a mira cu Paul Croes tabata cabez abao hopi desapunta.
FISCAL A ACTUA INHUSTO
E abogado a bisa Hof cu Paul for su cel tabata scucha hendenan ta grita den e otro celnan. Mr. Illes ta haya cu aki Ministerio Publico a viola derecho humano di Paul Croes. El a cuestiona e forma inhusto di actua di Fiscal door di ordena pa Paul keda sera den e cel aki sin por papia cu ningun hende. E abogado a remarca, con ta bay sera un persona cu ta mentalmente bon, den seccion di hendenan cu tin problema mental. Bo no por sera hende den seccion cu no ta cuadra pa nan. El a bisa cu 76 dia Paul tabata sera den un cel chikito den seccion di hendenan cu problema mental. 80 dia den isolacion, sin bijbel, sangura, cacalaca y djaca ta pasa den cel. Na dado momento un empleado a haya cu ta di mas y tabata laga Paul sigui lesnan di bijbel.
Ta asina cu Paul tabata banda di cel di Lampe cu a mata su famia y kima nan. E abogado a mustra cu recien tabatin un otro politico deteni y sera den KIA pero no tabata isola manera Paul.
VIOLA DERECHO HUMANO
Apesar di a critica e forma di isola, Ministerio Publico no a haci nada. Mr. Illes a mustra cu tin rapport di instancianan reconoci cu ta cuestiona e situacion deplorable na IBA.
E ta haya cu a viola e ley di Derechonan Humano. El a cuestiona e forma inhumano con tabata trata Paul.
FISCAL KIER A KIBRA PAUL
E abogado a bisa Hof cu Fiscal a abusa di su autoridad door di pone Paul den limitacion di e forma aki. E ta haya cu no por tuma na malo pa pensa cu a pone e limitacionnan aki pa kibra Paul. El a pidi Hof pa tene debido cuenta cu e forma inhumano aki. El a mustra cu a pidi pa laga Paul su yiunan y señora bishite bou vigilancia pero esaki a wordo nenga.
Abogado ta haya cu den e situacion aki mester declara Ministerio Publico no admisibel y subsidiario baha castigo drastic di minimo 600 dia. El a enfatisa cu e forma di actua aki di Ministerio Publico ta pone derecho di estado na peliger.
