Hues a baha pisa - ORANJESTAD (AAN): Na comienso di luna, Corte den Promer Instancia a trata e caso penal cu Ministerio Publico a cuminsa contra un grupo di 10 hende di cual 1 ta un dama.
E mayoria ta Venezolano, kendenan a haci un serie di asalto arma cu violencia na cas di famia. Hendenan a wordo amenaza cu arma na cabez, maltrata y mara. Recien den oranan di merdia, Hues a dicta sentencia contra e grupo aki y por a constata cu e castigonan ta menos di loke Fiscal a exigi pero tog halto. Fiscal su exigencia tabata pa castigonan te cu 16 aña di prison.
Durante tratamento di e caso, Fiscal a bisa Hues cu e grupo aki a haci 7 asalto arma cu violencia den un periodo di 3 luna. Ta asina cu no ta tur a participa na tur e asaltonan y pesey Fiscal a haci acusacion contra cada un separa pa mustra kico tur cada un a haci.
MENAZA Y BATI VICTIMANAN
Fiscal a mustra cu e grupo aki tabata drenta cas di famia, menaza hende cu arma caminda tabata pone e arma na cabez di hende, dal y skop hende. Tabatin caso caminda mucha chikito a mira con e asaltantenan aki tabata bati nan mayornan.
VIOLA PRIVACIDAD DI HENDE
Fiscal a condena e hecho cu e famianan a pasa tur e trauma aki den nan propio cas. Nan cas caminda nan mester sinti nan mes sigur. El a mustra cu hasta muchanan den cas, e asaltantenan a pone paña rond di nan cabez. Fiscal ta haya cu esaki ta un violacion di privacidad di hende.
Fiscal a bisa cu mester manda un señal bon cla cu no ta tolera esaki. E castigonan cu Fiscal a exigi tabata:
- 16 aña di prison pa e hombernan M.A.G.A., A.J.D.B., J.L.P.B. y J.C.V.V.
- Fiscal a exigi 15 aña di prison pa e homber D.J.R.,
- 12 aña di prison pa e dama C.A.W.,
- 10 aña di prison pa e homber C.J.V.V.,
- 6 aña pa e hombernan W.S.N.V. y F.J.B.R.,
- 5 aña di prison pa F.R.M.S.
SENTENCIA
Hues den su sentencia a condena total e serie di asaltonan arma cu a sosode. Sinembargo tin algun di e casonan caminda Hues no ta haya cu algun di e sospechosonan ta culpable y a declara nan liber.
Hues a condena e homber J.L.P.B. na 14 aña di prison.
E tres hombernan M.A.G.A., J.C.V.V. y D.J.R. a wordo condena na 10 aña di prison.
E Homber C.J.V.V., kende ta ruman di J.C.V.V., a wordo condena na 8 aña di prison.
E dama C.A.W. a wordo condena na 5 aña di prison.
E tres hombernan W.S.N.W., F.J.B.R. y F.R.M.S. a wordo condena na 4 aña di prison.
