ORANJESTAD (AAN): E homber J.L. ayera mainta a presenta dilanti Hues pa duna cuenta pa loke el a haci. E ta wordo acusa di malversacion di mas cu 61 mil florin na Censo.
Ta asina cu J.L. a pidi pa pospone e caso pa e haya un abogado y Fiscal y Hues a bay di acuerdo.
MALVERSA MAS CU 61 MIL FLORIN
E acusacion cu Fiscal a presenta den sala di Corte contra J.L. ta cu entre 1 April 2018 y 20 Februari 2019, el a malversa un cantidad di placa. Investigacion a mustra cu ta mas cu 61 mil florin J.L. a malversa.
SOSPECHOSO TABATIN COVID
Hues a bisa cu a ricibi un carta di J.L. caminda e ta pidi pa pospone e caso pa e haya un abogado. J.L. a splica den e carta cu recien el a sali for di hospital, caminda e tabata interna pa Covid.
Fiscal a bisa Hues cu e no tin nada contra pa pospone e caso. Hues a bisa cu ta J.L. su derecho pa haya ayudo di abogado. Fiscal a pidi Hues pa pospone e caso pa dia 4 November 2021. Hues a bay di acuerdo cu e proposicion di Fiscal. El a bisa J.L. pa e percura pa mas liher posibel e bay busca un abogado liber pa asina e ta prepara pa e caso.
CENSO A HACI DEMANDA DI DAÑO
Den sala di Corte tabata presente e director di Censo. El a bisa cu el a bin pa haci demanda di daño. Ariba peticion di Hues, el a entrega e demanda di daño adelanta pa asina J.L. por duna su abogado. E director di Censo a bisa Hues cu e caso aki a haci nan hopi dolor ya cu nan tabatin un hopi bon relacion di trabou cu J.L. El a bisa Hues cu Censo ta para pa integridad y e caso aki ta daña e imagen di Censo. E ta desea pa mas pronto posibel pone un fin na e caso aki.
CASO POSPONI
Hues a bisa cu e lo pospone e caso pa 4 November 2021 pa 10’or di mainta. El a bisa tambe cu e por a compronde for di e raport di Recherche, cu J.L. ta dispuesto di paga bek loke el a malversa. Tur esaki lo papia ariba durante tratamento di e caso dia 4 November 2021.
