Hof a bisa cu mas tarda dialuna awor lo tin un decision
ORANJESTAD (AAN): Diahuebs merdia 2’or den sala di Corte di Husticia di Aruba, Hof di Corte Superior a trata e protesta di Eugene Lampe, contra e decision di Minister di Husticia pa wanta su libertad condicional.
Eugene Lampe a worde treci den sala di Corte y a worde representa pa su abogado mr. Lejuez. Aki mr. Lejuez a worde asisti pa mr. Kip. Por a ripara cu Eugene tabata hopi trankil.
Su peticion na Corte tabata pa e worde laga liber awor y a propone pa e bay Respaldo, wardando riba e plan di tratamento di psycologo. Procurador General (PG) a mustra cu tanten cu no tin un plan completo, no ta tuma e riesgo pa laga Eugene liber.
LIBERTAD CONDICIONAL POSPONI:
Ta asina cu segun maneho, un preso ta sinti 2/3 parti di su castigo y despues e por pidi pa haya libertad condicional. E libertad condicional ta mara na condicionnan. Pa bin na remarca pa libertad condicional, e preso mester a comporta su mes bon durante su detencion den KIA.
Eugene Lampe dia 17 Juli 2009 a worde condena na 18 aña di prison pa a asesina na forma cruel su famia (e famoso triple asesinato na Macuarima).
El a apela e sentencia y Corte Superior a subi e castigo na 20 aña di prison. Ta asina cu Eugene Lampe, a haci peticion pa e haya libertad condicional y e lo mester a haya esaki for dia 5 Augustus 2021. Ta asina cu ora el a haci e peticion, e comision encarga cu esaki, mester manda conseho cu Minister di Husticia.
A base di e conseho, Minister di Husticia a dicidi cu ta pospone e libertad condicional te na November 2021 pasobra mester tin un plan completo con ta bay trata cu Eugene, kende ta un persona cu ta sufri di problema mental.
PROTESTA TRATA DEN CORTE SUPERIOR:
Eugene Lampe, no ta di acuerdo cu e decision di Minister di Husticia y a haci protesta. Esaki a worde trata Diahuebs den Corte Superior. Hof a bisa cu por a compronde cu dia 5 Augustus 2021, Lampe mester a haya libertad condicinal pero cu Minister di Husticia a pospone esaki te November 2021 pasobra Minister di Husticia kier tin un plan completo con ta bay atende cu Lampe ora e haya su libertad condicional.
Minister di Husticia ta haya cu mester tin claridad unda Lampe ta bay biba y traha un plan di tratamento di psychiater. Si no tin claridad den esaki, e riegco tey cu por presenta problema. Minister di Husticia a bisa cu a base di conseho di Reclasering a pospone e fecha di libertad condicional di 5 Augutus 2021 pa 3 November 2021.
EUGENE TA DESAPUNTA:
Hof a puntra Lampe, kico e ta pensa di e decision aki. El a bisa cu e ta haya cu Gobierno ta mucho laat cu ta awor ta bay haci investigacion. E ta desapunta cu esaki. El a bisa cu e ta comportando su mes.
E sa cu e tin problema mental pero e ta haya pildernan pa bebe y tambe e ta haya injeccion cada pasa algun siman. Segun Eugene tur dia e ta bebe su pildernan y no ta haciendo problema.
MESTER PLAN DI TRATAMENTO:
Hof a mustra cu Minister Husticia ta haya cu mester haci investigacion promer cu laga Eugene liber. PG a bisa Hof cu apesar cu Reclasering ta conseho cu no, e comision di KIA ta haya cu Eugene ta cla pa bay cu libertad condicional. Minister di Husticia a pidi mas conseho y e ora ey psychiater, Reclasering a traha otro raport caminda a conseha pa pospone pa laga Eugene liber awor. PG a bisa cu el a papia cu un psychiater di Curacao pa haci un evaluacion y prepara un plan di tratamento.
A keda palabra cu e luna aki lo mester tin un plan cla y dia 1 di October 2021 lo cuminsa cu e plan di tratamento. Dia 2 October 2021 lo trata esaki den e comision special pa haya conseho pa mira si esaki ta bon pa Lampe por bay cu libertad condicional.
EUGENE KIER BAY LIBER AWOR:
- Lejuez a bisa Hof cu promer Minister di Husticia a pone 3 condicion pa Eugene Lampe lo por haya libertad condicional. E promer condicion ta tratamento. Eugene a bisa cu pa añas e ta bao tratamento di un psychiater. E di dos ta cu e mester ta bou tratamento di diferente psychiater. E di tres ta cu mester tin palabracionnan concreto cu Reclasering. Tur esakinan Eugene a bay di acuerdo.
E ta dispuesto pa keda den contacto cu Reclasering. Pa mas cu 6 aña (cu ta e periodo di libertad condicional) e lo mester keda mantene e condicionnan aki. E abogado a bisa Hof cu Eugene no ta di acuerdo cu e mester keda warda. E kier pa e bay liber awor y no te 3 November 2021.
DIALUNA LO TIN UN DECISION:
Hof a pospone e tratamento un rato pa evalua con mester bay sigui. Hof a bolbe y a bisa cu lo bay evalua e caso y mas pronto posibel, mas tarda dialuna, lo tin decision.
Eugene a bisa Hof cu e tin mucho tempo sera den cel. E ta para riba cu e kier bay Respaldo
