ORANJESTAD (AAN): Diabierna mainta Rudy Carti a presenta den sala di Corte pa e casonan penal cu Ministerio Publico a cuminsa contra dje.
Den sala di Corte tabata presente e damanan cu a haci denuncia di inmoralidad contra Carti. Hues a honra abogado mr. Carlo su peticion pa scucha tres testigo cu el a trece Corte di parti di su cliente. Un di e testigonan ta e señora di Carti.
Ariba peticion di mr. Carlo pa pospone e caso, Hues a bay di acuerdo mirando cu e tempo cu a stipula pa e tratamento, no tabata suficiente.
Fiscal ta acusa Carti di abuso sexual y inmoralidad riba cuater dama. Fiscal a menciona 8 dama cu a haci denuncia. Fiscal a menciona cu ta sospecha Carti lo a haci abuso sexual of inmoralidad na November 2020, na September 2018 y entre 2012 y 2015.
ABOGADO A PIDI POSPONE CASO
Abogado mr. Carlo a bisa Hues cu el a pidi promer pa pospone e caso mirando cu ta dia di eleccion y a stipula 1 ora y mey pa tratamento y cu 12’or Corte lo sera. E abogado ta haya cu e tempo ta mucho cortico. El a bisa Hues cu e ta calcula cu e so lo bay hiba un defensa cu lo dura un mey ora. Ademas e kier scucha testigonan.
Hues a mustra cu Carti a nenga di papia durante ultimo interogacion. Carti a bisa Hues cu el a haci esaki pasobra e miembronan di KZP no a laga su abogado ta presente. Hues a puntra si su abogado ta presente e ora si. El a bisa cu e ora ey e lo ta dispuesto pa contesta preguntanan.
TESTIGONAN
Abogado mr. Carlo a mustra cu tin 8 diferente denuncia. El a bisa Hues cu e motibo cu e kier a scucha e testigonan, entre nan e señora di Carti, ta pasobra loke algun di esnan cu a haci denuncia ta bisa, no por tabata posibel.
AINDA NADA RIBA LABAMENTO DI PLACA
Abogado a mustra cu 6 Mei 2021, diripiente Fiscal kier splits caso di labamento di placa di e caso inmoral. Esaki pasobra ainda caso di labamento di placa no ta cla. E ta haya esaki no ta practico y a pidi Hues pa trata tur dos caso hunto.
Fiscal a reacciona cu ora a planea caso regiezitting ta pa haya sa si tin mas deseo di parti di abogado. Abogado no a bisa nada. E ta lamenta cu awor ta bin cu no tin suficiente tempo stipula siendo cu den regiezitting a planea cu ta 1 ora y mey pa tratamento. Awor e abogado ta bin cu testigonan y Fiscal no ta haya nan relevante. El a bisa Hues cu e testigonan no tabata presente ora cu Carti lo a mishi cu e patientnan. El a pidi Hues pa rechaza e peticion pa scucha testigonan. Pa loke ta e caso labamento di placa, no tin ningun decision ainda si lo bay persigui Carti. Mr. Carlo a reacciona cu si no tin caso, duna Carti su placa bek. El a bisa Hues cu e placa ey ta e placa di pensioen di Carti, cu el a bin ta spaar. Cart a bisa Hues cu el a pidi e miembronan di KZP pa e demostra con e ta duna tratamento pa asina demostra su inocencia pero el a wordo nenga.
Hues a pospone e caso un rato pa evalua e peticionnan di abogado. Hues a dicidi cu lo scucha e testigonan y solamente lo haci preguntanan cu ta relevante pa e caso.
SCUCHA TESTIGONAN
A cuminsa cu e señora di Carti., kende a bisa cu nunca el a sinta come cu patient na su cas. E señoranan K. y W. a splica con nan a haya tratamento di Carti. Tur dos a bisa cu nunca Carti a mishi na nan partinan intimo.
POSPONE CASO
Hues a bisa cu mirando e tempo, lo mester pospone tratamento di e caso. Pa loke ta pa trata e casonan hunto, Hues a bisa cu no tin un acusacion pesey no por trata nan hunto. Hues a bisa cu lo ta bon pa Carti, acompaña pa su abogado, wordo interoga pa miembronan di KZP. Fiscal a propone pa abogado mr. Carlo laga sa pa e ora ey e interogacion tuma lugar. Pa loke ta tratamento di e caso, Fiscal a propone 17 September 2021.
Hues a bisa cu mester duna Carti oportunidad pa laga mustra con e ta duna massage. Fiscal a bisa cu e lo ta dificil pa determina. Hues a bisa cu por usa un popchi. E abogado mr. Carlo ta haya cu lo ta bon pa filma con Carti ta massage y tambe splica.
Hues a dicidi cu ta pospone e caso pa 17 September pa 8.30 di mainta y lo pa tuma henter mainta pa esaki.
