Fiscal a baha pisa riba e acusado cu ta bisa cu e no ta corda - ORANJESTAD (AAN): Corte den Prome Instancia a trata e caso penal cu Ministerio Publico
a cuminsa contra e hombernan G.V.F. y ruman G.F., C.A.R., kendenan ta wordo acusa di intento di mata, maltrato y posesion di un arma di candela riba 21 Februari 2021. Fiscal a baha pisa riba G.V.F., kende ta bisa cu e tabata asina bebi cu e no ta corda nada. Ta asina cu ademas di a tira, a haya 3 arma di candela cu segun e ruman G.F., e armanan ta di G.V.F. Fiscal a exigi pa C.A.R. 30 luna di prison di cual 15 luna ta condicional, pa G.F., 40 luna di prison di cual 20 luna ta condicional y pa G.V.F., 8 aña di prison.
ACUSACIONNAN
E acusacionnan cu Fiscal a presenta den sala di Corte cu G.V.F. y G.F. a tira riba e homber B. G.V.F a menaza e dama K. cu arma di candela. E trio tambe ta wordo acusa cu entre 21 Februari 2021 y 10 Maart 2021, nan tabatin armanan di candela y 17 bala. Tambe a acusa C.A.R. di tabatin un cantidad di cocaina.
TIRAMENTO DEN SAN NICOLAS
Hues a mustra cu e caso aki a cuminsa ora cu Polis a haya yamada cu tabatin tiramento na San Nicolas y cu e victima ta den hospital. Tambe Polis a haya sa, cu un auto Honda color scur a pasa den caya y dos hende a baha y un a tira. Parce cu esnan den e auto tabatin un discusion cu hendenan para na banda. Na dado momento esnan na banda a tira un boter riba auto. E chofer y ocupante na banda a baha y e ocupante a tira y herida B. na pia. For di indicacionnan, Polis a detene e rumannan F. cu tabata esnan den e auto. Tin tres testigo cu a scucha, entre nan e victima B., kendenan ta reconoce G.V.F. como esun cu a tira.
SOSPECHOSO NO TA CORDA
Hues a puntra G.V.F. si ta asina tur cos a sosode. G.V.F. a bisa cu por ta. Hues a bisa cu segun declaracionnan, G.V.F. tabata bou influencia di alcohol. El a bisa cu esey por tabata posibel. El a bisa cu por bien ta posibel cu e tabatin un arma. G.V.F. a bisa Hues cu e dia ey e tabata bebi. E dia ey G.V.F. a bebe whisky y huma marihuana.
Hues a remarca cu ta straño cu G.V.F ta corda kico el a bebe pero no ta corda cu el a tira. El a bisa cu for di mainta nan tabata bebe y no ta corda nada. Hues a puntr’e ki tipo di arma e tabatin. El a bisa cu e no ta corda. Hues a bisa cu Recherche a indica cu G.V.F. su mannan tabata yen di ketchup. G.V.F. a bisa Hues cu Recherche a bis’e pero e mes no sa.
Ta asina cu G.V.F. conoce B. y ta papia cun’e. El a bisa cu ora Recherche a bis’e cu el a tira B., el a keda straña.
A HAYA 3 ARMA
Hues a mustra cu for di cellular di G.V.F. a haya voice note cu ta mustra cu mas biaha G.V.F. ta anda cu arma y parce cu e ta deal den arma. G.V.F. a bisa cu si ta asina, e lo tin hopi placa. Hues a mustra cu hasta tin un mensahe cu G.V.F. tabata busca bala Caliber 38. Segun G.V.F. su declaracion na Recherche, e balanan ey ta schaars y e tabata busca pa asina gana un poco placa. Hues a mustra cu G.V.F. tambe tabata papia di pistool Glock.
Ta asina cu a haya C.A.R. cu un arma y dos otro arma den un auto cu no ta core, para na un cas. Segun G.F., e armanan ta di su ruman G.V.F. Ta asina cu door cu G.F. a conta tur cos na Recherche, su ruman G.V.F. ta rabia cun’e.
DEMANDA DAÑO
Ta asina cu B. a demanda 30 mil florin di danjo material. Esaki pasobra e no por a traha door di e tiro na pia. Danjo inmaterial di 40 mil florin na e dos rumannan G.F. y G.V.F.
EXIGENCIA DI FISCAL
Fiscal a bisa Hues cu e ta haya legalmente proba cu G.V.F. a tira. B. riba 21 Februari 2021. Testigonan a bisa cu G.V.F. ta wordo yama (Baas) y cu nan a mira Baas tira riba B. y menaza e dama K. cu e arma.
Fiscal a sigui bisa cu Polis a haya e 3 armanan pero un revolver no ta funciona. Tambe a haya e 17 balanan. A haya 0.5 gram di cocaina. Fiscal a bisa cu e hecho cu G.V.F. a tira riba B., el a tuma e riesgo cu e por a mata B. Fiscal ta considera cu G.V.F. a purba mata B.
Fiscal a bisa cu G.F. no ta complice pasobra e no tabata sa cu G.V.F. tabatin un arma. Fiscal a pidi Hues pa declara G.F. liber di e acusacion di complice di purba mata. Pa loke ta menaza dama K., Fiscal ta haya cu G.V.F. a saca arma pa B. y lo a menaza K. cu tabata para banda di B. Fiscal ta haya cu e G.F. y C.A.R. tabatin arma den nan poder. Nan tabata sa di e armanan cu tabata den saco di plastic. Haya cu C.A.R. no tabata sa di e di 3 arma. Haya G.V.F. y G.F. responsabel pa 3 arma.
Fiscal a lamenta cu B. no a presenta den Corte pa splica su demandanan cu ta hopi halto. Ta un hecho cu B. a sufri daño. Fiscal ta haya cu mihor B. haci un caso civil. El a pidi Hues pa declara e demanda no admisibel. Pa loke ta e demanda di daño inmaterial, Fiscal ta calcula 8 mil florin lo ta na su lugar y e resto mester declara no admisibel. Tambe el a exigi medida di pago pa si no paga lo bay sera. El a exigi tambe pa e armanan, bala y droga wordo destrui.
CASTIGO
Fiscal a exigi pa C.A.R. 30 luna di prison di cual 15 luna ta condicional cu un tempo di prueba di 3 aña. Pa G.F., Fiscal a mustra cu ta G.F. a dicidi pa sconde e armanan y pesey ta haya mas castigo. El a exigi pa G.F., 40 luna di prison di cual 20 luna ta condicional cu un tempo di prueba di 3 aña. Pa G.V.F., kende Fiscal ta haya culpable di purba mata, el a exigi 8 aña di prison. Hues a bisa cu e ta bay studia e caso y dentro di algun siman lo por spera sentencia.
